Dirava Ena Hoa Karadia Oi Laloa
“Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi.”—SALAMO 40:5.
1, 2. Dahaka gaudia ese Dirava ena kara namodia idia hamomokania, bona unai ese ita ia hagoadaia dahaka do ita karaia totona?
BAIBEL oi duahia neganai, karaharaga do oi itaia Dirava ese ena idaunegai bese taudia, Israela, totona gau namodia momo ia karaia. (Iosua 3:5; Salamo 106:7, 21, 22) Ena be hari Iehova ese taunimanima edia mauri lalonai unai bamona karadia ia karaia lasi, to gabu ibounai dekenai iena kara namodia idia hamomokania gaudia momo ita itaia diba. Unai dainai badina namona ia noho salamo torea tauna ida do ita gwau: “Lohiabada e, oi ese gau ibounai oi karaia vadaeni. Mai oiemu aonega bada danu idia ibounai oi karaia. Inai oi ese oi karaia gaudia ibounai ese, inai tanobada idia hahonua momokani.”—Salamo 104:24; 148:1-5.
2 Hari, taunimanima momo ese Havaraia Tauna ena gaukara idia hamomokania gaudia idia laloa lasi eiava idia dadaraia. (Roma 1:20) To, unai gaudia ita laloa be namo bona unai amo Havaraia Tauna vairanai iseda maduna be dahaka do ita diba. Iobu karoa 38 ia lao 41 ai ese ita idia durua bada unai bamona do ita karaia totona, badina unai karoa lalodiai Iehova ese Iobu ia boiria Iena hoa karadia haida do ia laloa totona. Dirava ese ia gwauraia mai anina bada henanadai haida mani oi laloa.
Hoa Karadia mai Siahuna
3. Iobu 38:22, 23, 25-29 dekenai, Dirava ese dahaka gaudia ia henanadailaia?
3 Nega ta, Dirava ese Iobu ia henanadai henia, ia gwau: “Oi ese nega ta, sinou lau haboua gabudia dekenai oi vareai, o aisi nadi bamona medu, lau ese lau haboua gabudia oi itaia, a? Unai gaudia be lau ese lau abia hegaegae, do lau gaukaralaia, dika do ia vara neganai, o egu tuari do idia durua totona.” Iseda tanobada ena gabu momo ai, sinou bona aisi nadi bamona medu be hanaihanai idia vara gaudia. Dirava be ma ia gwau: “Daika ese medu ena ranu, ena heau lao dadaira ia geia? Bona guba boiboi bada ena dala, be daika ese ia karaia? Taunimanima idia noho lasi tano dekenai, be daika ese medu ia hadihoa? Daika ese tano kaukau, nadi kavakava gabuna dekenai ranu ia henia, vadaeni rei ia tubu? Medu o paripari be mai edia tamana, a? Aisi, bona paripari ena aisi, be mai edia sinana, a?”—Iobu 38:22, 23, 25-29.
4-6. Dahaka dainai ita gwau diba taunimanima ese sinou idia lalo-pararalaia goevagoeva diba lasi?
4 Idia bisi bada gabudia dekenai idia noho bona idia loaloa taudia haida idia laloa sinou be idia ia koua gauna sibona. To, taunimanima momo idia laloa sinou be gau namona bona keru negana ai moale ia havaraia gauna, badina ma nega idaudia ai idia karaia diba lasi karadia idia karaia. Dirava ena henanadai oi laloa noho neganai, sibona oi nanadaia, sinou oi diba namonamo, eiava ena toana oi diba, a? Momokani, sinou bada herea ena toana ita diba, reana laulau dekenai sinou gabuna ita itaia eiava iseda matana amo sinou bada herea ita itaia vadaeni dainai. To sinou ena kahana maragidia, sinoufleik, be edena bamona? Edia toana oi diba, reana edia vara gabuna dekenai oi stadilaia namonamo vadaeni, a?
