Gaukara Namona Ena Setifiket

UNAI be Association of Congolese and African Journalists for the Development (AJOCAD), Democratic Republic of Congo dekenai, ese “taunimanima ta ta eiava taunimanima idia durua oreadia ese [Congo] ena tubu dalana dekenai heduru bada idia henia dainai idia henia ahuna.”

November 17, 2000 ai, Gaukara Namona Ena Setifiket be Iehova ena Witnes Taudia dekenai idia henia, badina “edia buka bona magasin lalonai idia noho hadibaia herevadia [amo] Congo taudia edia tubu dalana idia durua.”

Kinshasa ena niuspepa Le Phare ese unai ahuna ia herevalaia neganai, ia gwau: “Gima Kohorona bona Awake! magasin eiava Iehova ena Witnes taudia ese idia halasia buka ma haida idia do abia lasi Congo taudia ita davaria be auka. Inai magasin ese mauri lalodiai idia vara gaudia iboudiai idia [kikilaia].” Unai hereva be ma ia gwau, unai buka bona magasin ese “hari inai nega ai idia vara hekwakwanai haheaukalaia daladia ia gwauraia” bona “hari idia vara gaudia edia anina” idia gwauraia. Awake! magasin ta ta be “politikol karadia amo idia gini siri bona bese ta taudia idia abia isi lasi.” Danu, unai buka bona magasin ese taunimanima idia hagoadaia “Havaraia Tauna ena gwauhamata, inai tanobada dikana mai ena taravatu utua karadia do ia haorea bena ena gabunai maino bona noho namo tanobadana do ia karaia, idia abidadama henia.”

AJOCAD ese ia gwauraia bamona, Iehova ena Witnes taudia edia buka bona magasin ese Congo taudia momo herea idia durua vadaeni. Idia be gado handred momo dekenai idia halasia dainai, edia helaro idia havaraia herevadia ese oi danu idia durua diba.

Mani henunai ia noho herevana oi itaia, bona do oi diba edena bamona idia amo heduru oi abia diba.