Diari Hanuana Dekenai Diari Bamona Idia Hedinarai
Fluctuat nec mergitur, eiava “Hurehure ese idia botaia to ia mutu lasi.” Unai be Paris ena siti ena hereva badana.
IDIA hanaia laganidia 2,000 lalonai, Paris be bouti bamona lai badadia dainai ia hekwarahi, badina tano idauidau taudia bona sibona ena taunimanima idia havaraia heiriheiri lalodiai ia hekwarahi ia mutu lasi totona. Hari Paris be tanobada ena hairai bada siti ta, bona ena ruma badadia be mai hairai bada, ena dala badinai be au momo idia gini, bona taunimanima momo idia diba miusiam idia noho dainai, Paris idia ura henia. Haida idia laloa ia be ane torea taudia, laulau torea taudia, bona aonega taudia edia gabu badana. Ma haida be ena aniani namodia idia moalelaia bona ena sitaelo gaudia idia laloa bada.
Histori ena sivarai hegeregerena, Paris dekenai Katolik dubu ia goada. Lagani 200 gunanai, Paris lalonai Europe taudia edia Hadiaria Negana Badana be bada dainai, ia idia gwauraia Diari Hanuana. Hari, reana idia diba eiava reana idia diba lasi, to unai nega ai idia havaraia aonega lalohadai ese Paris taudia momo edia lalona idia veria bada, to tomadiho ese ia veria bada lasi.
To, guna idia laloa dalana ai, taunimanima edia aonega ese taunimanima edia mauri ia hadiaria lasi. Hari inai negai momo be gabu idauna ta amo lalo-parara idia tahua noho. Lagani 90 bamona lalonai, Paris dekenai Iehova ena Witnes taudia be ‘diari bamona idia hedinarai’ vadaeni. (Filipi 2:15) Bouti taria namonamo taudia ese lai idaudia dainai bouti ia heau dalana idia haidaua bamona, Witnes taudia ese idia vara gaudia dainai edia gaukara dalana idia haidaua hanaihanai, “bese ibounai edia kohu namodia” idia abia vareai totona.—Hagai 2:7.
Siti Ia Havaraia Auka Gaudia
Lagani 1850 lalonai, Paris dekenai be taunimanima 600,000 idia noho. Hari idia noho taudia, siti ena kahana iboudiai idia noho taudia danu, be milioni 9 ia hanaia. Unai bamona ia bada ia lao dainai France ena siti iboudiai amo Paris dekenai gau idauidau momo idia noho. Ia be tanobada ena edukeisen bada abia gabuna, tanobada ibounai ena iunivesiti gunadia amo Paris ena be ta, bona stiuden taudia 250,000 bamona be unuseniai idia noho. Paris ena kahana haida be mai edia ruma latadia momo bona idia dekenai raskol karadia idia vara bona gaukara lasi taudia be momo, idia ese Paris ena kahana dikana idia hahedinaraia. Momokani, Iehova ena Witnes taudia be dala namona ai taunimanima idauidau dekenai sivarai namona idia gwauraia totona, diba idia abia bona dala idauidau idia gaukaralaia be namo.—1 Timoteo 4:10.
Lagani ta ta ai loaloa taudia milioni 20 ia hanaia be Paris idia vadivadi henia. Idia be reana mai moale ida Eiffel Tower dekenai idia daekau, Seine sinavaina badinai idia raka loaloa, eiava dala badinai idia noho kofi eiava aniani gabudia dekenai idia helai, bona gabu ena mamina idia moalelaia. To, dina ta ta maurina ena heau dalana dainai Paris taudia idia bisi bada diba. Christian, ful-taim hesiai gaukara ia karaia tauna, ia gwau: “Taunimanima be hanaihanai idia haragaharaga. Gaukara amo idia giroa neganai, idia hesiku bada.” Unai bamona idia bisi bada taudia hereva henia be mai ena hekwarahi.
To, ruma ai taunimanima davaria be Iehova ena Witnes taudia ese Paris dekenai idia davaria hekwakwanai badana. Ruma haida be mai edia intercom, bona iduara amo daiutu dekenai ia noho tauna ida idia herevahereva diba. To, taravatu utua karana ia bada ia lao dainai, ruma latadia momo edia vareai gabudia be mai edia sekuriti gaudia, bona idia vareai diba lasi. Ita daradara lasi unai badina dainai, gabu haida dekenai taunimanima 1,400 1,400 amo ta ta sibona be Witnes taudia. Unai dainai, telefon amo bona nega bona gabu idauidau ai idia haroro momo. Iehova ena Witnes taudia be ma dala haida amo edia ‘diari idia hahedinaraia’ diba, a?—Mataio 5:16.