5 Tatau haida ese lagani momo lalodiai sinoufleik idia stadilaia bona edia laulau idia abia. Sinoufleik tamona lalonai reana aisi maragimaragidia 100 idia noho, bona edia toana be mai hairai bona idauidau. Buka ta, Atmosphere, ia gwau: “Sinoufleik ta ta edia toana be idauidau, bona ena be saiens taudia idia gwau taravatu ta ese toana tamona havaraia karana ia koua lasi, to edia toana be tamona sinoufleik rua idia do davaria lasi. Tahua karana badana ta be . . . Wilson A. Bentley ese ia karaia, lagani 40 lalonai maikroskoup amo sinoufleik edia laulau ia abia bona ia stadilaia, to edia toana be tamona gaudia rua ia davaria lasi.” Bona, bema nega ta, toana tamona gaudia rua idia davaria, ita hoalaia gauna, sinoufleik edia toana idauidau be momo herea, do ia haidaua lasi, ani?
6 Mani Dirava ena henanadai oi laloa lou: “Oi ese nega ta, sinou lau haboua gabudia dekenai oi vareai?” Momo idia laloa ori be sinou haboua gabudia. Oi be unai bamona haboua gabudia dekenai oi lao diba, sinoufleik oi duahia bona idia vara dalana oi stadilaia totona, a? Saiens ensaiklopidia ta ia gwau: “Aisi ia havaraia gauna maragina tamona, ori ena ranu be -40°C ai aisi ai do idia lao totona ia be mai anina bada gauna, to ena anina bona ena matamaia dalana idia do lalo-pararalaia goevagoeva lasi.”—Salamo 147:16, 17; Isaia 55:9, 10.
7. Taunimanima edia diba medu dekenai ena bada be edena bamona?
7 Medu be edena bamona? Dirava be Iobu ia nanadaia: “Medu o paripari be mai edia tamana, a?” Unai saiens ensaiklopidia be ma ia gwau: “Hodahoda ena heau daladia be momo herea, bona hodahoda lalonai paripari bona kahana maragidia be idauidau dainai, toana be ori, sinou, medu, bona unai bamona gaudia edia vara dalana edia sivarai ita gwauraia be ia auka.” Ita lalo-pararalaia diba dalanai, saiens taudia be lalohadai momo idia gwauraia, to medu ena badina idia gwauraia hedinarai goevagoeva diba lasi. To, oi diba medu ia diho, tanobada ia haparia, tubutubu gaudia ia haparia, bona ia dainai mauri ia vara bona ita moalelaia diba.
8. Dahaka dainai ita gwau diba Paulo ena hereva Kara 14:17 dekenai be maoro?
8 Aposetolo Paulo ia abia lalohadai oi abia dae danu, a? Ia ese ma haida ia hagoadaia unai hoa karadia idia itaia, badina idia ese karaia Tauna ena kara do idia hahedinaraia. Paulo ese Iehova Dirava be inai bamona ia gwauraia: “To ia ese taunimanima dekena amo ia hunia lasi. Lasi, ia ese iena noho ia hamomokania noho, iena kara namodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.”—Kara 14:17; Salamo 147:8.
9. Dirava ena hoa karadia ese edena dala ai iena siahu bada hereana idia hahedinaraia?
9 Unai hoa bona mai anina karadia ia karaia Tauna ena aonega bona siahu be bada herea momokani bona unai ita daradaralaia diba lasi. Ena siahu ita lalo-parara totona, mani inai oi laloa: Idia gwau lai gubadia 45,000 be dina ta ta ai idia vara, lagani ta lalonai milioni 16 idia vara. Unai ena anina be lai gubadia 2,000 bamona be harihari idia vara noho. Lai gubana idia havaraia ori edia siahu be Tanobada Ibounai Tuarina Iharuana ai idia negea niuklia bomu 10 o ma haida edia siahu hegeregerena. Unai siahu haida oi itaia diba, ia be kevaru. Kevaru goadana be hoa gauna sibona lasi, to ia vara neganai naitrojen ia siaia lao tano lalonai, bona tubutubu gaudia ese idia abia edia aniani bamona. Unai dainai kevaru ese siahu ia hahedinaraia, to namo ia havaraia danu.—Salamo 104:14, 15.
