Oi Moale Momokani Diba, A?

GEORGE be mai ena kiri danu taunimanima ibounai ia hedavari henia. Ia laloa mauri be harihari gauna bona ia moalelaia be namo. Iena kara korikori be ia moale bona ia laloa gau namona ta do ia vara​​—⁠ena be buruka ena hisihisi ia davaria matamaia, to unai kara ia habadaia. Ela bona ia mase, George idia gwauraia moale tauna. Oi be George bamona oi moale, a? Oi laloa dina matamata ta ta be harihari gauna dainai, oi moalelaia be namo, a? Eiava dina matamata dainai oi lalo-hesiku eiava oi lalo-hekwarahilaia? Gau ta ese emu moale ia hadikaia, a?

Haida idia gwau moale ena anina be lalona ai ia noho daudau hemami namona. Moale ia hedinarai toana be nega haida hemami namona ia noho bona nega haida moale bada herea ia noho bona vaia ita ura unai hemami ia ore lasi. Unai bamona moale ia noho momokani diba, a?

Hari, taunimanima ese idia habadaia lalohadai be moale do idia davaria diba bema edia kohu be bada. Taunimanima milioni momo idia hekwarahi bada idia taga totona. Unai idia karaia neganai, momo ese hetura karana bona mai anina bada gaudia ma haida idia haboioa. Idia be dimairi momo herea bamona, idia heau lao heau mai haraga noho, bona nega be lasi edia kara ena anina eiava ma ta idia laloa totona. Unai dainai, Los Angeles Times ena ripoti ta ita lalo-pararalaia diba, ia gwau: “Doketa taudia idia davaria lalo-metau taudia edia namba be ia bada daekau noho bona [lalo-metau] idia davaria matamaia taudia momo be matamata taudia. . . . Lalo-metau hamaragia muramura be kampani ese idia hoihoilaia gauna badana.” Taunimanima milioni momo be drag dikadia idia ania eiava kekero muramura idia inua edia hekwakwanai idia haorea toho totona. Haida be lalo-metau ena mamina idia abia neganai, moni bada herea idia negea kava. Britain niuspepa ta The Guardian ia gwau tahua gaukarana ta lalonai, “hahine momo be edia lalona idia hanamoa totona, gau ta idia hoia. Idia lalo-metau neganai, sitoa dekenai idia lao hahine edia namba ese tatau edia namba be nega toi amo ia hanaia.”

To, moale korikori be sitoa ta , kavabu ta, muramura ta, kodoa gauna, eiava banika ena akaun ta ai oi davaria diba lasi. Moale be oi hoia diba lasi, ia be davana lasi. Unai bamona harihari gauna namona be edeseniai ita davaria diba? Unai be hereva gabena ai do ita herevalaia.