Tomadiho Momokani ese Taunimanima Ia Hatamonaia

ENA be nega momo tomadiho ese taunimanima ia hapararaia, to Dirava momokani tamona tomadiho henia karana ese taunimanima ia hatamonaia. Israela be Dirava ese ia abia hidi besena neganai, lalo-momokani Iuda Lasi taudia momo ese tomadiho momokani idia ura henia. Hegeregere, Ruta ese ena tano korikori Moaba ena dirava ia dadaraidia bona Naomi dekenai ia gwau: “Oiemu bese be lauegu bese do idia lao, bona oiemu Dirava be lauegu Dirava do ia lao.” (Ruta 1:16) Keristani taudia ginigunadia edia nega ai, Iuda Lasi taudia momo herea be Dirava momokanina tomadiho henia taudia ai idia lao. (Kara 13:48; 17:⁠4) Gabeai, Iesu ena aposetolo taudia be daudau gabudia dekenai sivarai namona idia abia lao matamaia neganai, Dirava momokani tomadiho henia karana ese lalo-momokani taudia ma haida ia hatamonaia. Aposetolo Paulo ia gwau: “Emui kaivakuku ibounai umui rakatania, bona Dirava dekenai umui tomadiho henia. Oibe, mauri bona momokani Diravana ena hesiai gaukara taudia umui halaoa vadaeni.” (1 Tesalonika 1:⁠9) Hari Dirava momokani tomadiho henia karana ese unai dala ai taunimanima ia hatamonaia, a?

Hereva momokanina lalohadaina idia daradaralaia taudia idia gwau inai hereva “tomadiho taudia momokanidia” eiava “Dirava momokanina” ita gaukaralaia be maoro lasi. Reana unai bamona idia laloa ena badina be hereva momokani idia davaria gabuna ta idia diba lasi. To mauri dala idauidau taudia ese hereva momokani idia tahua neganai, idia davaria tomadiho dalana be sibona eda ura dainai ita abia hidi be maoro lasi. Gau iboudiai ia Havaraia Tauna​—⁠Iehova Dirava​—⁠sibona ita tomadiho henia be maoro. (Apokalupo 4:11) Ia be Dirava momokanina, bona ia be mai ena maoro ia ita tomadiho henia dalana ia gwauraia hidi totona.

Unai dala ita diba totona, Iehova ese ena Hereva, Baibel, amo ita ia hadibaia. Hari, kahirakahira tanobada taudia ibounai be Baibel ibounai eiava ena kahana ta idia abia. Danu, Dirava ena Natuna ia gwau: “Bema lauegu hadibaia hereva umui badinaia . . . hereva momokani be do umui diba.” (Ioane 8:​31, 32) Unai dainai, hereva momokani ita dibaia diba. Bona tomadiho idauidau amo kudou-maoro taudia milioni momo ese mai gari lasi ida unai hereva momokani idia abia dae bona ia ese tomadiho momokanina lalonai idia ia hatamonaia.​—⁠Mataio 28:​19, 20; Apokalupo 7:​9, 10.

Hari Iseda Negai Tanobada Ibounai ai Idia Lalo-Tamona!

Baibel bukana Sepanaia ena peroveta herevana namona ese mauri dala idauidau taudia idia mai hebou karana ia herevalaia. Ia gwau: “Unai neganai lau [Iehova Dirava] ese bese idauidau edia gado do lau haidaua bona gado goevadaena do lau henidia, Iehova ena ladana do idia noinoi henia totona, bona iena hesiai gaukara be mai edia lalo-tamona ida do idia karaia hebou totona.” (Sepanaia 3:​9, NW ) Unai ese laulau namona ia hahedinaraia, edia kara idia haidaua taudia ese lalo-tamona ai Dirava idia hesiai henia!