Dala idauidau bona gabu idauidau momo ai idia haroro diba. Martine be hahine ta ia itaia basi naria gabuna dekenai ia gini, toana be ia lalo-metau. Vanegai sibona unai hahine ena natuna kekeni tamona ia mase. Martine ese ia dekenai buklet ta ia henia, ia ese Baibel ena toreisi lou helarona namona ia hahedinaraia. Bena hua haida lalonai idia hedavari lasi. Martine ese unai hahine ia itaia lou neganai, ia ida Baibel stadi ia karaia matamaia. Ena be ena adavana ese ia dagedage henia, to unai hahine be Witnes ta ai ia lao.
Nega Bona Gabu Idauidau ai Huahua Ia Vara
Paris ena basi bona trein edia heau dalana be namo herea momokani. Taunimanima idia moalelaia Metro trein ese dina ta ta lalonai taunimanima 5,000,000 idia abidia loaloa. Paris ena steiseni badana tano henunai, Châtelet-Les-Halles, idia gwauraia tanobada ena steiseni badana bona hanaihanai ia bisi bada gabuna. Unuseniai taunimanima hedavari henia daladia be momo herea. Alexandra be unai Metro amo dina ta ta ia lao gaukara. Nega ta tau matamatana ta ida ia herevahereva, ia be liukimia dainai ia gorere dikadika. Alexandra ese ia dekenai Paradaiso helarona ia gwauraia pepapepana ia henia. Dina ta ta, hua 6 lalonai, nega bona gabu tamona dekenai Baibel idia herevalaia. Bena dina ta ai, unai tau ia mai lou lasi. Nega daudau lasi murinai, ena adavana ese Alexandra ia ringi henia bona ia boiria hospital dekenai ia mai totona, badina ena adavana ena gorere ia dika momokani. Madi, Alexandra be ia mai leiti. Ena mase murinai, unai tau ena adavana ia lao Bordeaux dekenai, France ena sautwest dekenai, bena unuseniai idia noho Witnes taudia ese ia idia vadivadi henia. Lagani ta murinai Alexandra ese sivarai namona ia kamonai, unai vabu hahinena be bapatiso Keristani Witnes hahinena ta ai ia lao, bona ena helaro namona be ena adavana ena toreisi lou do ia itaia!—Ioane 5:28, 29.
Keristani hahine burukana ta ese Paris amo Limoges ai, France ena ihuana dekenai, ia lao noho trein ta lalonai kekeni ta Renata ia hereva henia. Ia vara gabuna Poland dekenai, Renata ese lagani ima lalonai tomadiho, Heberu gado, bona Greek gado ia stadilaia, to ia be Dirava ia abidadama henia lasi. Hua toi gunanai, ia ese Dirava ia guriguri henia. Ena be ia ura momokani lasi unai taihu burukana ia hereva gaudia ia kamonai bona ia laloa do ia hereva henia lou lasi dainai, Renata ese ena telefon namba ia henia. To, unai taihu ese ia hereva henia loulou bona dala ia karaia, Renata idia vadivadi henia haraga totona. Witnes tau ta bona ena adavana ese Renata idia vadivadi henia neganai, ia laloa, ‘Lau dekenai dahaka do idia hadibaia?’ Herevana guna sikuli dekenai Renata ese diba ia abia, to ia manau bona Baibel ena hereva momokani ese ena lalona ia veria. Ia gwau, “maoromaoro lau lalo-parara inai be hereva momokani.” Hari ia be mai moale ida ma haida dekenai Baibel ena hereva ia gwauraia.
Michèle be motuka taria dalana ia dibaia noho. Motuka taria klas dekenai idia noho stiuden taudia ese headava lasi taudia edia mahuta hebou karana idia herevalaia. Michèle ia gwau unai be maoro lasi. Wiki ta murinai, motuka taria ia hadibaia hahine, Sylvie, ese ia nanadaia: “Oi be Iehova ena Witnes hahine ta, a?” Sylvie be Michèle ese Baibel amo ia abia lalohadai dainai ia hoa. Baibel stadi idia matamaia, bona lagani ta murinai Sylvie ia bapatiso.
Paris ena uma gabudia mai hairai bona loaloa uma gabudia momo be gabu namona taunimanima ida idia herevahereva totona. Josette ese ena laga-ani negana ia gaukaralaia loaloa uma gabuna dekenai ia lao totona, unuseniai hahine burukana Aline ia raka loaloa noho. Josette ese ia dekenai Baibel lalonai idia noho gwauhamata namodia ia gwauraia. Baibel stadilaia dalana idia karaia, Aline ia goada ia lao haraga, bona bapatiso ia abia. Hari, Aline ena mauri lagani be 74, bona ia be regula painia gaukara ia karaia namonamo hesiai hahinena, mai moale ida Keristani hereva momokanina be ma haida ida ia herevalaia.
