“France ai Dahaka Ia Vara?”

“Ura kwalimu, ura kwalimu namona.” Unai be France ena bese abia isi anena, “La Marseillaise,” ena hereva haida. Momokani, ura kwalimu ita laloa bada be namo. To, vanegai France dekenai idia vara gaudia dainai haida idia laloa, unuseniai ura kwalimu gaudia badadia idia hadikaia. Unai dainai, Friday, November 3, 2000 ai, Iehova ena Witnes taudia tausen momo ese pepapepa milioni 12 idia hariharilaia, ena sinado be “France Dekenai Dahaka Ia Vara? Ura Kwalimu Ia Boio Diba, A?”

LAGANI haida lalonai, politikol taudia idauidau bona tomadiho oreadia idia dagedage henia grup idauidau ese France ai Iehova ena Witnes taudia idia dagedage henia. Unai dainai Witnes taudia ese edia mauri lalonai, kongregesen lalonai, bona tano ibounai lalonai hekwakwanai idia davaria. To, June 23, 2000 ai, Conseil d’État, France ena kota badana, ena hahemaoro herevana ese kota ma 31 edia hahemaoro herevadia 1,100 bona ma haida idia hahedinaraia lalohadai ia hamomokania. Unai kota badana ese ia hamomokania Iehova ena Witnes taudia edia tomadiho be France ena taravatu hegeregerena bona edia Kingdom Hall be dubu ma haida hegeregerena do idia kara henia, idia amo takisi moni do idia abia lasi.

To, French Ministry of Finance ese unai hahemaoro herevana ia dadaraia bona ena be taravatu ta ese tomadiho oreadia amo takisi moni gogoa karana ia koua, to Iehova ena Witnes taudia amo takisi moni idia do gogoa noho. Unai Ministry ese France ai idia noho kongregesen 1,500 lalonai idia hebou Witnes taudia bona edia turadia idia henia kontribusen amo ia gogoa takisi monina ena bada be 60 pesen. Hari kota dekenai unai idia herevalaia noho.

Ai gwauraia vadaeni pepapepa hariharilaia karana ena badina be idia ura unai kara gageva, haida be sibona edia ura hegeregerena takisi moni idia gogoa karana, bona tomadiho dalanai iboudiai edia ura kwalimu idia hadikaia taravatudia ese idia havaraia dika idia hahedinaraia.a

Dina Latana Ta

Kongregesen haida dekenai, Witnes taudia ese dabai 2:00 a.m. ai, trein steiseni bona faktori bona gabeai peleini diho gabudia dekenai pepapepa idia hariharilaidia matamaia. Dabai 6:00 a.m. ai, Paris taudia idia noga. Volantia taudia 6,000 bamona be gabu namodia dekenai idia noho, gaukara dekenai idia mai taudia idia davaria totona. Hahine matamata ta ia gwau: “Tomadiho dalanai ura kwalimu ita dogoatao totona umui karaia karana be namo herea. Unai be mai anina bada Iehova ena Witnes taudia sibona dekenai lasi.” Marseilles dekenai, Witnes taudia 350 mai kahana ese trein steiseni bona dala dekenai pepapepa idia henidia. Hora tamona lalonai, reidio dekenai unai pepapepa hariharilaia karana idia herevalaia vadaeni, kamonai taudia idia hamaoroa do idia hoa lasi bema Iehova ena Witnes taudia be idia dekenai idia mai. Strasbourg ai, European Court of Human Rights ia noho gabuna dekenai, steiseni badana dekenai loaloa taudia be mai haheauka ida laini dekenai idia naria pepapepa ta idia abia totona. Loea tauna ta ia gwau, ena be ita abia dae gaudia ia abia dae lasi, to mai ena ura bada ida iseda kota karana ia laloa noho, badina iseda hekwarahi be mai anina bada bona mai ena maoro.

Dabai 8:00 a.m. ai, ena be medu bada ia diho, to Alps ororodia ai ia noho Grenoble sitina dekenai Witnes taudia 507 be dala dekenai idia gaukara eiava ruma ta ta edia revareva mauadia dekenai pepapepa idia atodia. Motuka bona trein taria taudia idia itaia gau ta ia vara bona idia stopu, pepapepa ta idia abia totona. West kahana ai ia noho Poitiers ena siti dekenai, dabai 9:00 a.m. ai, trein amo idia ginidae loaloa taudia ese trein idia guia gabuna dekenai pepapepa idia abia vadaeni. Germany ena hetoana kahirakahira ia noho gabuna Mulhouse dekenai, pepapepa 40,000 idia hariharilaia vadaeni.

Dabai 10:00 a.m. ai, kongregesen momo ese edia pepapepadia amo kahana idia hariharilaia vadaeni. Dabai lalonai, haida sibona ese pepapepa idia dadaraia, bona taunimanima momo ida idia herevahereva. Besançon dekenai, Switzerland ena hetoana amo ena daudau be kilomita 80 bamona, tau matamata ta ia hahedinaraia Baibel ia ura henia bona Dirava ese hisihisi ia do haorea lasi ena badina ia nanadaia. Witnes tauna ese ia boiria, kahirakahira ia noho Kingdom Hall dekenai ia mai bona idia herevahereva namonamo totona, bona unuseniai Dirava Ia Ura Dahaka Ita Karaia? buklet amo, maoromaoro Baibel stadi idia hamatamaia.

