Kenya Dekenai Kara Namo Taudia Idia Tahua

KENYA ena tano be mai ena hairai bada herea. Uda bada herea, taora badadia, ia siahu bada tano kaukau gabudia, bona sinou ese ia koua ororodia ese unai tano namona idia hanamoa. Unai be wildebeest milioni momo bona kahirakahira idia hamasea ore raino edia noho gabuna. Ta ese danu giraffe momo ia itaia diba, rei gabudia dekenai idia hanai lao noho.

Ataiai idia roho mauri gaudia danu be momo herea, ia roho mai ena goada ida ugava amo ela bona ane idia abia manudia mai edia kala idauidau momo herea, unai gabu be edia miusiki namodia amo ia honu. Bona daika ese idia noho elephant bona laiona do ia laloa lasi? Kenya ena toana bona rege idauidau be do oi laloaboio diba lasi.

To, unai tano mai hairaina ibounai lalonai rege idauna ta idia kamonai. Unai be helaro sivaraina idia gwauraia noho gado rege tausen momo. (Isaia 52:⁠7) Unai gado regedia be idia lao noho taunimanima edia iduhu bona gado idauidau 40 dekenai. Unai dala ai, Kenya be lauma dalanai hairai bada herea tanona danu.

Kenya taudia momo be tomadiho idia laloa bada taudia bona idia ura lauma gaudia idia herevalaia. Ena be idia be unai bamona, to taunimanima davaria bona hereva henia totona be mai ena hekwarahi, Kenya be tano haida bamona, ena noho dalana ia haidaua noho.

Moni hekwakwanai ese momo ia doria edia mauri dalana idia haidaua totona. Vaia, ruma dekenai idia gaukara hahine be hari idia gaukara opesi dekenai eiava dala badinai au huahua, uma aniani, gwarume, bona idia turia bosea idia hoihoilaia. Tatau ese edia ruma bese naridia totona hora momo lalonai idia gaukara. Natudia danu, edia imana maragidia be gabua pinati paketi bona nadua gatoi amo idia honu, bona dala dekenai idia raka lao edia gau idia hoihoilaia totona. Anina be dina lalonai ruma dekenai taunimanima haida sibona idia noho. Unai noho dalana dainai Basileia ena sivarai namona idia harorolaia taudia ese gau haida idia haidaua be namo.

Iehova ena Witnes taudia edia kongregesen idia hadibadia namona be idia hekwarahi ruma murimuri ai edia gaukara idauidau idia karaia noho taudia, bona edia turadia, varavara, bisinesi taudia, bona gaukara turadia idia haroro henidia totona. Bona tadikaka be unai bamona idia karaia, gabu idauidau dekenai idia davaria taudia idia hereva henia. (Mataio 10:11) Edia hekwarahi unai kara habadaia totona ese anina namona ia havaraia, a? Oibe, ia havaraia! Mani haheitalai haida ita laloa.

Varavara​​—⁠Ita Kahirakahira Idia Noho Taudia

Kenya ena siti badana, Nairobi, dekenai taunimanima milioni toi bamona idia noho. Unai siti ena ist kahana dekenai ia ritaea vadaeni ami tauna badana ia noho, bona ia be nega daudau Iehova ena Witnes taudia ia inai henia, bona ia lalohisihisilaia gauna be iena natuna mero be Witnes tauna ta. February ta lalonai, ia ritaea vadaeni ami tauna be kilomita 160 bamona ia lao ena natuna ena ruma Rift Valley ena taoni Nakuru dekenai. Iena vadivadi lalonai, natuna mero ese ia dekenai harihari gauna ia henia​—⁠Diba ese Mauri Dekenai Ita Ia Hakaua Lao bukana.* Tamana ese ia abia bona ia lao.

Iena ruma dekenai, unai guna ami dekenai ia gaukara tauna ese unai buka ia henia iena adavana dekenai, bena ia duahia matamaia, ia diba lasi Iehova ena Witnes taudia ese idia halasia. Metairametaira, Baibel ena hereva momokani ese ena kudouna ia hamarerea, bona unai hereva be iena tau ida ia kikilaia. Ia diba totona, ia danu ese unai buka ia duahia matamaia. Idia diba daika ese unai buka ia halasia neganai, idia laloa hereva momokani Iehova ena Witnes taudia dekenai idia hadibaia lasi. Edia gabu dekenai idia noho Witnes taudia idia hereva henia, bona Baibel stadi idia hamatamaia. Idia sibodia ese unai buka idia duahia karana amo idia lalo-parara, kuku ania eiava hoihoilaia be Keristani karana lasi. (Mataio 22:39; 2 Korinto 7:⁠1) Idia naria lasi, to edia sitoa lalonai idia noho kuku ibounai idia hadikaia. Hua haida murinai, idia hegeregere bapatiso lasi pablisa taudia ai idia lao totona, bona daudau lasi murinai distrik hebouhebou dekenai idia bapatiso.

