“Emui Imadia Do Umui Ha-Aukaia”
“Emui imadia do umui ha-aukaia, do umui manoka lasi. Lohiabada, emui Dirava be umui dekenai ia noho, bona iena siahu ese kwalimu umui dekenai ia henia noho.”—SEPANAIA 3:16, 17.
SEPANAIA ena hereva be idaunegai ia momokani, nega ginigunana, to ena anina ese unai ia hanaia momokani. Profesa C. F. Keil ia gwau: “Sepanaia ena peroveta herevana ena . . . matamana ai, ia gwau Dirava ese tanobada ibounai do ia kota henia, bona unai hahemaoro hegeregerena Iuda ena kara dikadia dainai do ia panisia bona tanobada besedia do ia panisidia, Iehova ena orea taudia idia inai henidia dainai. Ena hereva ibounai lalonai ia ese danu Iehova ena dina badana mai garina ia herevalaia.”
2 Hari inai negai, Iehova ese ena lalona ia hadaia bese idauidau do ia gogoa do ia hadikadia ore totona; unai ese Sepanaia ena nega lalonai ia karaia karana do ia hanaia momokani. (Sepanaia 3:8) Sibodia be Keristani idia gwauraia besedia be mai edia kerere bada Dirava vairanai. Ierusalema ese Iehova ia badinaia lasi dainai, panisi bada herea ia henia; unai hegeregerena, ia ese Kerisendom do ia panisia, ena lebulebu daladia dainai. Iehova ena hahemaoro herevadia, Sepanaia ena negai Iuda bona Ierusalema latadiai ia gwauraia, be mai anina bada, Kerisendom ena tomadiho oreadia idauidau dekenai. Edia hahediba herevadia amo tomadiho goevana idia hamiroa bona Dirava ena ladana idia hadikaia; unai hereva momo be tomadiho koikoi ena amo. Edia natudia maruanedia goadadia milioni momo be tuari ena boubou patana ai idia bouboulaia. Inai danu, Ierusalema ese ia laulaulaia oreana idia noholaia taudia ese edia tomadiho, idia gwauraia Keristani tomadihona, be hisiu edia toadia tahua karana, babalau, bona matabodaga karadia ida idia haboua; unai be Bala tomadiho henia dalana hegeregerena.—Sepanaia 1:4, 5.
3 Kerisendom ena politikol gunalaia taudia momo idia ura bada taunimanima ese do idia itadia dubu lalonai. To Iuda ena “lohia taudia” hegeregeredia, idia haida ese taunimanima idia hadikaia, ‘idia boiboi laionadia’ bona idia hitolo mase “uda sisiadia” hegeregeredia. (Sepanaia 3:1-3) Politikol dalana ai edia hesiai idia lao henia taudia ese ‘edia biagudia edia ruma be kohu dekenai idia hahonua, inai kohu be dagedage bona koikoi dekena amo idia abia.’ (Sepanaia 1:9) Lalo-ani monina henia karadia bona kara gagevadia be momo herea. Gavamani momo, Kerisendom lalonai bona murimurinai, ese tuari oreadia edia Iehova ena orea taudia, iena Witness taudia, idia ‘hekokoroku henidia’; idia dadaraidia, tomadiho oreana kererena ta bamona. (Sepanaia 2:8; Kara 24:5, 14) Unai bamona politikol gunalaia taudia bona edia orea taudia be Sepanaia ese ia perovetalaia, ia gwau: “Edia siliva o edia golo ese do idia hamauridia diba lasi, badina be Lohiabada ena badu dinana dekenai, iena badu siahuna ena lahi ese, tanobada ena kahana ibounai do ia gabua ore. Ia ese tanobada dekenai noho taudia ibounai, be do ia hadikaia ore haraga. Ia ese idia do ia haorea momokani.”—Sepanaia 1:18.
“Iena Badu Dinana Dekenai, Lohiabada ese Umui Do Ia Naria”
4 Lagani 607 B.C.E. ai, Iuda noholaia taudia iboudiai idia haoredia lasi. Unai hegeregerena, taunimanima haida be Dirava ena dina badana amo do idia roho mauri. Iehova ese ena peroveta tauna Sepanaia ena amo ia hereva henidia, ia gwau: “Lohiabada ena badu dinana be umui dekenai ia do ginidae lasi neganai, do umui guriguri hebou. Umui manau taudia ibounai e, Lohiabada ena oda umui kamonai henia noho taudia e, Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.”—Sepanaia 2:2, 3.