Diari Bese Ibounai Totona
Paris ai idia noho Witnes taudia be tano daudaudia dekenai idia lao lasi, tano idauidau taudia edia mauri daladia idia moalelaia totona. Unai gabu dekenai idia noho taudia amo 20 pesen bamona be tano idau taudia. Keristani kongregesen bona grup be gado idauidau 25 bamona ai idia karaia.
Unai haroro gabuna idauna lalonai diba bona laloa karana ese nega momo gau namodia idia havaraia. Philippine Witnes hahinena ta be sibona ena teritori ia karaia. Aniani ia hoia noho neganai, sitoa lalonai idia noho Philippine taudia haida ida herevahereva ia matamaia karana amo Baibel stadi momo ia hamatamaia.
Dala ita karaia ita haroro totona be mai ena namo. December 1996 ai, Witnes taudia gado idau kongregesen ta amo idia kamonai taunimanima momo idia diba circus be taoni dekenai do ia mai neganai, idia laloa unai circus lalonai idia gadara taudia do idia hereva henia. Adorahi ta ai gadara murinai, unai gadara taudia be edia hotel dekenai ida giroa neganai idia hereva henidia. Unai idia karaia dainai, Baibel 28, Keristani bukadia 59, buklet 131, bona magasin 290 idia hariharilaia. Idia noho wiki toi edia dokonai, gadara tauna ta ia henanadai: “Edena bamona Iehova ena Witnes tauna ai lau lao diba?” Ma ta ia gwau: “Lauegu tano dekenai do lau haroro!”
Hunia Dava Bada Gaudia Do Idia Davaria
Paris idia vadivadi taudia be gabu ibounai, idaunegai rumadia namodia idia itaia. To, dava bada gaudia momo idia do noho, do idia davaria totona. Aniza be ena vavana ida ia mai France dekenai, ena vavana be gavamani ena gwaukau tauna ta. Ruma dekenai Aniza ese Baibel ia duahia hanaihanai. Dina ta mai karaharaga ida ruma ia rakatania neganai, painia ta ese ia dekenai pepapepa ladana, Bible Oi Abidadama Henia Diba, ia henia. Wiki vairai idia hedavari totona nega idia abia hidi, bona Baibel stadi idia hamatamaia. Aniza ese ena ruma bese amo dagedage bada ia abia. Stadi karana ia goadalaia ela bona ia hegeregere bapatiso ia abia totona. Ia abia hahenamo, hereva momokani be ma haida dekenai ia harorolaia hahenamona, be edena bamona ia laloa? Ia gwau: “Matamanai haroro gaukara be ia auka, badina lau hemarai. To, Baibel lau duahia neganai, lau ia hasiahua. Egu lalona ia moale lasi bema lau haroro lasi.” Paris dekenai idia noho Witnes taudia momo be unai lalohadai idia hahedinaraia bona ‘Lohiabada ena gaukara idia karaia goadagoada.’—1 Korinto 15:58.
Baibel ena hereva momokani ena diari be Paris ena kahana dekenai ruma idia noho gabuna ia hadiaria, unuseniai “nadi namodia” ma haida idia hedinarai. Bruce be ena turana, vanegai sibona Iehova ena Witnes tauna ta ai ia lao tauna, ia vadivadi henia, ia amo rekodi haida ia abia totona. Bruce ia davaria ena turana be ena turana ma haida ida Baibel ia herevalaia neganai, Bruce ese edia herevahereva ia kamonai. Baibel stadi ia abia dae to ia be mai ena hekwakwanai haida. “Unai gabu dekenai lau idia diba momo. Lauegu kakana be hanaihanai ia heatu, bona lau be regerege bada mavaru patidia lau karaia. Witnes tauna ta ai do lau lao be ma haida ese edena bamona do idia laloa?” Ena be idia noia loulou pati ia hegaegaelaia totona, to Bruce ese unai kara ia hadokoa. Hua ta murinai ia haroro matamaia: “Unai gabu dekenai idia noho taudia ibounai idia ura diba dahaka dainai Witnes tauna ai lau lao.” Daudau lasi murinai bapatiso ia abia. Gabeai, hahenamo ia abia bona Hesiai Gaukara Hadibaia Sikulina dekenai ia lao.
