Ogogami Hanaia Tuarina Lalonai—Do Idia Kwalimu, A?

NEW YORK CITY dekenai, United Nations idia vadivadi henia loaloa taudia ese Economic and Social Council Chamber idia itaia bona ia lalonai taunimanima idia raka loaloa diba daiutu badana ena guhi dekenai idia hedinarai paipa idia itaia danu. Loaloa ia hakaua tauna ia gwau: “ ‘Idia haorea lasi guhi’ ese laulau dalanai ia hahedinaraia United Nations edia moni bona bese naria daladia idia haorea diba lasi; hanaihanai gaukara haida do idia noho tanobada taudia edia noho dalana idia hanamoa totona.”

Ena be unai Council ia gaukara goada taunimanima iboudiai ese mauri dalana namona idia abia totona, to toana be edia gaukara ia ore diba lasi. To, aposetolo edia nega lalonai, Iesu Keriso be tanobada dekenai ena hesiai gaukara ia karaia neganai, ia gwau: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia.” (Luka 4:18) Ia gwauraia hedinarai “sivarai namona” be dahaka? Unai be Iehova Dirava, “ogogami taudia edia hunia gabuna . . . idia hisihisi neganai,” ese King Iesu Keriso ia lohia Basileiana do ia haginia ena sivarai. Unai Basileia ese dahaka do ia hagugurua? Isaia ia peroveta, ia gwau: “Siahu Ibounai Lohiabada ese tanobada ena bese idauidau ibounai totona aria do ia karaia. Inai aria dekenai be aniani namodia momokani, bona uaina danu namo herea. Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​​—⁠Isaia 25:​4-6, 8.

Dirava ena Basileia ese ‘tanobada taudia edia noho dalana do ia hanamoa,’ ela bona edia dabu gauna ta be lasi dalana oi ura diba, a? Mani henunai ia noho herevana oi itaia, bena do oi diba dahaka oi karaia be namo, ia manada hadibaia tauna ta ese oi ia vadivadi henia bona Baibel ese unai gaudia ia gwauraia dalana be oi dekenai ia hahedinaraia totona.