Momoru Lalonai Kohu Namona Ia Noho

Siti badana ena distrik haida lalonai, idia tubu noho hanuadia dekenai taunimanima handred tausen haida idia noho. Unuseniai tano, au, auri momoru eiava tini auri amo idia karaia rumadia momo idia noho. Bisinesi bona faktori lalonai gaukara be momo lasi neganai, taunimanima be sibodia edia gaukara ta idia karaia. Jua kali (Swahili gado dekenai “dina ena siahu goadana”) gaukara taudia be dina ena siahu dekenai idia gaukara, motuka ena taea gunadia amo tamaka idia karaia eiava idia negea tini amo kerosini lamepa idia karaia. Haida be momoru haboua gabudia bona momoru baketi dekenai pepa, tini, bona kavabu idia tahua idia gaukaralaidia lou totona.

Momoru lalonai kohu namona ia noho diba, a? Oibe! Tadikaka ta ia gwau: “Ia goada bona ena dabua toana ia namo lasi tauna ta be idia negea niuspepa bona magasin amo ia honu plastik baege badana ia huaia bona ia mai aiemai Assembly Hall gabuna dekenai. Lau ia hamaoroa iena ladana be William murinai, ia henanadai: ‘Oi dekenai Gima Kohorona matamatadia idia noho?’ Lau laloa noho, ia be dahaka ia karaia gwauraia. Ia dekenai magasin ena kopi ima lau hahedinaraia neganai, idia ta ta ia itaia bona ia gwau: ‘Ibounai do lau abia.’ Lau hoa, lau lao egu daiutu dekenai Mauri Hanaihanai Paradaiso Lalonai bukana lau abia mai.a Ia dekenai paradaiso ena laulau lau hahedinaraia bona lau hadibaia ai be taunimanima ida davana lasi Baibel stadi ai karaia. Bena lau nanadaia: ‘William, kerukeru oi mai bona stadi do ita hamatamaia be namo, ani?’ Unai bamona ia karaia!

“Sunday ta ia mai iena hebou ginigunana dekenai. Unai dina dekenai lau be pablik tok lau henia noho. William ia raka vareai neganai, idia helai taudia ia itaia, lau ia itaia platfom dekenai, bona hebou gabuna amo ia heau murimuri. Unai dina murinai lau nanadaia dahaka dainai unai bamona ia karaia. Mai hemarai ida ia haere: ‘Unai taunimanima be idia goeva momokani. Lau gari.’

“William ena stadi karana ia goada ia lao neganai, Baibel ena hereva momokani ese ena mauri ia haidaua matamaia. Ia digu, ena huina ia utua, dabua goeva bona namona ia atoa, bona daudau lasi murinai hebou dekenai ia mai hanaihanai. Bena Diba ese Mauri Dekenai Ita Ia Hakaua Lao bukana idia halasia neganai, unai ai stadilaia matamaia. Unai nega lalonai, Tiokratik Haroro Sikuli dekenai tok rua ia henia bona bapatiso lasi pablisa tauna ai ia lao. Dina tamona hebouhebouna dekenai ia bapatiso neganai, lau be mai moale ida ia lau welkam henia lauegu lauma tadikaka bamona.”

William be nega ginigunana Gima Kohorona magasin ena namo be edeseniai ia itaia? Ia gwau: “Magasin haida be idia negea pepa momoru huanai lau davaridia.” Oibe, dala idauna ai kohu namona ia davaria!