Dava bada gaudia tahua be mai ena hekwarahi. To, dava bada gaudia davaria be mai ena moale! Jacky, Bruno, bona Damien be paraoa gabua taudia Paris dekenai. Jacky ia gwau: “Dala be lasi ai idia hereva henia totona, badina hanaihanai ai gaukara bona ruma dekenai ai noho lasi.” Patrick, regula painia tauna ta, ia itaia daiutu maragidia haida idia noho ruma ena ataiai dekenai, bona ia laloa reana daiutu ta be mai taunimanima. Hanaihanai ia hekwarahi idia noho taudia ia davaria totona bona unai dainai huahua namona ia abia, badina adorahi ta Jacky ia davaria, ia be nega sisina unuseniai ia noho. Bena dahaka ia vara? Unai turadia toi be Witnes taudia ai idia lao bona gaukara ma ta idia davaria, unai amo nega ia noho tiokratik gaukarana idia karaia badabada diba.
Lai Bada Idia Hamaragia
Vanegai, France ena nius halasia oreadia haida ese Iehova ena Witnes taudia idia gwauraia tomadiho oreana dikana ta. Lagani 1996 ai, Witnes taudia ese mai edia kudouna ibounai ida mai anina bada pepapepa milioni 9, ladana Iehova Ena Witnes Taudia—Inai Oi Diba be Namo, idia hariharilaia. Unai amo namo idia davaria.
Idia hekwarahi taunimanima ibounai idia davaria totona. Gavamani ena gaukara taudia momo ese Witnes taudia idia hanamoa. Gavamani ena kaunsolo tauna ta ia gwau: “Iehova ena Witnes taudia ese inai pepapepa idia hariharilaia neganai, kara namona idia karaia. Koikoi herevadia ia hamaoromaoroa.” Doketa tauna ta ia gwau: “Lau be nega daudau inai gauna lau naria!” Paris amo tau ta ia torea ia gwau: “Iehova Ena Witnes Taudia—Inai Oi Diba be Namo pepapepa lau duahia. Lau ura gau ma haida lau diba bona lau ura dava lasi Baibel stadi lau abia.” Ma ta ia torea ia gwau: “Tanikiu bada badina momokani karana umui hahedinaraia dainai.” Katolik hahine ta be Witnes taudia ia hamaoroa, ia gwau: “Namo herea! Inai hereva koikoidia umui haerelaia be namo!”
Paris dekenai Witnes matamata taudia momo idia moalelaia gauna be, lagani 1997 ai idia hegaegaelaia haroro gaukara badana, Tanobada Ibounai Katolik Matamata Taudia Edia Dina totona. Ena be dina ena siahu be 35° Celsius bamona, to Witnes taudia 2,500 be unai gaukara idia karaia. Dina haida sibona lalonai, idia ese A Book for All People buklet 18,000 be tanobada ena kahana ibounai amo idia mai matamata taudia dekenai idia hariharilaia. Unai gaukara ese Iehova ena ladana dekenai witnes namona bona hereva momokani ena uhe ia hadoa sibona lasi, to Witnes matamata taudia ia hagoadaia. Matamata taihu ta be unai haroro gaukara badana karaia totona ena holide nega ia hakwadogia, bona ia gwau: “Iehova be mai ena moale taudia tanobada dekenai, edia goada idia gaukaralaia iena ladana idia hanamoa totona. Inai dina rua be anina namona idia havaraia, edia namo ese egu mauri lalonai lau abia diba holide negadia ibounai idia hanaia! (Salamo 84:10)”
February 28, 1998, be Hitler ese Germany ai Iehova ena Witnes taudia ia taravatua negana ena lagani namba 65. France dekenai idia noho Witnes taudia ese unai dina idia gaukaralaia, idia rentaia gabudia ai taunimanima dekenai Jehovah’s Witnesses Stand Firm Against Nazi Assault vidio idia hahedinaraia totona, unai vidio ese Iehova ena taunimanima idia abia dagedage ena hisihisi ia gwauraia. Boiboi pepadia milioni 7 idia hariharilaia. Histori torea taudia bona guna dibura kamepa dekenai idia noho taudia ese lalona hamarerea hereva idia henia. Paris ai, taunimanima kahirakahira 5,000 idia mai, idia momo be Witnes lasi taudia.
Paris ai momo ese lauma diarina idia laloa bada, bona idia moale badina Basileia pablisa taudia be diari bamona edia diari ia hedinarai. Unai be Iesu ena hereva bamona, ia gwau: “Uiti ena anina abia negana ia ginidae vadaeni, to utua taudia be momo lasi.” (Mataio 9:37) Iehova ena Witnes taudia ese edia lalona idia hadaia Paris lalonai haroro gaukara ai idia davaria hekwarahi gaudia idia hanaia totona, bona unai dainai Paris be dala idauna ai Diari Hanuana ai ia lao, Iehova hanamoa totona.
[Picture on page 9]
City Hall
[Picture on page 9]
Opera Garnier
[Picture on page 9]
Louvre Museum
[Pictures on page 10]
Baibel ena sivarai be idia davaria diba gabudia dekenai bisi bada taudia dekenai idia gwauraia