5 Inai tanobada ena dokona negana ai, unai peroveta herevana idia kamonai henia taudia ginigunadia be lauma lsraela taudia oredia, horoa Keristani taudia unai. (Roma 2:28, 29; 9:6; Galatia 6:16) Kara maoromaoro bona lalo-manau idia tahua bona Iehova ena hahemaoro herevadia idia matauraia, unai dainai ia ese Babulonia Badana, tanobada ibounai ena tomadiho koikoi basileiana, amo ia hamauridia bena lagani 1919 ai ia hanamodia lou. Unai nega amo, unai orena taudia mai edia kamonai ese Iehova ena hahemaoro herevadia Kerisendom ena tomadiho oreadia bona tanobada besedia latadiai be idia harorolaia mai edia gari lasi, bona lagani 1922 amo unai kara idia goadalaia.
6 Unai orena taudia mai edia kamonai be Sepanaia ese ia perovetalaia, ia gwau: “Bona umui bogaragina ai bese ta do lau hanohoa, lalo-manau bona lalo-manada besena, bona idia ese edia roho-mauri gabuna do idia tahua, Iehova ena ladana ai. Israela taudia oredia ese kara dikana ta do idia karaia lasi, hereva koikoina ta do idia gwauraia lasi, bona hereva koikoi gwauraia malana be edia ududia ai do ia noho lasi; badina be do idia aniani bona do idia hekure, bona ta ese do ia hagaridia lasi.” (Sepanaia 3:12, 13, NW) Nega ibounai unai horoa Keristani taudia ese Iehova ena ladana idia abia isi, bona lagani 1931 ai inai ladana Iehova ena Witness taudia idia abia negana amo unai kara idia habadaia. (Isaia 43:10-12) Iehova ena lohia siahuna idia harorolaia badabada, unai amo iena ladana idia hanamoa, bona unai be edia roho mauri gabuna ai ia lao. (Aonega Herevadia 18:10) Iehova ese lauma aniani momo ia henidia, bona lauma paradaisona ai idia noho mai edia gari lasi.—Sepanaia 3:16, 17.
“Emui Ladana Do Lau Hanamoa Bona Habadaia”
7 Orena taudia edia kara, Iehova ena ladana laloa bada karana bona ena Hereva ena taravatu maoromaorodia badinaia karana, be lalo-momokani taudia ese idia itaia bona idia laloa. Idia itaia edia kara be idau, bona inai tanobada ena politik bona tomadiho gunalaia taudia edia kara kereredia bona edia koikoi be ma idau. Iehova ese “[lauma] Israela taudia” oredia ia hanamoa vadaeni. Ia abidia hidi iena ladana do idia gwauraia, bona edia ladana be tanobada besedia bogaragidiai ia hanamoa. Sepanaia ese unai ia perovetalaia, ia gwau: “Bese idauidau edia huanai umui noho taudia, do lau mailaia lou, emui gabu korikori dekenai. Emui ladana do lau hanamoa bona habadaia, tanobada kahana ibounai dekenai, bona emui noho namo ma do lau havaraia lou. Lau inai Lohiabada lau hereva vadaeni.”—Sepanaia 3:20.
8 Lagani 1935 amo, taunimanima milioni momo edia lalona idia parara Iehova ese orena taudia ia hanamodia. Unai lauma Iuda taudia, o Israela taudia, murinai idia raka mai edia moale ida, idia gwau: ‘Umui danu do ita lao, badina be ai be ai kamonai vadaeni, Dirava be umui dekenai ia noho.’ (Sekaraia 8:23) Unai “mamoe idaudia” idia diba unai horoa orena taudia be ‘hesiai tauna mai ena kamonai bona mai ena kara maoromaoro,’ Keriso ese ia “iena [tanobada] kohu ibounai naria tauna” ai ia halaoa tauna. Hesiai tauna oreana ese nega korikori ai ia hegaegaelaia anianina be idia ese idia ania mai edia tanikiu ida.—Ioane 10:16; Mataio 24:45-47.
9 Orena taudia badinai, unai mamoe idaudia milioni momo ese “gado goevadaena” hegeregerena noho bona hereva daladia idia dibaia.a Unai gado be Iehova ese Sepanaia ena amo ia perovetalaia, ia gwau: “Unai neganai lau ese bese idauidau edia gado do lau haidaudia, gado goevadaena do lau henidia, Iehova ena ladana do idia noinoi henia totona, bona ena hesiai do idia lao henia mai edia lalo-tamona ida totona.” (Sepanaia 3:9, NW) Oibe, mamoe idaudia be “orea maragi” taudia ida Iehova ena hesiai idia lao henia “mai edia lalo-tamona ida”; “Basileia ena Sivarai Namona be tanobada ibounai dekenai . . . idia harorolaia,” bese iboudiai hadibaia totona.—Luka 12:32; Mataio 24:14.
