“Oi Moale Henia Ororo Nanigosi”
ITA momo be nanigosi ta ita herevalaia neganai, unai hereva, moale henia, do ita gaukaralaia lasi. Reana do ita laloa nanigosi be animal namona, bona gau idauidau do ia ania bona ena hidio mamina namona bona rata goevana ita moalelaia—to do ita gwauraia lasi ita moale henia.
To herevana, Baibel ese headava hahine ia gwauraia “oi ura henia dia hahinena bona oi moale henia ororo nanigosi.” (Aonega Herevadia 5:18, 19, NW) Aonega Herevadia bukana ia torea tauna ta, Solomona, be Israela ena uda animal ia diba namonamo, unai dainai unai hereva ia gaukaralaia be mai ena badina namona. (1 King Taudia 4:30-33) Reana, ena tamana Davida hegeregerena, Mase Davarana ena kone kahirakahira gabuna, Ene Gedi, dekenai nega momo idia loaloa ororo nanigosi edia kara ia itaia.
Ororo nanigosi edia seri ta, Iudea ena Tano Gagaena dekenai idia noho, be hanaihanai Ene Gedi ena siahu ia matamaia negana ai unuseniai idia lao. Unai tano kaukau gabuna dekenai, Ene Gedi be ranu ia ore lasi gabuna tamona, unai dainai ororo nanigosi be ranu totona unuseniai idia lao momo. Reana Ene Gedi ena anina be “nanigosi ena natuna ena ranu lohilohi,” bona unai gabu dekenai nanigosi natudia idia itaia loulou karana ese unai ia hamomokania. King Davida be King Saulo ena dagedage karana amo ia heau mauri bona unai gabu dekenai ia noho, herevana “Uda Nani edia Nadi gabuna dekenai” heau mauri tauna bamona ia noho.—1 Samuela 24:1, 2.
Hari Ene Gedi dekenai, ororo nanigosi hahinena ta do oi itaia diba, mai ena diba danu nadi koura dobuna amo nanigosi tau murinai ia diho lao ranu gabuna dekenai. Unai oi itaia neganai, ororo nanigosi hahinena bona headava hahinena hahegeregerea karana oi lalo-pararalaia matamaia. Ena tauanina manada bona toana mai ena hairai be hahine ena toana ia hahedinaraia danu. Unai hereva “moale henia” be ororo nanigosi ena kara toana bona hairai ia herevalaia.a
Ororo nanigosi hahinena ia goada bona ena heau toana be namo herea. Iehova ese Iobu ia hadibaia hegeregerena, ororo nanigosi be nadi ororo gabudiai, taunimanima idia lao diba lasi gabudia dekenai, natuna idia havaraia. Unuseniai reana aniani be bada lasi bona siahu o paraka ia bada herea diba. (Iobu 39:1) Herevana unai hekwakwanai idia noho, to ena natudia ia naria bona idia ia hadibaia, ia hegeregerena nadi dekenai idia daekau bona roho namo herea totona. Ororo nanigosi hahinena be dagedage animal edia amo ena natuna ia gimaia. Tau ta ese ororo nanigosi ta ia itaia, ena natuna be ia henunai ia hunia noho lalonai, ia be hora kahana ta lalonai ugava ta ia koua bona lulua.
Keristani headava hahine bona sina be nega momo nega aukadia ai edia natudia idia naria. Ororo nanigosi hegeregerena, unai Dirava ese ia henidia maduna idia huaia mai goada ida bona sibona edia ura idia dadaraia. Bona idia hekwarahi bada edia natudia idia naria totona, lauma dalanai dika do idia davaria garina. Unai dainai, Solomona ese unai hereva amo hahine edia namo ia hamaragia lasi, to hahine edia kara toana bona hairai—lauma huahua karadia unai, nega auka hereadia lalonai danu idia hedinarai karadia—ia hahedinaraia.
[Footnote]
a The New Brown-Driver-Briggs-Gesenius Hebrew and English Lexicon ia gwau, unai hereva lalonai Heberu herevana chen, idia hahanaia “moale henia [toana],” ena anina be ‘tauanina bona kara toana ena namo eiava hairai.’
[Pictures on page 30, 31]
Keristani headava hahine bona sina be Dirava ese ia henia maduna ia huaia neganai, lauma huahua kara namodia idia hahedinaraia