Dina tubu ai, Witnes taudia momo ese edia aniani negana idia gaukaralaia, hora tamona eiava rua lalonai idia haroro totona. Adorahi lalonai, pepapepa idia hariharilaidia noho, bona kongregesen momo be adorahi 3:00 eiava 4:00 p.m. ai edia gaukara idia haorea. Champagne idia karaia gabuna ena siti badana Reims ai, guna Iehova ena Witnes taudia idia bamoa eiava idia ida idia stadi taudia haida idia ura kongregesen idia bamoa lou. Bordeaux dekenai Baibel stadi toi idia hamatamaia. Unai siti ai, Witnes tauna ta be niuspepa hoia totona sitoa dekenai ia vareai bona pata dekenai pepapepa momo ia itaia. Unai sitoa naria hahinena be guna Witnes hahinena ta bona pepapepa ia abia neganai ia itaia ia be mai anina bada bona ia amo kopi momo ia karaia, idia ia hariharilaia totona.

Le Havre ai, Normandy dekenai, Protestan hahine ta be reidio dekenai ia kamonai Iehova ena Witnes taudia edia kontribusen amo takisi moni idia gogoa dainai ia hoa bada. Mai ena ura ida pepapepa ia abia dae bona Witnes taudia ia hanamoa, badina unai kara gageva dekenai edia lalohadai idia hahedinaraia. Hanuaboi 7:20 p.m. ai, Lyons dekenai televisen nius lalonai pepapepa hariharilaia karana idia herevalaia, idia gwau: “Hari dabai medu oi reaia be auka lasi to Iehova ena Witnes taudia edia pepapepa oi reaia be auka.” Witnes taudia rua idia henanadai henia bona idia ese pepapepa hariharilaia karana ena badina idia gwauraia hedinarai.

Witnes taudia haida idia ura moni gaukara murinai unai gaukara idia karaia dainai, pepapepa haida be gaukara amo idia giroa taudia dekenai idia henia bona ma haida be ruma ta ta edia revareva mauadia dekenai idia atoa. Brest bona Limoges taonidia​—⁠ena uro namodia dainai momo idia diba gabuna​—⁠dekenai hanuaboi 11:00 p.m. ai, muvini piksa itaia gabudia idia rakatania taudia be unai dina ai pepapepa idia abia taudia ginigabedia. Pepapepa oredia idia gogoa bona murina daba dekenai idia hariharilaia.

Idia Vara Gaudia

Witnes tauna ta ia gwau: “Eda inai taudia idia laloa ita idia hamanokaia. To, ita manoka lasi, ita goada ita lao.” Kongregesen momo ai, Witnes taudia amo 75 pesen ese unai dina ai unai gaukara idia karaia, idia haida be hora 10, 12, eiava 14 lalonai idia gaukara. Hem ai, France ena not kahanai, Witnes ta ese hanuaboi ai moni gaukara ia karaia murinai, dabai 5:00 a.m. ia lao adorahi 3:00 p.m. lalonai pepapepa ia hariharilaidia. Kahirakahira ia noho Denain ai, lagani 1906 amo kongregesen ia noho gabuna dekenai, Friday ai Witnes taudia 75 ese hora 200 idia gaukaralaia pepapepa idia hariharilaidia totona. Ma haida, ena be idia buruka, idia gorere, eiava medu ia diho, to edia lalona idia hadaia do idia gaukara danu. Hegeregere, Le Mans dekenai, edia mauri lagani be 80 idia hanaia taihu toi ese hora rua lalonai ruma ta ta edia revareva mauadia dekenai pepapepa idia atodia, bona uilisea dekenai ia noho Witnes tauna ta ese trein steiseni vairanai pepapepa ia hariharilaidia. Bona haroro gaukara idia rakatania Witnes taudia momo be unai gaukara lalonai idia vareai be hagoadaia gauna badana!

Ita daradara lasi, unai pepapepa hariharilaia karana be witnes namona ia henia. Noho dala idauidau taudia, idia momo be edia ruma dekenai ita davaria be auka, ese pepapepa idia abia. Taunimanima momo idia laloa unai gaukara ese Witnes taudia edia maoro ia gimaia sibona lasi. Momo idia laloa unai kara be France taudia ibounai edia maoro, sibona edia lalona ena mamina badinaia bona tomadiho abia dae totona, ia gimaia. Unai ia hedinarai, badina taunimanima ese pepapepa ma haida idia ura idia abia, edia turadia, gaukara turadia, eiava varavara dekenai idia henia totona.

Oibe, Iehova ena Witnes taudia France dekenai idia moale bada badina Iehova ena ladana idia hahedinaraia bona Basileia ena gaudia idia gimaia diba. (1 Petero 3:15) Edia ura gauna badana be ‘mai maino danu do idia noho namonamo’ bona taunimanima tausen momo be idia ida edia guba Tamana, Iehova, do idia hanamoa hebou.​—⁠1 Timoteo 2:⁠2.

[Footnote]