Oi Tanikiu Henia Bona Oi Moale

CALGARY HERALD, Canada ena niuspepa ta, ia gwau: “Tanikiu henia urana be taunimanima edia kara badana ta.” Herald ese lagani 9 sikuli natudia edia hereva ia halasia, edia tisa ese ia noidia, gau haida do idia torea, unai gaudia dainai idia ura idia tanikiu henia. Mero ta ia gwau iena ruma bese taudia ese ‘ia idia naria dainai’ ia ura idia ia tanikiu henia. Kekeni ta danu ia ura ena ruma bese taudia ia tanikiu henia, ia gwau: “Lau idia gimaia, idia hagoadaia, idia naria, idia lalokau henia, idia ubua, bona bema egu tama sina idia noho lasi, lau be inai tanobada dekenai lau noho lasi.”

Tanikiu henia urana ia mamia lasi tauna be do ia moale lasi. Tomadiho ia stadilaia aonega tauna J. I. Packer ena hereva hegeregerena “Dirava ese ita ia karaia bona ia ura ia dekenai ita tabekau bona ta ta dekenai ita tabekau heheni.” Unai dainai, lagani handred gunanai idia torea Baibel ena aonega sisibana ita laloatao, ia gwau: “Do umui tanikiu henia.” (Kolose 3:15) Tanikiu henia karadia bona mai kudouna ibounai ida ma haida lalo-namo henia karadia ese naria heheni karana ia habadaia.

Danu, ita ta ta ita tanikiu henia bona laloa bada karadia amo, ita hahedinaraia Iehova ita tanikiu henia, bona ia ese unai ia laloa. Baibel ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Sivarai 16:⁠9) Dirava be ita dekenai ia gwau taunimanima ese ia dekenai idia hahedinaraia lalokau ia laloatao bona ia laloa bada. (Heberu 6:10) Oibe, tanikiu henia karana ita hahedinaraia be namo, badina dina ta ta iboudiai unai kara namona ita hahedinaraia dainai, Iehova ia moale bona iseda moale ia bada danu. Aonega Herevadia 15:13 ena hereva hegeregerena do ia vara, ia gwau: “Tau ena kudouna ia moale neganai ia kiri noho.”