Ena Anina Oi Dekenai be Dahaka?
10. Iobu 38:33-38 dekenai idia noho henanadai be edena bamona do oi haerelaia?
10 Mani oi laloa oi be Iobu, bona Siahu Ibounai Diravana ese oi ia henanadai henia. Reana oi abia dae taunimanima momo ese Dirava ena hoa karadia idia laloa lasi. Iehova ese Iobu 38:33-38 dekenai ita duahia henanadai ia henia ita dekenai. “Guba ena taravatudia be oi diba, a? Unai taravatudia, be tanobada dekenai oi gaukaralaia diba, a? Oiemu gadona oi habadaia diba, ori dekenai do oi boiboi, ranu momo ese oi dekenai do ia moru totona, a? Oi ese kevaru ena lahi oi siaia lao diba, a? Vadaeni oi dekenai do idia mai, do idia gwau, ‘Ai mai inai, oiemu hesiai gaukara totona.’ Daika ese taunimanima edia kudouna dekenai, aonega ia henia? Daika ese taunimanima edia lalona dekenai, diba bada ia henia? Daika be mai ena aonega, vadaeni ori ibounai do ia duahia diba, a? Bona guba ena ranu be daika ese ia habubua diho? Unai bamona medu ese kahu ia ha-aukaia, kopukopu be nadi bamona idia lao.”
11, 12. Edena gaudia idia hamomokania Dirava be hoa gaudia ia karaia Tauna?
11 Ita be Elihu ese Iobu dekenai ia herevalaia gaudia haida sibona ita itaia, bona Iehova ese Iobu dekenai ia henia henanadai haida, ia boiria “tau korikori bamona” do ia haerelaia henanadai, ita laloa vadaeni. (Iobu 38:3) Ita gwau “haida” badina Iobu karoa 38 bona 39 lalonai, Dirava ese ia havaraia gaudia ma haida ia herevalaia. Hegeregere, ia ese guba hisiu oreadia ia herevalaia. Daika ese edia taravatu ibounai ia diba? (Iobu 38:31-33) Iehova ese Iobu dekenai animal haida ia herevalaia—laiona, bona galo, ororo nanigosi bona uda doniki, uda boromakau bona kokokoko, hosi mai goadana bona ugava ia herevalaia. Dirava ese Iobu ia nanadaia bema unai animal idauidau edia kara ia henia, idia mauri bona idia hutuma idia lao totona. Reana unai karoa be mai moale ida oi stadilaia, bema oi ese hosi eiava animal ma haida oi ura henia.—Salamo 50:10, 11.
12 Oi ese Iobu karoa 40 bona 41 oi tahua diba danu, unuseniai Iehova be animal rua ia herevalaia bona ma nega ta Iobu dekenai henanadai ia henia. Unai be hippopotamus (Behemoto), ena tauanina bona goada be bada momokani animal, bona Naila sinavai dekenai ia noho gari havaraia huala (Leviatano). Idia ta ta edia kara ese ia hahedinaraia havaraia gaudia be hoa dalanai ia karaia bona idia ita laloa be namo. Hari do ita itaia unai amo dahaka ita dibaia be namo.
