Maino Sivarai Namona be Chiapas Ena Ororo Gabuna ai Ia Ginidae

“Chiapas provinsi ai, ala-ala dika hereana ta ia vara, unai bamona gauna ma ta idia laloatao diba lasi, unai ala-aka lalonai, sibona idia durua diba lasi hanua taudia 45, beibi 13 danu, be . . . tatau oreana ta mai edia ipidi ese idia hamasedia.” Niuspepa ta ladana “El, Universal” ese December 22, 1997, Acteal, Chiapas Provinsi ai ia vara gauna be unai bamona ia herevalaia.

CHIAPAS be Mexico ena saut kahanai momokani ia noho provinsi ta, Guatemala kahirakahira ai. January 1994 ai, tano taudia korikoridia, Maya Indian taudia, be nega daudau lalonai idia ogogami bona dabu dainai, edia grup ta ladana Ejército Zapatista de Liberación Nacional (EZLN, Zapatista Ena Taunimanima Ruhaia Tuari Oreana) ese tuari ia hegaegaelaia. Maino havaraia totona idia karaia herevahereva be ia metairametaira momokani. Tuari taudia bona gavamani ami taudia idia tuari dainai rara bada idia bubua bona mase idia havaraia. Unai heiriheiri dainai hanua taudia momo ese edia hanua idia rakatania bona tuari lasi gabuna dekenai idia heau lao.

Unai daradara negana lalonai, maino idia ura henia grup ta be unai politikol karana amo idia gini siri. Mai edia goada ida idia hahedinaraia gauna be Dirava ena Basileia sibona ese taunimanima idia davaria hekwakwanai, edia gabu ai, bona tanobada ai, do ia haorea diba. (Daniela 2:​44) Idia be daidia? Idia be Iehova ena Witnes taudia. Iesu ena hahegani idia badinaia dainai, idia ura Dirava ena Basileia ena sivarai namona be Chiapas ororo gabuna ena daudau gabudia dekenai idia abia lao. (Mataio 24:14) Unai bamona noho lalonai haroro gaukara be edena bamona, bona dahaka anina idia havaraia?

“Lau be Iehova Ena Witnes Tauna Ta”

Ocosingo dekenai, vanegai sibona Basileia pablisa ai ia lao tau matamatana, Adolfo, be dina ta ai reidio steiseni ta dekenai ia gaukara. Karaharaga, iduara dekenai idia pidipidi badabada. Edia vairana idia koua tatau orea ta idia heau vareai bona ena kwarana dekenai ipidi idia poinia. Hereva siaia gabuna dekenai idia heau vareai, hereva siaia gaudia idia abia, bona gavamani danu do idia tuari herevana be reidio amo idia gwauraia hedinarai.

Unai tatau mai edia ipidi ese Adolfo idia oda henia edia orea ia bamoa totona. Ena be Adolfo ia do bapatiso lasi to ia haere: “Lau be Iehova ena Witnes tauna ta.” Ia hamaorodia Dirava ena Basileia sibona ese maino do ia havaraia, bona ia dekenai idia henia ipidi bona unifom ia dadaraia mai ena goada ida. Ena lalo-goada idia itaia dainai, ia idia rakatania. Adolfo be unai nega ia laloa neganai, ia gwau: “Ia vara gauna ese egu abidadama ia hagoadaia momokani.”

Gabeai, tuari ia ore sisina, to unai gabu be ami taudia edia siahu henunai ia do noho. Ena be unai ia vara, Adolfo be mai ena moale ida ia noho gabu ena kongregesen elda taudia edia hereva ia abia dae bona unai gabu dekenai daudau ia noho Keristani grup maragina ta ida ia gaukara hebou. Tuari taudia ese idia naria sekea gabudia dekenai ia raka hanai bona ia gwau ia be Iehova ena Witnes tauna neganai, ia idia matauraia. Gabeai ia bapatiso bona mai moale ida unai grup maragina ia durua diba, Iehova ena Witnes taudia edia kongregesen ta ai ia lao totona. Adolfo ia gwau: “Hari lau bapatiso dainai, mai egu lalona goadana ida lau gwau diba lau be Iehova ena Witnes tauna ta!”

