Baibel Stadi—Ia be Oi Totona, A?

“PRIS tauna ta ia noho lasi neganai oi duahia lasi.” Unai sisiba herevana be Katolik taudia ese idia abia Baibel haida ena matamana kahanai ia noho. Kay Murdy, Los Angeles ena Catholic Bible Institute amo, ia gwau: “Ai Katolik taudia dekenai Baibel idia hahedinaraia momo lasi, to unai kara be hari ia idau ia lao noho.” Katolik taudia idia diba edia mauri dekenai Buka Helaga be mai anina neganai, “do idia ura bada Baibel idia diba.”

Unai kara ia idau dainai, U.S. Catholic magasin ese tomadiho hadibaia karana ia biagua tauna ena hereva ia torea, ia gwau Baibel stadi klas dekenai idia vareai Katolik taudia ese mamina idia abia, “idia be Katolik taudia dainai gau momo idia reaia, bona Baibel lalonai gau namodia momo herea idia noho. Hari idia ura unai gau namodia, guna idia reaia gaudia, idia diba.”

To, Baibel stiuden tauna ese dahaka “gau namodia” ia davaria diba? Mani oi laloa: Oi ura dina ta ta maurina ena hekwakwanai haheaukalaia dalana oi diba, a? Edena dala ai emu ruma bese lalonai maino oi havaraia diba? Dahaka dainai taunimanima matauraia lasi bona inai henia karadia be bada herea? Hari inai nega ena matamata taudia huanai dagedage karana ia vara ena badina be dahaka? Unai bamona henanadai bona ma henanadai aukadia haida edia haere maorodia be Dirava ena Hereva, Baibel, dekenai oi davaria diba. Idia be “gau namodia” Katolik bona Protestan taudia sibona totona lasi, to Buddhist, Hindu, Muslim, bona Shinto taudia, bona Dirava ia noho idia abia dae lasi taudia bona Dirava ia mauri noho idia daradaralaia taudia totona danu. Salamo torea tauna ena hereva bamona, ‘Dirava ena hereva be lamepa bamona ia hakaua noho, vadaeni ia raka maoromaoro diba. Iena hereva be diari, ia ese ena dala ia hadiaria noho.’ Unai bamona ia vara diba oi dekenai danu.​—⁠Salamo 119:105.