“Lohiabada Ena Dina be Do Ia Ginidae”
10 Aposetolo Petero ese lauma helaga amo ia torea herevana be horoa orena taudia ese idia laloatao: “Lohiabada . . . ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa. To Lohiabada ena Dina be do ia ginidae, henaoa tauna ia ginidae bamona.” (2 Petero 3:9, 10) Iehova ena dina be iseda negai do ia ginidae herevana be hesiai tauna oreana taudia ese nega ta idia daradaralaia lasi. Unai dina badana ena matamana ai, Iehova ena hahemaoro karadia be Kerisendom, Ierusalema ese ia laulaulaia gauna unai, bona Babulonia Badana orena latadiai do idia vara.—Sepanaia 1:2-4; Apokalupo 17:1, 5; 19:1, 2.
11 Orena taudia mai edia kamonai be idia moale, badina be lagani 1919 ai Iehova ese Babulonia Badana, tanobada ibounai ena tomadiho koikoi basileiana, ena lauma diburana amo ia hamauridia dainai. Sepanaia ena peroveta herevana be ia momokani idia dekenai: “Siona taudia e, mai moale bada danu ane do umui abia. Israela taudia e, do umui boiboi. Ierusalema taudia e, mai emui kudoudia ibounai do umui moale! Lohiabada ese emui matakani ia haorea vadaeni. Ia ese umui idia hadikaia gwauraia taudia ia negedia lao vadaeni. Lohiabada, Israela ena King, be umui dekenai ia noho. Gau ta do umui gari henia lou lasi. Unai dina ia ginidae neganai, Ierusalema dekenai do idia gwau, ‘Siona taudia e, do umui gari lasi. Emui imadia do umui ha-aukaia, do umui manoka lasi. Lohiabada, emui Dirava be umui dekenai ia noho, bona iena siahu ese kwalimu umui dekenai ia henia noho.’ ”—Sepanaia 3:14-17.
12 Horoa orena taudia idia laloa Iehova be idia bogaragidiai, bona gau momo ese unai idia hamomokania. Unai dainai, Dirava ese ia henidia gaukarana idia karaia mai edia gari lasi. Basileia sivaraina namona bona Iehova ena hahemaoro herevadia Kerisendom, bona Babulonia Badana orena, bona Satani ena tanobada dikana ibounai latadiai be idia harorolaia vadaeni. Lagani 1919 amo, nega namodia bona dikadia ai, Dirava ena hahegani idia badinaia: “Siona taudia e, do umui gari lasi. Emui imadia do umui ha-aukaia, do umui manoka lasi.” Pepapepa, magasin, buka, bona buklet, Iehova ena Basileia gwauraia gaudia, bilioni momo idia hariharilaia, idia hesiku lasi. Edia haheitalai amo mamoe idaudia edia abidadama idia hagoadaia; lagani 1935 ema bona hari unai mamoe ese idia bamodia.
“Emui Imadia Do Umui Ha-aukaia”
13 Iehova ena dina badana ‘totona ita naria noho’ lalonai, Sepanaia ena peroveta herevana ese ita edena bamona ia durua diba? Gau ginigunana be, namona be do ita naria namonamo, Sepanaia ena negai idia noho Iuda taudia hegeregeredia ai do ita lao garina. Iehova gavaia karana idia rakatania, badina be idia abia dae lasi Iehova ena dina be kahirakahira. Reana unai Iuda taudia ese edia lalohadai idia gwauraia hedinarai lasi, to edia kara ese idia hahedinaraia idia abia dae momokani lasi Iehova ena dina badana be kahirakahira. Iehova totona idia naria noho lasi, to moni gogoa karana idia goadalaia.—Sepanaia 1:12, 13; 3:8.
14 Namo lasi hari inai negai ita laloa daradara matamaia. Iseda darana ai o iseda lalona ai bema ita gwau Iehova ena dina be do daudau, unai be aonega lasi karana. (2 Petero 3:1-4, 10) Namona be Iehova gavaia karana do ita rakatania lasi bona iena hesiai gaukarana ai ‘do ita manoka lasi.’ Anina be “Sivarai Namona” harorolaia gaukarana ai do ita “lahedo” lasi.”—Aonega Herevadia 10:4; Mareko 13:10.