13. Dirava ena henanadai dainai Iobu be dahaka ia karaia, bona unai gaudia edia anina ita dekenai be dahaka?
13 Iobu karoa 42 dekenai, Iobu ena lalohadai, Dirava ia henanadai henia dainai, ia hahedinaraia. Guna, Iobu ese ia sibona bona ma haida ia laloa momo. To, Dirava ena henanadai dekenai ia hedinarai sisiba ia abia dae, bona ena laloa dalana ia haidaua. Iena kerere ia gwauraia hedinarai, ia gwau: “Lau diba oi [Iehova] be gau ibounai oi karaia diba, bona oi ura karaia gaudia, be gau ta ese ia koua diba lasi. Oi ese lau oi nanadaia, oi gwau, ‘Oi be daika, egu aonega oi maumauraia noho?’ Momokani, Lohiabada e, lau hereva kerere vadaeni, badina be egu diba ia maragi. Unai dainai, lau herevalaia gaudia, be lau diba namonamo lasi. Hoa gaudia, lauegu diba idia hereaia gaudia, lau herevalaia kava.” (Iobu 42:2, 3) Oibe, Iobu ese Dirava ena gaukara ia laloa murinai, ia gwau unai gaudia be iena diba idia hereaia. Dirava ia havaraia gaudia namodia ita herevalaia murinai, ita danu be Dirava ena aonega bona siahu ita hoalaia be namo. Dahaka totona? Iehova ena siahu bona ia karaia diba gaudia ita laloa bada totona sibona, a? Eiava kara ma haida ita karaia be namo?
14. Dirava ena hoa karadia dainai, Davida be dahaka ia gwau?
14 Salamo 86 ai, Davida ese unai bamona herevadia ia gwauraia, to salamo gunana ta dekenai ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho. Dina ta ese, ia murinai dinana dekenai, Dirava ia herevalaia noho. Hanuaboi ta ese, ia murinai hanuaboina dekenai, Dirava ena aonega ma ia herevalaia.” (Salamo 19:1, 2) To Davida be gau ma haida ia herevalaia. Salamo 86:10, 11 ai, ia gwau: “Badina oi be bada, bona oi ese hoa karadia oi karaia noho. Oi sibona be Dirava. Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” Havaraia Tauna ena hoa karadia ibounai dainai, Davida be ia dekenai ia hoa bada, bona ia gari henia mai ena hemataurai ida. Ena badina oi lalo-pararalaia diba. Davida ia ura lasi unai hoa karadia ia karaia diba Tauna ia habadua. Ita danu be unai bamona ita karaia lasi be namo.
15. Dahaka dainai ita gwau diba Davida be Dirava ia gari henia mai hemataurai ida be maoro?
15 Davida ia lalo-parara Dirava ese siahu bada herea ia biagua dainai, iena lalo-namo idia abia lasi taudia dekenai unai siahu ia gaukaralaia diba. Idia dekenai, unai be dika bada herea. Dirava ese Iobu ia nanadaia, ia gwau: “Oi ese nega ta, sinou lau haboua gabudia dekenai oi vareai, o aisi nadi bamona medu, lau ese lau haboua gabudia oi itaia, a? Unai gaudia be lau ese lau abia hegaegae, do lau gaukaralaia, dika do ia vara neganai, o egu tuari do idia durua totona.” Sinou, aisi, medu, lai, bona kevaru be Dirava ena tuari kohudia. Bona idia be tanobada ena siahu momokani gaudia badadia!—Iobu 38:22, 23.
16, 17. Edena gaudia ese Dirava ena siahu bada hereana idia hahedinaraia, bona guna, unai siahu be edena dala ai ia gaukaralaia?
16 Reana oiemu gabu dekenai ia vara kava dika ta oi laloatao—lai gubana, aisi meduna, eiava abata ese oiemu gabu ia hadikaia. Hegeregere, lagani 1999 ena dokona ai, lai bada herea ese Europe ena sautwest kahana ia hadikaia momokani. Guba ena toana idia stadilaia taudia idia hoa danu. Lai ena siahu hora ta ta lalonai be kahirakahira 200 kilomita ia abia. Unai lai ese ruma guhidia tausen momo ia hadikaia, paua ena waea edia du ia hamorua, bona taraka momo ia hebubu. Mani inai be oiemu lalona ena matana amo oi itaia: Unai lai gubana ese au, milioni 270, ia hadikaia eiava ia kokia, Paris murimurinai ia noho loaloa gabuna Versailles sibona dekenai, au 10,000 ia hadikaia. Ruma milioni momo lalonai paua be lasi. Taunimanima kahirakahira 100 idia mase. Unai ibounai be nega kwadogina lalonai ia vara. Unai be siahu bada herea!
