Ita be Abidadama Taudia

Altiplano, Peru, Dekenai Basileia Idia Harorolaia

ANDES Ororodia ena ist bona west edia huanai​​—⁠Peru bona Bolivia idia hedavari gabuna ai​​—⁠Altiplano ia noho. Iena ladana ena anina be “ataiai palaka gabuna” eiava “taora gabuna.” Iena kahana badana be Bolivia lalonai.

Altiplano ena lababa be kilomita 100 bona ena lata be kilomita 1,000 ia hanaia, bona kone gabudia amo ia be mita 3,700 bamona atai dekenai. Peru ena kone hanuana badana, Lima, dekenai peleini ai oi guia neganai, sinou ia koua El Misti do oi hanaia, unai lahi ororona ena lata be mita 5,822 bona ori lalonai ia vareai. Matana oi negea daudau neganai, Nevado Ampato bona Nevado Coropuna ororodia edia dorina mai edia sinou do oi itaia, idia be mita 6,000 ataiai. Bena emu vairanai taora gabuna badana ta​—⁠Peru ena saut kahana ena Altiplano​​—⁠do oi itaia.

Peruvian Altiplano ena hanua badana be Puno, tanobada ena atai herea gohu badana, Lake Titicaca, ena notwest dokona kahanai ia gini. Unai gabu be kilomita toi ataiai dainai, vadivadi taudia be hodahoda maragina idia manadalaia be namo. Quechua bona Aymara India taudia be Lake Titicaca kahirakahira dekenai idia noho. Chacras o edia uma maragidia dekenai idia gaukara lalonai do oi itadia diba, idia karaia dabuadia ena kala be kakakaka, grin, eiava bulu. Peru taudia idia herevalaia gadona be Spanish, to Altiplano dekenai be Quechua gado bona Aymara gado idia herevalaia danu.

Haroro Gaukarana idia Gunalaia Noho

Unai Quechua bona Aymara idia herevalaia taudia momo, gaukara goada bona manau taudia unai, be Baibel dekenai, hereva momokani ena diba maoromaoro idia abia. Unai ia vara ena badina badana ta be Iehova ese spesel painia taudia edia ful-taim hesiai gaukara goadana ia hanamoa dainai.

Hegeregere, spesel painia taudia José bona Silvia be Putina ena taoni dekenai idia siaia lao, Lake Titicaca amo be kilomita 50 bamona. Hua rua lalonai, Silvia be Baibel stadi 16 ia karaia, bona José be Baibel stadi 14 ia karaia. Hua 6 sibona lalonai, kongregesen pablisa ena namba be 23 amo ia bada daekau 41. Unai nega lalonai, hebou dekenai idia mai taudia be 48 amo ia bada daekau 132.

José ia gwau: “Ai davaria inai gabu daudau hanuadia dekenai kongregesen heboudia ai karaia matamaia totona, Pablik Hebou bona Kongregesen Buka Stadi amo ai hamatamaia be mai ena heduru. Unai ese kamonai matamata taudia edia hebou mai henia dalana ia kehoa.”

Taihu rua​​—⁠ta be painia​​—⁠ese Munani hanua dekenai hereva momokani idia mailaia matamaia. Putina amo ena daudau be kilomita 20 bamona. Unuseniai matakepulu tauna ta ladana Lucio ida Baibel stadi idia hamatamaia.a Iena tadina Miguel ia boiria, ia be Katolik edia misinari tauna bona unai gabu kahirakahira hanuana ta edia gunalaia tauna. Miguel be ena turana ta ese ia nanadaia, dahaka dainai pura ibounai Munani dekenai ia lao, bena ia hamaoroa unai be Iehova bona ena Hereva do ia dibaia totona. Unai neganai idia henanadai: “Dahaka dainai iniseniai Baibel ita stadilaia lasi?” Miguel ena hanua taudia edia ura dainai, Witnes taudia be unuseniai hebou abia daladia idia hegaegaelaidia.

Miguel ia dibaia gaudia be haida dekenai ia hadibaia. To iena Katolik misinari dagina bona gavana durua tauna dagina be edena bamona? Unai hanua ena hebou rumana ai idia hebou lalonai, iena Katolik misinari gaukarana hadokoa herevana ia gwauraia. Ma tau ta do idia abia hidi, a? Helai taudia huanai ia noho hahinena ta ia gwau: “Hereva momokani ita dibaia lalonai dahaka dainai misinari ma ta do ita abia?” Momokani, inai be Iehova ena Witnes taudia ese idia hadibadia gaudia idia gwauraia. Ma tau ta ia gwau: “Oi sibona oi raka siri be namo lasi. Ita ibounai ita raka siri be namo, ani?” Idia mai taudia ibounai be nega tamona idia boiboi: “Ita ibounai ita raka siri!”

Kaivakuku bona korosi be nega sisina murinai edia hanua hebouna lalonai idia herevalaia. Tau ta ese idia mai taudia ia noidia Deuteronomi 7:25 do idia duahia, unuseniai ia gwau: “Edia dirava laulau gaudia be lahi dekenai do umui gabua ore. Idia dekenai ia noho siliva bona golo do umui ura dikadika lasi, bona umui abia lasi, do umui kerere garina. Lohiabada, emui Dirava ese dirava laulau gaudia dekenai ia badu henia momokani.”

Tau ta ese kaivakuku do idia gabua taudia ia noidia edia imana do idia abia isi. Karaharaga imana ibounai idia abia isi. (Kara 19:​19, 20) Hari unai hanua ena bese 25 amo, 23 be Dirava ena Hereva idia stadilaia. Rua be bapatiso lasi pablisa, bona headava taudia ima be Iehova vairanai do idia goeva totona, edia headava hamaoromaoroa daladia idia palanilaia noho.​​—⁠Tito 3:1; Heberu 13:⁠4.

Hahediba Karana Kaset Amo

Altiplano dekenai momo be idia duahiduahi lasi dainai, Watch Tower vidio bona edia gado dekenai idia karaia kaset rekodi durua gauna namona be​​—⁠Baibel stadi totona idia gaukaralaia danu. Spesel painia taihu ta ladana Dora be kaset teipi ta ena heduru dainai Dirava Ia Ura Dahaka Ita Karaia? buklet amo stadi ia karaia. Paragraf ta ia gadaralaia murinai, Baibel stiuden tauna dekenai idia kamonai herevadia ia henanadailaia.

Unai gabu ena reidio steiseni ta be hanaihanai Quechua gadona dekenai, Dahaka Ita Karaia? buklet ena kahana ta ta idia herevalaia. Awake! magasin ena kahana haida danu be Spanish gado dekenai idia herevalaia. Unai dainai, momo be Basileia sivaraina idia lalo-pararalaia bona Iehova ena Witnes taudia be edia ruma dekenai idia vadivadi neganai, idia ura ma hereva haida idia dibaia.

Altiplano be tanobada taudia momo edia amo ia hehuni, to Dirava ena amo ia hehuni lasi. Iehova ese taunimanima ia lalokau henidia dainai, hari Andean Altiplano ataiai idia noho taudia momo be iena tomadiho momokanina idia abia isi taudia ai idia lao.​​—⁠Hagai 2:⁠7.

[Footnote]