Lalohadai Kererena Tuari Henia
15 Gau iharuana be, namona be do ita naria namonamo, lauma gaudia laloa lasi lalohadaina ese ita do ia hamanokaia garina. West tanodia momo ai, unai lalohadai ese sivarai namona harorolaia taudia haida edia lalona ia hamanokaia diba. Sepanaia ena negai unai lalohadai ia noho. Iehova be ena peroveta tauna amo ia gwau: “Gau ta idia laloa lasi taudia edia davana do lau henia. Idia gwau, ‘Lohiabada ese ita hanamoa kara ta, o ita hadikaia kara ta, be do ia karaia lasi.’ ” (Sepanaia 1:12) A. B. Davidson ese buka ladana Cambridge Bible for Schools and Colleges lalonai ia gwau, unai siri ese ia gwauraia taudia “edia lalona idia duhu idia lao, ela bona Dirava ese tanobada besedia edia kara do ia hadokodia herevana idia laloa lasi o idia abia dae lasi.”
16 Hari inai negai tanobada ena kahana momo ai unai lalohadai be bada, bona moni momo besedia ai ia be bada herea. Kerisendom ena tomadiho oreadia taudia danu idia abia dae lasi Iehova Dirava ese hari inai negai tanobada besedia edia kara do ia hadokoa. Basileia sivaraina namona ita hamaorolaidia toho negadiai, ita idia dadaraia mai edia kiri, o mai edia badu ida idia gwau: “Lau ura lasi.” Unai dainai, haroro gaukarana ita karaia noho be auka. Iseda haheauka ia tohoa. To Sepanaia ena peroveta herevana amo Iehova ese ena orea taudia mai edia kamonai ia hagoadaia, ia gwau: “Emui imadia do umui ha-aukaia, do umui manoka lasi. Lohiabada, emui Dirava be umui dekenai ia noho, bona iena siahu ese kwalimu umui dekenai ia henia noho. Lohiabada ese umui do ia moalelaia bada, bona iena lalokau dekena amo, mauri matamata umui dekenai do ia henia. Umui totona Dirava do ia moale, mai ena ane abia danu.”—Sepanaia 3:16, 17.
17 Momokani, Iehova ena orea taudia edia sivarai ese ia hahedinaraia, orena taudia bona hari idia buruka mamoe idaudia ese mamoe gogodia gaukarana bada hereana idia karaia vadaeni, inai dina gabedia ai. Nega daudau lalonai unai Keristani taudia iboudiai mai edia kamonai be idia haheauka noho. Ena be Kerisendom lalonai momo ese edia hereva idia laloa lasi, to edia lalona idia do goada noho. Unai dainai, namona be mamoe idaudia matamatadia edia lalona do idia manoka lasi, tano momo dekenai taunimanima momo ese lauma gaudia idia laloa lasi dainai. Namona be ‘edia imadia do idia ha-aukaia, do idia manoka lasi.’ Namona be nega namodia iboudiai Gima Kohorona, Noga!, bona buka namodia ma haida do idia hariharilaia toho; unai gau amo mamoe bamona taudia do idia durudia diba, Iehova ena dina badana bona ia murinai do idia vara hahenamodia edia sivarai momokanina do idia dibaia totona.
Dina Badana Ita Naria Noho Lalonai, Ita Raka Vaira!
18 Iesu ia gwau: “Iena lalona do ia goada noho ela bona dokona, unai tauna be do ia mauri.” (Mataio 24:13) Unai dainai, Iehova ena dina badana ita naria noho lalonai, ‘iseda imadia bona iseda tuidia do idia manoka’ lasi be namo! (Isaia 35:3, 4) Sepanaia ena peroveta herevana ese iseda lalona ia hagoadaia lou, ia gwau Iehova ‘ena siahu ese kwalimu umui dekenai ia henia noho.’ (Sepanaia 3:17) Oibe, Iehova ese “hutuma bada herea” be “hisihisi badana” ena dokona amo do ia hamauridia; unai neganai ena Natuna do ia oda henia, politikol besedia, iena orea taudia idia ‘hekokoroku henidia’ noho besedia, do ia hamakohia maragimaragi.—Apokalupo 7:9, 14, NW; Sepanaia 2:10, 11; Salamo 2:7-9.