17 Reana ta ia gwau lai badadia be idia vara kava bona ta ese ia hakaua o ia biagua diba lasi gaudia. To, dahaka do ia vara bema siahu ibounai Tauna, hoa karadia ia karaia tauna, ese unai siahu gaudia ia hakaua bona ia biagua? Aberahamo ena negai unai bamona ia karaia. Aberahamo ia dibaia gauna be, tanobada ibounai ia Hahemaoro Henia Tauna ese siti rua, Sodoma bona Gomora, edia dika ena bada ia sikelia vadaeni. Edia kara be dika momokani dainai taunimanima momo edia taitai be Dirava dekenai ia daekau, bona Dirava ese kara maoromaoro taudia ibounai ia durua unai siti rua edia hahemaoro amo do idia heau mauri totona. Unai sivarai ia gwau: “Vadaeni, Lohiabada ese salipa nadi mai lahi bada danu guba dekena amo ia negea diho” unai idaunegai siti rua latanai. Unai be Dirava ena hoa karana ta, kara maoromaoro taudia ia hamauria bona kara dika taudia ia hamasea.—Genese 19:24.
18. Isaia karoa 25 ese dahaka hoa karadia ia herevalaia?
18 Gabeai, Dirava ese idaunegai hanuana Babulonia ia hahemaoro henia, reana Isaia karoa 25 ese unai siti ia herevalaia. Dirava ia peroveta Babulonia be do idia hadikaia momokani, ia gwau: “Oi ese hanua badadia oi hadikaia ore. Edia magu ibounai oi hamakohia ore. Unai idau bese taudia edia king edia ruma be idia boio vadaeni. Do idia haginidia lou lasi ela bona hanaihanai.” (Isaia 25:2) Hari inai negai, Babulonia ena gabu dekenai idia lao loaloa taudia ese unai hereva idia hamomokania diba. Babulonia hadikaia ore karana be ia vara kava karana ta, a? Lasi. Bona Isaia ena lalohadai ita abia dae diba: “Lohiabada e, oi be egu Dirava. Oi do lau matauraia, bona oiemu ladana do lau hanamoa, badina be oi ese hoa kara badadia oi karaia vadaeni. Gunaguna inai gau oi palania, bona mai maoromaoro bona momokani danu oi karadia vadaeni.”—Isaia 25:1.
Vaira Negana ai Hoa Karadia
19, 20. Ita diba Isaia 25:6-8 ena peroveta herevana be edena dala ai do ia guguru?
19 Guna, Dirava ese unai peroveta herevana ia hagugurua, bona vaira negana ai kara namodia do ia karaia danu. Isaia ese Dirava ena “hoa kara badadia” ia gwauraia, bona iena hereva lalonai ita ese ia do vara lasi peroveta herevana ta ita davaria, to do ia guguru, Babulonia ena hahemaoro ia perovetalaia herevana ia guguru hegeregerena. Dahaka ‘hoa karana’ be Dirava ese ia gwauhamatalaia? Isaia 25:6 ia gwau: “Siona Ororo ena latanai, Siahu Ibounai Lohiabada ese tanobada ena bese idauidau ibounai totona aria do ia karaia. Inai aria dekenai be aniani namodia momokani, bona uaina danu namo herea.”
20 Unai peroveta herevana be Dirava ese ia gwauhamatalaia tanobada matamatana dekenai do ia vara, bona unai nega be kahirakahira. Unai neganai, ia ese hari taunimanima momo idia hametaua hekwakwanaidia amo do ia ruhadia. Isaia 25:7, 8 dekenai ia noho peroveta herevana ia hamomokania Dirava ese ena havaraia siahuna do ia gaukaralaia hoa karana bada hereana ta do ia karaia totona: “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore. Ia ese danu iena bese taudia edia hemarai, be tanobada ena kahana ibounai dekena amo do ia kokia, badina be Lohiabada be inai bamona ia hereva vadaeni.” Aposetolo Paulo ese unai siri ia gwauraia lou bona ia gaukaralaia Dirava be mase taudia do ia hamauria, toreisi lou karana unai, ia herevalaia totona. Unai be do ia vara hoa karana badana!—1 Korinto 15:51-54.