Gaukara Gabunai Idia Haroro

Ita be gaukara gabuna dekenai hanaihanai dala ita tahua nega bona dala idauidau ai ita haroro totona, a? James, Nairobi kongregesen ena elda tauna ta, be unai dala amo Baibel ena hereva momokani ia dibaia. Gabeai, unai dala ai ma haida ia hereva henia karana dekenai ia manada. Hegeregere, nega ta, James ia itaia ena gaukara turana ta be opesi dekenai ia vareai bona ena dabua dekenai kadi ta mai ena hereva “Iesu ese Ia Hamauria” ia noho. James ese evanelia gaukara tauna Filipi ia tohotohoa, ia danu ia gaukara tauna ia nanadaia: “Unai hereva ena anina oi lalo-pararalaia, a?” (Kara 8:30) Unai henanadai ese dala ia kehoa bona idia herevahereva namo herea. Baibel stadi idia matamaia, bona unai tauna be gabeai bapatiso ia abia. James be ma haida hadibaia karana dekenai ia kwalimu, a? Namona be ita do ia hadibaia:

“Lau bona Tom be kampani tamona dekenai ai gaukara. Nega momo aiemai gaukara basi dekenai nega tamona ai guia. Daba ta, ai be gabu tamona dekenai ai helai hebou. Lau be iseda buka ta lau duahia noho, bona lau dogoatao Tom ese do ia itaia namonamo diba totona. Lau laloa hegeregerena, iena lalona ia veria, bona mai moale ida egu buka lau henia ia dekenai. Ia duahia gaudia ia ura henia momokani bona Baibel stadi ia abia dae. Hari ia bona ena adavana be Iehova ena bapatiso hesiai taudia.”

James ma ia gwau: “Hanaihanai emai kampani dekenai dina tubu laga-ani neganai, ai herevahereva namo herea. Unai bamona negadia ai, Ephraim bona Walter lau hedavari henia. Idia ruaosi idia diba lau be Witnes tauna ta. Ephraim ia ura ia diba dahaka dainai taunimanima momo ese Iehova ena Witnes taudia idia dagedage henia bada. Walter be mai ena henanadai, Witnes taudia bona tomadiho ma haida edia idau dekenai. Buka Helaga amo lau henia haere idia moalelaia bona stadi idia abia dae. Ephraim be lauma dalanai ia tubu haraga. Gabeai, ia bona iena adavana ese edia mauri idia gwauhamatalaia Iehova dekenai. Hari ia be elda tauna ta, bona iena adavana be regula painia. Walter be dagedage bada ia davaria dainai ena stadi bukana ia negea. Lau lao loulou dainai, ena stadi ia karaia lou. Ia danu be elda tauna ena gaukara ena hahenamo ia abia bona ia moalelaia.” James be nega bona dala idauidau ai gaukara gabunai ia haroro dainai, taunimanima 11 be Keristani taudia momokani ai idia lao.

Gau Idauna ta Ia Vara

Lake Victoria ena kone badinai ia noho hanua maragina ta dekenai, turadia bona varavara be mase tauna guria totona idia hebou. Witnes tau burukana ta be unai taitai taudia edia huanai. Sikuli tisa ta, ladana Dolly, dekenai ia lao bona ia dekenai dahaka ia vara mase taudia dekenai bona Iehova ena ura, mase do ia haorea ela bona hanaihanai, ia gwauraia hedinarai. Hereva ia kamonai namonamo dainai, ia gwau: “Oiemu hanua dekenai oi giroa neganai, aiemai misinari ta do ia mai oi dekenai bona oi dekenai Baibel ena hereva do ia hadibaia.”

Kenya ena siti badadia amo, Dolly ena hanua be ihatoina. Unai neganai, misinari taudia hani sibona be unuseniai idia gaukara. Tadikaka burukana be unai misinari taudia ta ia hadibaia lasi Dolly idia vadivadi henia totona. To ia diba momokani do idia vadivadi henia. Bona unai bamona ia vara! Daudau lasi murinai, misinari taihu ta ese Dolly ia hedavari henia bona ia ida stadi ia hamatamaia. Hari Dolly ia bapatiso vadaeni, iena natuna kekeni maragina be Tiokratik Haroro Sikuli dekenai ia vareai, bona iena natuna memero rua be idia bapatiso vadaeni danu. Ia be mai moale ida Painia Gaukara Sikuli dekenai ia lao vadaeni danu.

Ia Tubu Noho Oreana Idia Naria

Nega bona dala idauidau ai haroro gaukara goadalaia karana ese Kenya dekenai taunimanima tausen momo ia durua sivarai namona idia kamonai henia totona. Hari pablisa taudia 15,000 be unai mai anina bada gaukarana idia karaia noho, bona vanegai laganina lalonai, taunimanima 41,000 ia hanaia be Keriso ena mase ena Memorial hebouna dekenai idia lao. Kenya ena gabu ibounai dekenai, nega momo hebou dekenai idia lao taudia edia namba be Basileia pablisa taudia edia namba be nega rua amo idia hanaia. Unai dainai Kingdom Hall ma haida idia abia be namo.

