Dika Ita Davaria Diba
“Dina ta ta ai oi karaia gaudia ibounai lalonai—mahuta lalonai danu—mase ia vara diba dainai, herevana dahaka oi karaia unai be oi karaia gauna ginigabena ai ia lao diba.”—Discover magasin.
MAURI be bomu momo idia guria tanona ai oi raka noho karana ida idia hahegeregerea, badina be ita diba lasi negana ai bero eiava mase ia vara diba bona nega momo unai ia vara haraga. Tano idauidau dekenai dika havaraia gaudia be idauidau. Unai gaudia haida be, motuka aksiden, tano tamona taudia idia tuari heheni, hitolo, AIDS, kensa gorerena, kudou gorerena, bona ma gau momo herea. Hegeregere, U.S. News & World Report ia gwau Sahara ena saut kahana, Africa dekenai, AIDS be taunimanima hamasea gauna badana, bona vanegai lagani ta ai “taunimanima milioni 2.2 idia mase, unai be Africa ibounai dekenai tano tamona taudia idia tuari heheni neganai idia mase taudia edia namba be nega 10 amo ia hanaia momokani.”
Unai nega lalonai, taunimanima be moni bilioni momo idia negea edia mauri idia halataia toho totona bona gorere bona tauanina ena kahana ta hadikaia karadia idia koua totona. Idia gwauraia lalohadaidia momo, hegeregere aniani bona inua gaudia laloa namonamo bona eksasais, ese namo ia havaraia diba. To, mauri lalonai gau badadia iboudiai ia herevalaia namonamo gauna ta ia noho, bona unai ese oi ia durua diba mauri namona oi moalelaia totona. Unai gauna be Baibel. Ia lalonai idia noho hakaua herevadia be ita laloa bada gaudia, iseda tauanina bona noho dalana dekenai mai anina bada gaudia unai, ita hanamoa diba totona. Oibe, Baibel be hekwakwanai idauidau iboudiai ia herevalaia lasi. To, iena hakaua herevadia hereadaedia ese kara idauidau, hegeregere aniani, tauanina ena goada, laloa dalana, mahuta hebou karana, kekero muramura inua karana, kuku, bona idia gwauraia moale karadia totona drag idia ania, bona ma gau haida dekenai ita ia gimaia diba.
Danu, taunimanima momo be moni ena kahanai idia daradara bada dainai idia lalo-metau. Unai neganai danu, Baibel be ita ia durua gauna. Ia be aonega dalana dekenai moni ita laloa bona gaukaralaia dalana ia gwauraia sibona lasi, to danu ia hahedinaraia edena bamona gaukara tauna namona bona gaukara biagua tauna namona ai ita lao diba. Ita gwau diba Baibel be ita ia gimaia gauna namona, moni gaukaralaia namonamo bona tauanina naria namonamo karana ai sibona lasi, to mauri dekenai danu. Oi ura oi itaia edena bamona hari inai negai Baibel be mai anina bada, a? Vadaeni, mani hereva gabedia oi duahia noho.