Duahia Taudia Edia Henanadai

Kolose 1:16 ia gwau: “Dirava ese Keriso dekena amo gau ibounai ia karaia, do idia be Keriso ena totona.” Edena dala ai gau ibounai idia karaia, “idia be” Dirava ena Natuna, Iesu, “ena totona”?

Iehova ese gau ibounai ia havaraia neganai, ia sibona ia havaraia Natuna tamona be gaukara karaia tauna bamona ia gaukaralaia, to Iesu sibona be unai dala ai ia karaia lasi. (Aonega Herevadia 8:​27-30; Ioane 1:⁠3) Unai dainai ia maoro, Natuna ese ia karaia gaudia amo moale ia abia, bona unai dala ai ‘idia be ia ena totona.’

Ita diba taunimanima edia tama sina idia laloa idia havaraia gaudia​—⁠edia memero bona kekeni​—⁠amo moale idia abia, bona nega momo unai ia vara. Unai dainai, Baibel ena aonega herevana ia gwau, “aonega merona ese iena tamana ia hamoalea noho.” (Aonega Herevadia 10:1; 29:17) Unai hegeregerena, Israela taudia ese Iehova Dirava idia kamonai henia neganai, idia amo moale ia abia. (Salamo 147:11) Danu, hari iseda negai ia idia badinaia taudia be mai kamonai ida idia raka neganai, idia dainai ia moale.​—⁠Aonega Herevadia 12:22; Heberu 10:⁠38.

Unai dainai, Dirava ia ura ia ida ia gaukara tauna, Iesu, ese ia karaia gaudia amo moale ia abia be maoro. Momokani, Aonega Herevadia 8:31 ia gwau ‘tanobada mai ena noho taudia ibounai dekenai ia moale noho.’ Unai dainai Kolose 1:16 ia gwau: “Gau ibounai ia karaia, do idia be Keriso ena totona.”