Turadia Edia Lalo-Ani Karadia Idia Dadaraia Dalana

MATAMATA taudia momo idia ura ma haida ese idia ura henidia dainai, edia turadia edia lalohadai bona kara idia badinaia. Matamata taudia be hadikaia karadia, hegeregere drag ania karadia bona matabodaga karadia, idia dadaraia totona goada idia abia be namo. Edena dala ai turadia edia lalo-ani karadia do idia dadaraia?

Poland ai, matamata kekenidia rua be inai bamona idia gwau: “Inai tanobada ena lauma be aiemai turadia momo ese idia hahedinaraia. Edia sikuli gaukara ai idia koikoi, hereva mirodia idia gwauraia, bona idia ese dabua mai sitaelo idauna bona matabodaga miusiki dikadia idia ura henia. Ai moale badina ai matamata taudia idia durua herevadia ai abia bona unai ese idia kara kava noho bona idia gwau-edeede matamata taudia edia lalo-ani karadia amo ai idia gimaia!

“Hereva amo aiemai tanikiu bada herea Gima Kohorona ena hagoadaia herevadia dekenai be ai hahedinaraia diba lasi, ai idia hadibaia ma haida ese ai matamata taudia idia ura henia bona ai idia laloa bada. Baibel ena sisiba ese ai idia durua aiemai raka dalana ai naria namonamo totona, unai dala amo Iehova Dirava do ai hamoalea noho. Ai abia dae momokani mai kamonai ida Iehova hesiai henia karana be mauri dalana hereadaena.”

Oibe, matamata taudia be turadia edia lalo-ani karadia idia dadaraia diba. Edia “lalona” idia hadibaia karana amo, Keristani matamata taudia be mai aonega ida dala idia abia hidi diba, unai amo “inai tanobada ena lauma” idia hahedinaraia lasi, to “Dirava dekena amo ia mai Lauma” do idia hahedinaraia.​​—⁠Heberu 5:​14; 1 Korinto 2:​12.