Edena negai unai do ia vara? Sepanaia 3:8 ia gwau: “Lohiabada ia gwau, ‘Lau totona do umui naria noho. Do lau toreisi, bona bese idauidau do lau samania dinana do umui naria. Badina dina ta lau ese bese idauidau do lau gogoa hebou, bona basileia ibounai do lau haboua, egu badu be idia edia latanai do lau bubua totona, egu badu mai ena siahu ibounai. Badina be egu mama ena badu, ena lahi dekena amo, lau ese tanobada ena kahana ibounai do lau gabua ore.’ ” Oibe, Iehova ese bese idauidau ia gogoa noho, to edia latanai ena badu ia do bubua lasi neganai, tanobada ena manau taudia dekenai gado goevadaena ia henia. Unai nega be hari, badina Siahu Ibounai Diravana ena dina badana ena tuari, Aramagedono, totona bese iboudiai idia haboua vadaeni.​—⁠Apokalupo 16:​14, 16.

Iehova ese ena taunimanima ia hatamonaia totona gado goevadaena ia henidia. Unai gado matamatana ena anina be Baibel ena hereva momokani Dirava bona ena ura dekenai idia lalo-pararalaia namonamo. Unai gado goevadaena ai idia hereva ena anina haida be hereva momokani idia abidadama henia, ma haida dekenai idia hadibaia, bona edia mauri ai Dirava ena taravatu bona hakaua herevadia idia badinaia. Idia ese taunimanima idia hapararaia politikol karadia idia dadaraia bona sibona edia namo laloa bada karadia, hegeregere bese idaudia inai henia karana bona inai tanobada ese ia hahedinaraia bese abia isi karana, be edia kudouna amo idia kokia. (Ioane 17:14; Kara 10:​34, 35) Hereva momokani idia ura henia kudou-maoro taudia ibounai ese unai gado idia dibaia diba. Hereva gunana lalonai ita herevalaia taudia ima​—⁠guna tomadiho lalohadai idauidau idia abia dae taudia​—⁠be hari Dirava momokanina tamona, Iehova, tomadiho henia karana lalonai idia lalo-tamona dalana mani oi laloa.

Tomadiho Momokanina Lalonai Idia Lalo-Tamona

Fidelia, Roman Katolik tomadihona ia goadalaia hahinena, ese ena natuna kekeni ena sikuli gaukara totona Baibel ta ia hoia neganai, ena pris tauna ia noia unai Baibel amo do ia hahedinaraia ena beibi ima, idia mase vadaeni natudia, dekenai be dahaka ia vara. Ia gwau: “Ena haere ese lalohisihisi bada ia havaraia!” Unai dainai, Iehova ena Witnes taudia be ena ruma dekenai idia mai neganai, unai henanadai tamona be idia dekenai ia henia. Sibona ena Baibel amo mase taudia edia noho dekenai hereva momokani ia duahia neganai, ia lalo-parara dubu ese ia hakaua kerere. Ia dibaia, mase taudia be gau ta idia diba lasi bona unai dainai Limbo eiava gabu ma ta dekenai hisihisi idia abia lasi. (Salamo 146:4; Hadibaia Tauna 9:⁠5) Fidelia ese ena kaivakuku ibounai ia negea, dubu ia rakatania, bona Baibel ia stadilaia matamaia. (1 Ioane 5:21) Idia hanaia lagani 10 lalodiai, ia ese ma haida dekenai Baibel ena hereva momokani hadibaia gaukarana ia moalelaia.

Kathmandu amo ia mai hahinena Tara be Hindu dubu momo idia noho lasi tanona ta dekenai ia lao. Unai dainai Metodis dubuna dekenai ia lao, unuseniai lauma dalanai heduru ia abia totona. To taunimanima idia davaria hisihisi ena badina ia davaria lasi. Murinai, Iehova ena Witnes taudia be ia dekenai idia lao bona idia gwau ia ida Baibel do idia stadilaia diba. Tara ia gwau: “Lau lalo-parara lalokau Diravana ese tanobada dekenai idia vara hisihisi gaudia ia havaraia lasi. . . . Tanobada matamatana ai maino bona noho namo davaria helarona dainai lau moale bada.” (Apokalupo 21:​3, 4) Tara ese ena Hindu kaivakuku ia negedia, iena tano korikori ena tomadiho karadia ia rakatania, bona hari ia be Iehova ena Witnes hahinena ta bona lauma dalanai ma haida ia durua gaukarana amo moale korikorina ia abia.

