Oi Laloa Maoromaoro, A?
MOSE be Israela ena hahemaoro taudia ia abia hidi neganai, “aonega bona laloa maoromaoro bona diba momo tataudia” ia tahua. (Deuteronomi 1:13, NW) Diba momo, mauri lagani hegeregerena ia bada ia lao gauna, be tahua gauna badana tamona lasi. Aonega bona laloa maoromaoro danu be mai anina bada.
Ia laloa maoromaoro tauna be ena hereva bona kara ia laloa namonamo. Webster’s Ninth New Collegiate Dictionary ia gwau, laloa maoromaoro tauna be “aonega dalana ai do ia herevahereva lasi” danu. Oibe, ‘herevahereva be mai ena nega,’ bona ‘regerege lasi be mai ena nega,’ bona laloa maoromaoro tauna be unai ia lalo-pararalaia. (Hadibaia Tauna 3:7) Nega momo, ita herevahereva lasi be mai ena badina namona, badina be Baibel ia gwau: “Hereva momo ese kara kerere idia havaraia noho, to iena uduna ena hereva ia koua noho tauna, be mai ena aonega.”—Aonega Herevadia 10:19.
Keristani taudia idia naria namonamo, bona ta ta idia kara henia mai laloa maoromaoro ida. Ia hereva momo bona ia hereva auka tauna be nega ibounai mai anina bada tauna eiava mai ena gaukara bada tauna lasi. Laloaboio lasi, Mose be ‘hereva dekenai mai siahuna,’ to Israela besena ia gunalaia namonamo diba lasi ela bona haheauka, manau, bona boga-auka ia habadaia. (Kara 7:22) Unai dainai, namona be ma haida gunalaia siahuna idia abia taudia idia hekwarahi, idia manau bona ma haida idia laloa.—Aonega Herevadia 11:2.
Iesu Keriso ese “iena kohu ibounai” naria taudia ai ia halaoa taudia be Baibel ese ia gwauraia “hesiai tauna mai ena kamonai, bona mai ena kara maoromaoro.” (Mataio 24:45-47) Edia hemami hegeregerena mai hekokoroku ida Iehova vairanai idia heau guna lasi; eiava murina kahanai idia metairametaira lasi bema Dirava ena hahekau gau ta dekenai be ia hedinarai goevagoeva. Idia diba edena nega ai do idia hereva bona edena nega ai do idia naria mai regerege lasi, ma gau haida idia hedinarai namonamo totona. Namona be Keristani taudia ibounai ese idia edia kamonai karana idia tohotohoa sibona lasi, to idia hahedinaraia danu idia be laloa maoromaoro taudia, unai hesiai tauna oreana bamona.—Heberu 13:7.