Gau ta ese Taunimanima Ia Hatamonaia Diba, A?

HEREVANA dahaka oi abidadama henia, to reana oi abia dae tomadiho iboudiai dekenai hereva momokani idia ura henia taudia idia noho. Hindu, Katolik, Iuda, bona tomadiho taudia ma haida be hereva momokani idia laloa bada bona mai edia ura ida idia tahua. To, toana be tomadiho ese taunimanima ia hapararaia. Bona haida ese tomadiho idia gaukaralaia dika havaraia totona. Nega ta, gau ta ese tomadiho iboudiai amo kara maoromaoro bona kara momokani idia ura henia lalo-momokani taudia do ia hatamonaia diba, a? Idia gaukara hebou totona lalo-tamona ai do idia noho diba, a?

Ita itaia tomadiho ese dala badana ai taunimanima ia hapararaia neganai, ita lalohisihisi! Inai tuari haida mani oi laloa. Sri Lanka dekenai Hindu taudia bona Buddhist taudia idia tuari heheni. Protestan, Katolik, bona Iuda taudia ese tuari idauidau lalonai rara idia bubua. Sibona idia gwauraia Keristani taudia ese Bosnia, Chechnya, Indonesia, bona Kosovo ai Muslim taudia idia tuari henia. Bona March 2000 ai, dina rua lalonai tomadiho dainai ia vara heiriheiri lalonai Nigeria taudia 300 idia mase. Momokani, tomadiho dainai ia vara inai henia karana ese unai tuari edia dika ia habadaia.

Nega momo lalo-momokani taudia ese tomadiho dainai idia vara kara dikadia idia daradaralaia. Hegeregere, dubu idia lao henia taudia momo idia hoa bada, badina dubu haida ai natudia hadikaia dubu gunalaia taudia be dubu amo idia lulua lasi. Abidadama taudia ma haida idia hemarai bada, badina sibona idia gwauraia Keristani tomadiho oreadia momo be tatau idia sihari heheni karana bona bogana lalonai natuna hamasea karana dainai idia hepapahuahu bona idia parara. Ia hedinarai goevagoeva, tomadiho ese taunimanima ia hatamonaia lasi. To, tomadiho momo lalonai hereva momokani idia ura henia taudia idia noho, inai ekspiriens ese idia hahedinaraia bamona.

Hereva Momokani Idia Ura Henia Bada

La Paz ai, Bolivia dekenai, Fidelia be Katolik dubu ladana Church of San Francisco ena tomadiho goadalaia lalo-momokani hahinena ta. Maria ena kaivakuku vairanai ia tui diho bona ia hoia diba kandolo namodia be korosi ai ia noho Keriso ena laulau vairanai ia atoa. Pura ta ta ai, pris tauna dekenai aniani bada ia henia, ogogami taudia ia henidia totona. To, Fidelia ena beibi ima be idia do bapatisoa lasi neganai idia mase. Pris ese ia hamaoroa idia ibounai be Limbo ena dibura dekenai hisihisi idia abia neganai, Fidelia ia hoa bona ia laloa, ‘Bema Dirava ena kara be namo, unai be edena bamona ia vara diba?’

Tara, medikol doketa ta, be Kathmandu ai, Nepal dekenai, ia tubu neganai, Hindu tomadihona idia hadibaia. Lagani handred momo lalodiai ena tubudia ese idia karaia kastom karadia ia badinaia dainai, Hindu dubu idauidau ai ena dirava ia tomadiho henidia bona kaivakuku be ena ruma dekenai ia atodia. To inai bamona henanadai dainai Tara ia daradara: Dahaka dainai hisihisi momo idia vara? Dahaka dainai taunimanima idia mase? Iena tomadiho lalonai haere namodia ia davaria lasi.

To, Panya be Bangkok ai, Thailand dekenai, koupa badana badinai ia gini rumana ta ai ia tubu daekau bona Buddhist tauna ai ia lao. Idia hadibaia hisihisi be mauri gunadia lalonai ita karaia karadia dainai ia vara bona ita haorea dalana tamona be eda ura ibounai ita hamasea. Lalo-momokani Buddhist taudia ma haida bamona, ia idia hadibaia harihari gaudia idia abia totona daba rere ta ta ai ruma dekenai idia mai dabua labora idia karaia monk taudia edia aonega ia matauraia be namo. Ia ese laloa dobu karana ia karaia bona Buddha ena laulau ia haboudia, badina ia abia dae idia ese ia do idia gimaia. Aksiden badana dainai Panya ena tauanina ena kahana, gabana henunai kahana, ia mase murinai, ia ese Buddhist monasteri idauidau ia vadivadi henia, badina mai momokani ida ia laloa hoa dalanai do ia namo lou. Ia namo lou lasi bona lauma dalanai diari ia davaria lasi. To, meamea karadia ia dibaia bona ia karaia matamaia.

Virgil be United States ai ia vara bona koledi dekenai Black Muslims oreana lalonai ia vareai. Mai goada ida idia halasia bukadia ia hariharilaia, idia gwau nao taudia be Diabolo. Idia laloa unai dainai kopi kurokuro taudia ese kopi korema taudia dekenai kara dika badadia idia karaia. Ena be Virgil ese unai gaudia ia abia dae momokani, to inai henanadai haida dainai ia daradara: Edena bamona kopi kurokuro taudia ibounai idia dika diba? Bona dahaka dainai haroro herevadia lalonai moni idia herevalaia momo?

Ena be Charo be Katolik dubu ia goada gabuna South America dekenai ia tubu daekau, to ia be lalo-momokani Protestan hahinena ta. Ia moale badina ia itaia kaivakuku tomadiho henia karadia lalonai ia vareai lasi. Sunday ibounai Charo be mai moale ida dubu dekenai ia lao, unuseniai hemami hagoadaia herevadia ia kamonai totona, “Aleluia!” herevana ia boiboilaia badabada, bona murinai ma haida ida tomadiho anedia ia abia bona ia mavaru. Charo ia abia dae momokani, ia be kara dika amo ia goeva bona ia vara lou vadaeni. Ia abia monina ena kahana ten amo kahana ta be dubu ia henia, bona ia ura henia bada haroro tauna ese televisen amo kontribusen ia noia neganai, ia dekenai moni ia siaia Africa natudia durua totona. To, ena pasto ia nanadaia dahaka dainai lalokau Diravana ese hel lalonai souli ia hahisidia neganai, ia lalo-parara haere namona ia henia diba lasi. Gabeai ia davaria, iena kontribusen monina be Africa natudia durua totona idia gaukaralaia lasi.

Ena be unai taunimanima ima edia mauri daladia be idauidau, to dala ta ai idia hegeregere. Idia ese hereva momokani idia ura henia bona mai momokani ida edia henanadai dekenai haere maorodia idia tahua. To tomadiho momokanina lalonai do idia lalo-tamona momokani diba, a? Hereva gabena ese unai henanadai ia haerelaia.

[Picture on page 4]

Mauri dala idauidau taudia be do idia lalo-tamona momokani diba, a?

[Picture Credit Line on page 3]

G.P.O., Jerusalem