19 Iehova ena dina badana ia mai kahirakahira lalonai, namona be do ita raka vaira mai eda goada ida, bona ena hesiai do ita lao henia ‘mai eda lalo-tamona ida’! (Sepanaia 3:9, NW) Bena unai dainai, ‘iena badu dinana dekenai,’ Iehova ese ita bona ma taunimanima momo herea ‘do ia naria,’ bona ita ese ena ladana helagana hahelagaia karana do ita itaia.—Sepanaia 2:3.
[Footnotes]
a “Gado goevadaena” herevadia momo be The Watchtower, April 1, 1991, rau 20-5, bona May 1, 1991, rau 10-20 lalodiai.
Riviu
◻ Edena dala amo Kerisendom ena tomadiho dalana be Sepanaia ena negai idia badinaia dalana hegeregerena?
◻ Edena dala amo politikol gunalaia taudia hari inai negai be Sepanaia ena negai idia noho “lohia taudia” hegeregeredia?
◻ Dahaka gwauhamata Sepanaia lalonai be orena taudia dekenai idia momokani vadaeni?
◻ Taunimanima milioni momo be dahaka idia lalo-pararalaia?
◻ Dahaka dainai Iehova ena hesiai gaukarana dekenai iseda imadia do ita ha-aukaia, do ita manoka lasi be namo?
[Study Questions]
1. Baibel tahua namonamo tauna ta ese Sepanaia ena peroveta herevana be edena bamona ia gwauraia?
2. Sepanaia ena negai idia vara karadia bona hari inai negai Kerisendom lalonai idia vara karadia be edena bamona idia hegeregere?
3. Tanobada ena gunalaia taudia bona ena gavamani momo be edena bamona ita gwauraia diba, bona Sepanaia ese dahaka ia perovetalaia?
4. Dahaka ese ia hahedinaraia haida be Iehova ena dina badana amo do idia roho mauri, bona edena bamona do idia kara be namo?
5. Inai dokona neganai, daidia ese Sepanaia ena hereva idia kamonai henia guna, bona Iehova ese edena bamona ia gaukaralaidia?
6. (a) Orena taudia mai edia kamonai be Sepanaia ese edena bamona ia perovetalaia? (b) Unai peroveta herevana be edena bamona ia momokani vadaeni?
7, 8. (a) Dahaka peroveta herevana ma ta be lauma Israela orena dekenai ia momokani vadaeni? (b) Taunimanima milioni momo be dahaka idia lalo-pararalaia, bona oi ese unai be edena bamona oi laloa?
9. Taunimanima milioni momo be dahaka gado idia dibaia bona idia manadalaia vadaeni, bona dahaka gaukara badana lalonai mamoe idaudia be horoa orena taudia ida idia gaukara hebou “mai edia lalo-tamona ida”?
10. Horoa orena taudia be nega ibounai dahaka idia diba momokani, bona edia orea do ia ore lasi ela bona dahaka do ia vara?
11, 12. (a) Dahaka peroveta herevana ma ta, Sepanaia ena, be orena taudia dekenai ia momokani vadaeni? (b) Inai hereva, “Emui imadia do umui ha-aukaia, do umui manoka lasi,” be horoa orena taudia ese edena bamona idia kamonai henia?
13, 14. (a) Dahaka dainai Iuda taudia haida ese Iehova ena hesiai lao henia karana idia rakatania, bona unai be edena bamona ia hedinarai? (b) Edena bamona ita kara be aonega dalana lasi, bona dahaka gaukara lalonai ‘iseda imadia do ita ha-aukaia, do ita manoka lasi’ be namo?
15. Iehova ena hesiai lao henia karana ai, dahaka ese ita ia hamanokaia diba, bona Sepanaia ese unai hekwakwanai edena bamona ia perovetalaia?
16. Kerisendom ena tomadiho oreadia taudia momo edia lalohadai be dahaka, to Iehova ese ita edena bamona ia hagoadaia?
17. Mamoe idaudia matamatadia ese dahaka haheitalai namona do idia tohotohoa be namo, bona edena bamona?
18, 19. (a) Mataio 24:13 and Isaia 35:3, 4 ese ita edena bamona idia hagoadaia do ita haheauka noho totona? (b) Bema mai eda lalo-tamona ida Iehova ena hesiai gaukarana ai ita raka vaira, ia ese ita edena bamona do ia hanamoa?
[Pictures on page 15]
Sepanaia hegeregerena, horoa Keristani taudia oredia mai edia kamonai ese Iehova ena hahemaoro herevadia idia harorolaia mai edia gari lasi
[Pictures on page 18]
Ena be taunimanima ese lauma gaudia idia laloa lasi, to unai ese “mamoe idaudia” edia lalona ia hamanokaia lasi