21. Dirava ese dahaka hoa karana do ia karaia mase taudia totona?
21 Taunimanima edia mata ranu do ia ore ena badina ma ta be taunimanima edia gorere do idia ore. Iesu be tanobada dekenai ia noho neganai, ia ese gorere taudia momo ia hanamoa—matakepulu taudia edia matana ia kehoa, taia kudima taudia edia taiana ia kehoa, tauanina dika taudia edia tauanina ia hanamoa. Ioane 5:5-9 ia hahedinaraia Iesu ese lagani 38 lalonai ena aena ia dika tauna ia hanamoa. Idia itaia taudia idia hoalaia, idia laloa unai be gaukara namo hereana ta. Bona unai be momokani! To, Iesu ese idia ia hamaoroa, do idia hoalaia bada gaukarana ta do ia karaia, mase taudia do idia toreisi lou: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona.”—Ioane 5:28, 29.
22. Dahaka dainai ogogami bona hisihisi idia abia taudia be vaira negana idia naria diba mai moale ida?
22 Unai be do ia vara momokani, badina ia gwauhamatalaia tauna be Iehova. Ita diba ia ese ena hanamoa siahuna badana ia gaukaralaia bona ia biagua neganai, do idia vara gaudia be namo herea. Salamo 72 ese ena Natuna, King Iesu, amo do ia karaia gaudia ia herevalaia. Bena unai negai kara maoromaoro tauna do ia tubu. Maino do ia bada. Dirava ese ogogami bona hisihisi idia abia taudia do ia durua. Ia gwauhamata: “Koni momo herea, be tano dekenai do ia vara namonamo. . . . Ororo gabudia danu dekenai, uiti bona aniani avadia do idia tubu namonamo, [idaunegai] Lebanona dekenai idia tubu namonamo bamona. . . . Hanua ibounai dekenai taunimanima momo do idia noho, uma tano dekenai rei momo idia noho bamona.”—Salamo 72:16.
23. Dirava ena hoa karadia ese ita idia hagoadaia dahaka do ita karaia totona?
23 Ia hedinarai goevagoeva, badina namona dainai Dirava ena hoa karadia ibounai—guna ia karaia gaudia, hari ia karaia gaudia, bona kahirakahira do ia karaia gaudia—ita laloa be namo. “Lohiabada, Israela ena Dirava, do ita hanamoa. Ia sibona ese hoa karadia ia karaia noho. Lohiabada ena ladana namo herea do ita hanamoa hanaihanai. Iena hairai namona ese tanobada ibounai do ia hahonua. Amen bona Amen.” (Salamo 72:18, 19) Namona be hanaihanai iseda varavara bona ma haida ida unai ita kikilaia. Oibe, namona be ‘Lohiabada ena hairaina be bese idauidau ibounai dekenai do ita gwauraia hedinarai. Iena kara badadia be idia ibounai dekenai do ita hadibaia.’—Salamo 78:3, 4; 96:3, 4.
Edena Bamona Do Oi Haere?
• Dirava ese Iobu dekenai ia henia henanadai be edena dala ai taunimanima edia diba ena hetoana idia hahedinaraia?
• Iobu karoa 37-41 ese Dirava ena hoa karadia ena haheitalai haida idia gwauraia, to edena gaudia oi laloa bada?
• Dirava ena hoa karadia haida ita laloa namonamo murinai, dahaka ita karaia be namo?
[Pictures on page 10]
Sinoufleik edia toana idauidau bona kevaru ena siahu bada dainai dahaka oi laloa?
[Credit Line]
snowcrystals.net
[Pictures on page 13]
Dirava ena hoa karadia be hanaihanai oi kikilaia be namo