“Iehova ese Ai Ia Hagoadaia”

EZLN ese gavamani tuari henia herevana be reidio dekenai idia gwauraia murinai, taoni taudia idia heau. Ful-taim hesiai tauna, eiava painia tauna, ladana Francisco be ia bona ena adavana idia davaria gaudia lalonai Iehova ese ia hagoadaia dalana ia gwauraia hedinarai.

“Emai lalona ai hadaia tuari lasi gabuna dekenai do ai lao, ena daudau be hora toi bamona do ai raka. Kongregesen ta be unuseniai ia noho dainai, tadikaka ida do ai noho. Nega ia ginidae Palenque dekenai emai sekit hebouhebou do ai abia. Lau bona egu adavana be mai anina bada painia hebouna ai ura lasi reaia, to ai kamonai EZLN taudia ese hebouhebou lao henia dalana idia koua. Emai lalona ai hadaia, uda badana dekenai do ai raka, ena daudau be hora 9 bamona. Nega korikorina dekenai ai ginidae painia hebouna dekenai ai lao totona, bona unai hebou bona hebouhebou ena program ibounai danu ai moalelaia bada.

“Ai giroa neganai, ai davaria emai ruma be lahi dekenai idia gabua bona emai animal idia henaodia. Dabua baege maragina sibona idia rakatania. Ai haboioa gaudia dainai ai lalohisihisi, to Ocosingo dekenai idia noho tadikaka ese mai edia hebogahisi ida ai idia abia dae edia ruma dekenai ai noho totona. Ai biru taudia ese guna ai karaia lasi gaudia karaia dalana be ai dekenai idia hadibaia danu. Tadikaka ta ese lau ia hadibaia foto lau abia totona, ma ta ese lau ia hadibaia tamaka lau hanamoa totona. Unai dala amo lau bona egu adavana ese sibona ai naria ema bona hari, bona painia gaukara ai hadokoa lasi. Idia vara gaudia ai laloa neganai, ai diba mai hekwarahi bada ida ai haheauka lalonai, Iehova ese ai ia hagoadaia.”

Haroro Gaukara Ena Anina Namona

Chiapas Provinsi dekenai idia noho Witnes taudia idia gini goada bona unai mauri aukana eiava dika ese idia koudia diba lasi, to sivarai namona be unai gabu ai idia noho taudia dekenai idia abia lao noho. Hegeregere, April bona May 1995 ai, edia Keristani tadikaka tanobada hegegemadai ida Basileia Sivaraina Namba 34 mai ena hereva kwarana maorona, Dahaka Dainai Mauri be Hekwakwanai amo Ia Honu?, idia hariharilaia.

Unai harihari gaukarana lalonai​​—⁠gabu ta ladana Pueblo Nuevo dekenai​​—⁠regula painia ta ladana Ciro ese kamonai ruma besena ta ia davaria. Dina toi murinai, ia giroa lou bona Baibel stadi be idia ida ia hamatamaia. To Ciro bona ena bamona be unai ruma bese ida stadi karaia totona idia giroa lou neganai, ruma biaguna ia noho lasi. To, edia vairana idia koua tatau idia naria noho ia dekenai dika idia karaia totona. Ciro bona ena bamona idia nanadaia dahaka idia tahua bona idia gwau do idia aladia mase. Edia lalona ai Iehova idia guriguri henia murinai, unai Keristani taudia rua be mai gari lasi ida idia hamaorodia, ruma bese taudia be Baibel amo idia hadibaia totona idia mai. Unai idia hereva neganai edia vairana idia koua tatau ese idia rakatanidia. Badina ita diba lasi, to ruma ena biaguna be unai dina ai ruma dekenai ia giroa lou lasi.

Dina ta ai, lagani toi bamona murinai, Ciro ia hoa badina unai tauna be ena ruma dekenai ia mai. Ciro be mai moale danu ia kamonai ruma bese taudia ibounai be idia bapatiso vadaeni bona hari idia be Guatemala dekenai kongregesen ta lalonai idia noho! Bona ena natuna kekeni ta be regula painia gaukara ia karaia.