Bangkok dekenai Iehova ena Witnes taudia ese nega ginigunana Panya, Buddhist tauna, idia vadivadi henia neganai, ia be vaira gaudia ia gwauraia babalau tauna, unai dainai Baibel ena peroveta herevadia ese ena lalona idia veria. Panya ia gwau: “Hari idia vara gaudia be Havaraia Tauna ena ura korikorina hegeregerena lasi ena badina bona Ia bona ena lohia siahuna idia dadaraia taudia ese idia havaraia dika hamaoromaoroa totona ia kehoa dalana lau dibaia neganai, egu matana ia koua dabua be ia kokia bamona. Baibel ena hereva ibounai idia lalo-tamona momokani. Lau lalo-parara Iehova be momokani ia noho Diravana bona lau lalokau henia matamaia; unai ese lau ia hagoadaia lau dibaia maoro gaudia lau badinaia totona. Lau ura bada ma haida do lau hadibaia, taunimanima edia aonega bona Dirava ena aonega edia idau idia itaia totona. Aonega korikorina ese egu mauri ia haidaua momokani.”

Gabeai, Virgil ese ia abia dae tomadiho lalohadai ia daradaralaia matamaia. Ia ese Dirava ia noia lasi kopi korema taudia do ia durua badina ia laloa idia be kopi kurokuro taudia inai henia oreana, to ia guriguri hereva momokani ia davaria totona, herevana ia be dahaka, bona edeseniai ia noho. Virgil ia gwau: “Dirava lau guriguri henia goadagoada bena dabai lau toreisi neganai, ruma dekenai Gima Kohorona magasin lau davaria. . . . Toana be iduara henunai idia atoa.” Daudau lasi murinai mai ura bada ida Iehova ena Witnes taudia ida Baibel ia stadilaia. Ma ia gwau: “Egu mauri lalonai nega ginigunana egu hemami ia namo. . . . Helaro ena diari be egu lalona dekenai ia tubu matamaia.” Nega sisina murinai Virgil be Dirava ena Hereva, Baibel, ese ia hahedinaraia helaro momokanina tamona be taunimanima dekenai idia harorolaia taudia ida ia lalo-tamona.

Latin America amo ia mai hahine ladana Charo be Witnes hahinena Gladys ese heduru ia henia neganai ia hoa bada. Gladys ia itaia Charo be ena natudia maragidia dainai ia hekwarahi bada bona ia durua maketi dekenai ia abia lao loulou totona. Gabeai, Charo ese Gladys ena hereva​—⁠davana lasi Baibel stadi​—⁠ia abia dae. Charo ese ena Baibel amo ia diba taunimanima namodia ibounai be guba dekenai idia lao lasi to Iehova ese taunimanima dekenai ia henia hahenamo ma ta be tanobada dekenai do idia mauri hanaihanai neganai, ia hoa bada herea. (Salamo 37:​11, 29) Idia hanaia laganidia 15 lalonai, Charo ese ma haida dekenai unai helaro ia harorolaia noho.

Mani oi laloa, tanobada ena taunimanima ibounai be Iehova, Dirava momokanina tamona, idia tomadiho henia dainai do idia lalo-tamona! Unai be nihi sibona lasi. Iehova ese unai ia gwauhamatalaia. Dirava ese ena peroveta tauna Sepanaia amo ia gwau: “Lau ese emui lalonai idia noho manau taudia, bona hekokoroku lasi taudia do lau rakatania, idia be umui emui huanai do idia noho. Idia ese lau Lohiabada idia abidadama henia noho. . . . kara dika ta do idia karaia lasi. Hereva koikoi ta do idia gwauraia lasi, bona kara koikoi do idia karaia lasi. . . . Idia ese tau ta dekenai do idia gari henia lasi.” (Sepanaia 3:​12, 13) Bema unai gwauhamata ese emu lalona ia veria, inai Baibel ena hereva mani oi badinaia, ia gwau: “Umui manau taudia ibounai e, Lohiabada ena oda umui kamonai henia noho taudia e, Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.”​—⁠Sepanaia 2:⁠3.