Kingdom Hall be siti badadia bona gabu daudaudia ai idia haginia. Nairobi oi rakatania bona notist kahana dekenai oi lao kilomita 320 bamona murinai, gabu daudau dekenai ia noho taoni ta, Samburu, oi davaria. Lagani 1934 lalonai, unai taoni ena ladana idia gwauraia Maralal, Samburu gado ai ena anina be “diaridiari,” badina unuseniai idia gaukaralaia tini guhi ginigunana be dina dekenai ia diaridiari. Lagani 62 murinai, Maralal dekenai tini amo idia karaia guhi ena ruma ma ta idia karaia. Unai danu ia “diaridiari” badina ia be tomadiho momokani gabuna.

Pablisa taudia 15 idia hekwarahi bada Kenya ena gabu daudauna dekenai Kingdom Hall ginigunana idia haginia totona. Moni ia hegeregere lasi, unai dainai edia gabu dekenai idia noho gaudia idia gaukaralaia. Tano kakakaka amo haba idia karaia, ranu amo idia haparia bona idia haginia au huana ai idia atoa auka. Haba dekenai boromakau ena kukuri bona lahi ena kahu amo idia mikisia plasta idia atoa, bona unai gauna ia auka bona lagani momo lalonai do ia noho.

Ruma haginia au abia totona, tadikaka be gwaumaoro pepana idia abia au idia utua totona. To kahirakahira ia noho uda ena daudau be kilomita 10 bamona. Tadikaka bona taihu idia raka lao uda dekenai, au idia utua, au ena rigi idia utua oho, bena unai au idia huaia lao ruma idia karaia noho gabuna dekenai. Nega ta, uda amo idia lao noho neganai, pulisi taudia ese tadikaka idia koua, idia gwau edia gwaumaoro pepana be maoro lasi. Pulisi taudia ese spesel painia tadikaka idia hamaoroa au ia utua dainai ia do idia dogoatao. Taihu ta, unai gabu ai idia noho taudia momo bona pulisi ese idia diba vadaeni taihuna, ia hereva ia gwau: “Bema aiemai tadikaka oi dogoatao, ai ibounai danu oi dogoatao be namo, badina ai ibounai ese au ai utua diho!” Opesa ese idia ibounai ia ruhaia.

Unuseniai uda lalonai dagedage animal idia noho, unai dainai unuseniai idia raka lao be mai ena dika. Dina ta, taihu ta be au ia utua. Tano dekenai ia moru neganai, ia itaia animal ta ia roho bona ia heau. Ena kala sisina ia itaia dainai ia laloa unai be impala, dia ta, to gabeai iena aena gabuna ia itaia bona unai be laiona ena! Ena be unai dika ia noho, to tadikaka ese Kingdom Hall idia karaia haorea, bona Iehova ia hanamoa totona ia gini mai “diaridiari” ida.

February 1, 1963, be dina badana Kenya ena tiokratik histori lalonai. Unai dina lalonai brens opesi ginigunana idia kehoa, daiutu tamona sibona bona ena bada be sikoea mita 7.4. October 25, 1997, be ma dina badana ta Kenya ena tiokratik histori lalonai​—⁠badina Betele rumana matamatana, ena bada be sikoea mita 7,800 idia hahelagaia! Lagani toi lalonai idia hekwarahi bada bona hari edia haginia gaukarana ia ore. Tano idauidau 25 amo idia mai volantia taudia ese kopukopu bona ava amo ia honu tano, ena bada be hectare 3.2, be Betele rumana ia noho uma bamona gabuna mai hairaina ai idia halaoa, bona unuseniai Betele famili taudia 80 idia noho.

Iehova ese iena taunimanima totona ia karaia gauna dainai badina momo idia noho ita moale totona. Iehova ita tanikiu henia badina ena hesiai taudia edia kudouna ia hamarerea dainai edia lalokau idia habadaia bona Kenya dekenai kara namo taudia idia tahua goadagoada, bona unai amo lauma dalanai hairai tanona ai idia halaoa.

[Footnote]