Lauma Aniani Idia Laloa Bada

Ena be Chiapas dekenai mauri be ia auka, distrik naria tauna ta ese ia hahedinaraia unai gabu dekenai idia noho Witnes taudia ese hebou ena namo idia laloa bada. (Heberu 10:​24, 25) Vanegai idia karaia dina tamona hebouhebou dekenai ia vara gauna ia herevalaia, hebou be daba momokani ai do idia karaia, unai amo hebou dekenai idia mai taudia be hanuaboi ia do abia lasi lalonai edia ruma dekenai do idia giroa lou diba. Ena be hebouhebou dekenai idia lao totona, idia momo herea be uda lalonai idia raka hora toi mai kahana, to 7:00 a.m. dabai idia ibounai be helai gabudia dekenai idia helai. Helai taudia huanai EZLN orea taudia 6 idia noho, idia kamonai bona edia imana idia hapatapataia, ia hedinarai goevagoeva program idia moalelaia. Idia danu be hora toi idia raka hebouhebou dekenai idia mai totona. Unai gabu ena Kingdom Hall ta dekenai, Keriso ena mase laloatao Memorial idia karaia neganai unai orea taudia 20 idia mai danu.

Unai tuari oreana ena tau matamata ta be ena biagudia ese idia abia hidi uda gabuna ta do ia naria totona. Unai gabu ai ia ginidae neganai ia davaria, unuseniai idia noho taudia ibounai, idia momo be Iehova ena Witnes taudia, be idia heau vadaeni. Unai dainai, idia rakatania rumana ta dekenai ia noho. Gaukara be lasi dainai, ruma lalonai ia davaria bukadia haida ia abia bona ia duahia matamaia. Idia be Watch Tower buka bona magasin, Witnes taudia ese idia rakatania gaudia. Sibona ia noho dainai, unai tau matamata be mai ena nega ia duahia gaudia do ia lalohadailaia totona. Ena lalona ia hadaia ena mauri do ia haidaua bona ena tuari kohu do ia rakatania. Daudau lasi murinai, Witnes taudia ia davaria bona Baibel stadi ia karaia matamaia. Hua 6 lalonai, sivarai namona be ma haida dekenai ia herevalaia. Ia bona ena ruma bese taudia toi, guna unai tuari oreana idia durua taudia, be hari bapatiso Keristani taudia.

Namo Ia Havaraia Danu

Ena be mauri ia auka momokani, to unai tuari ese taunimanima edia lalohadai haroro gaukara dekenai ia haidaua. Elda ta, unai hekwakwanai ia matamaia siti amo, ia gwau: “Tuari ia vara bena dina ima murinai, dala ai karaia siti lalonai bona murinai haroro gaukara do ai karaia. Taunimanima idia ura bada ai idia kamonai henia. Baibel buka bona magasin momo ai hariharilaia bona Baibel stadi momo ai hamatamaia. Gabu ta dekenai, momo be hereva momokani idia dadaraia, to tuari dainai, hari idia kamonai, Baibel idia stadilaia, bona hebou bona hebouhebou dekenai idia lao.”

Tadikaka idia moale badina ena be tuari ia vara to edia tiokratik gaukaradia idia do karaia noho. Gavamani bona EZLN taudia idia diba edia hebouhebou idia abia noho, bona unai ese lauma dalanai idia ia hagoadaia. Loaloa naria taudia ese idia vadivadi henia karana danu ese idia ia hagoadaia haroro gaukara idia karaia totona. Hoa gauna be, unai tuari lalonai idia noho taudia danu, ese nega momo Witnes taudia idia hagoadaia edia haroro gaukara idia karaia noho totona.

Ena be Chiapas dekenai idia noho taudia ese idia haheaukalaia hahetoho bona mauri aukana be nega ia hanaia lalonai ia ore sisina, to ia doko lasi. To, gau tamona ia momokani​​—⁠Iehova ena Witnes taudia ese edia lalona idia hadaia, do idia hekwarahi noho maino sivarai namona Dirava ena Hereva, Baibel, amo be taunimanima ibounai dekenai do idia abia lao. (Kara 10:​34-​36; Efeso 6:​15) Idia abia dae peroveta tauna Ieremia ena hereva be momokani, ia gwau, “taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Dirava ena Basileia sibona, ena natuna Iesu Keriso ese ia lohiaia gauna, ese tanobada ena kara gagevagageva bona ogogami do ia haorea diba.​​—⁠Mataio 6:​10.

[Map on page 9]

(For fully formatted text, see publication)

Gulf of Mexico

CHIAPAS

GUATEMALA

Pacific Ocean

[Credit Line]

Mountain High Maps® Copyright © 1997 Digital Wisdom, Inc.

[Picture on page 9]

Chiapas ena ororo gabuna dekenai, Witnes taudia be haroro gaukara totona idia lao