Emu Headava Gwauhamatana Oi Hamomokania!

HEADAVA dinana be moale dinana mai anina bada. Tau bona hahine idia karaia gwauhamatana metauna be mai anina edia mauri dinadia oredia iboudiai lalodiai. Headava hebouna ai idia hebou taudia ese unai gwauhamata metauna idia kamonai, to ia kamonai Tauna badana be Iehova Dirava.

Baibel ese headava karaia daladia ia gwauraia hidi lasi. To headava be Dirava ena amo, unai dainai taunimanima ese vaia tomadiho karana ta lalonai headava gwauhamatadia idia gwauraia. Lagani haida lalodiai Iehova ena Witness taudia ese inai headava gwauhamatana idia gaukaralaia: “Lau, —⁠— ese oi, —⁠— lau adavaia inai, oi do lau lalokau henia bona oi do lau naria, iseda mauri dinadia iboudiai lalodiai, bona unai bamona do lau karaia, headava ia havaraia Diravana ese taravatu Keristani (tatau/hahine) ia henia hegeregerena.”a

Inai Oi Laloa

Bema oi headava gwauraia, namona be unai gwauhamata ena anina dobuna oi laloa guna, headava dinana ia do ginidae lasi neganai. Solomona ia gwau: “Oiemu uduna dekenai do oi hereva haragaharaga lasi, bona Dirava dekenai do oi gwauhamata haragaharaga lasi.” (Hadibaia Tauna 5:2) Bema oi headava vadaeni, be edena bamona? Iehova vairanai oi gwauraia vadaeni gwauhamatana metauna ena anina bada oi laloa dobu be namo. Oi hamomokania noho, eiava? Keristani taudia ese edia gwauhamata idia lalodia bada. Solomona be ma ia gwau: “Oiemu gwauhamata ena anina do oi karaia. Do oi gwauhamata be ia namo, to do oi gwauhamata, bona anina do oi karaia lasi, be dika. Oiemu uduna do oi naria, vadaeni oiemu hereva ese, kara dika dekenai oi do idia hakaua lasi. Bona oi ese Dirava ena hahelagaia tauna do oi hamaoroa lasi, ‘Unai gwauhamata be lau gwauraia kerere.’ ”​—⁠Hadibaia Tauna 5:​4-6.

Bema headava gwauhamatana ena hereva ta ta oi laloa, unai ese emu lalo-parara unai gwauhamata metauna dekenai do ia habadaia.

“Lau, ​—​— ese oi”: Gwauhamata ena hereva ginigunadia unai. Idia amo oi hahedinaraia sibomu emu lalohadai hegeregerena oi headava.

Baibel ia gwau lasi Keristani taudia do idia headava be namo. Iesu Keriso ia headava lasi, bona ia gwau headava lasi maurina “do ia abia dae diba tauna ese do ia abia dae.” (Mataio 19:10-​12) To Iesu ena aposetolo momo be headava taudia. (Luka 4:​38; 1 Korinto 9:5) Unai ese ia hahedinaraia ta be sibona ena lalona do ia hadaia do ia headava eiava lasi. Baibel ia gwau lasi ta ese ma ta ia doria diba do ia headava totona.

Unai dainai, headava maurina oi abia hidi be sibomu emu maduna. Reana oi ese emu adavana oi abia hidi. Headava gwauhamatana lalonai inai hereva, ‘Lau ese oi ​—⁠​—⁠’ be oi gwauraia neganai, emu adavana oi abia dae, mai ena namo​—⁠bona mai ena dika danu.

Gabeai emu adavana ena kara haida, guna oi diba lasi karadia, be do oi davaria. Nega haida do oi lalohisihisilaia. Baibel ia gwau “ita ibounai ita kara dika vadaeni, bona Dirava ena hairaina . . . ita abia be hegeregere lasi.” (Roma 3:​23) Unai dainai reana emu kara do oi haidaua be namo, emu adavana hamoalea totona. Reana unai be auka, bona reana nega haida emu lalona do ia hesiku. To mani oi laloa, headava gwauhamatana be Iehova vairanai oi karaia. Oi ia durua diba, do oi kwalimu totona.

“Lau adavaia inai”: Headava ginigunana ai, Iehova Dirava ese Heva be Adamu ia henia do ia adavaia totona neganai, ia gwau “ruaosi be tauanina tamona do idia lao.” (Genese 2:​24; Mataio 19:​4-6) Unai hegeregerena, headava ese taunimanima rua ia kwatudia hebou momokani. Headava amo hebamo matamatana oi abia. Ta oi abia dae emu adavana ai do ia lao. Unai hebamo be idau vaitani. Hebamo idaudia dekenai dika sisina idia havaraia karadia ese headava lalonai hisihisi bada idia havaraia diba.

Haheitalai ta be inai: Efeso 4:​26 ai Baibel ia gwau: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea.” Reana nega haida oi be emu varavara o emu turana oi badu henia negadiai, emu badu oi haorea haraga lasi. To emu adavana ena hebamo ese emu varavara bona emu turana edia ia hereaia momokani. Bema ia dekenai maino oi karaia haraga lasi, reana unai ese emui hebamo heheni dalana hereana do ia hadikaia.

Bema oi be emu adavana ida umui heai, oi be nega daudau unai oi badulaia, a? Emui hepapahuahu idia ore lasi ela bona dina haida idia ore, a? Hekwakwanai do idia vara negadiai, emu headava gwauhamatana hamomokania totona, oi naria lasi ela bona kerukeru, to emu adavana ida maino do umui karaia haraga be namo. Anina be ena dika do oi gwauatao bona do oi laloaboio, bona sibomu emu kerere do oi gwauraidia hedinarai danu.​—⁠Salamo 51:5; Luka 17:​3, 4.

“Oi do lau lalokau henia”: Ia headava gwauraia tauna ia gwauhamata, ena adavana ‘do ia lalokau henia bona do ia naria.’ Unai lalokau ena anina ta be matamana ai ia ura henia ura-henina. To ura-heni sibona be hegeregere lasi. Keristani tauna ese ena adavana dekenai ia gwauhamatalaia lalokauna be dobu bona mai anina bada.

Efeso 5:​25 ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona.” Iesu ena lalokau ekalesia dekenai be tau bona hahine idia lalokau heheni lalokauna hegeregerena lasi. Inai hereva “lalokau henia,” unai siri lalonai idia torea, be hereva ta a·gaʹpe amo; unai hereva ena anina be lalohadai maorona ese ia hakaua lalokauna. Unai siri lalonai Baibel ese tatau ia hagania, edia adavadia do idia lalokau henia hanaihanai bona edia lalokau do idia haidaua lasi.

Unai lalokau be lalokau ena davana sibona lasi. Tau ese ena adavana ena namo ia tahua guna, sibona ena be gabeai, bona hahine ese ena adavana unai bamona ia lalokau henia danu. (Filipi 2:4) Emu adavana lalokau henia dobu dalana bema oi tahua, unai ese oi do ia durua, emu headava gwauhamatana do oi badinaia totona.

“Oi do lau naria”: Anina be ia do oi naria mai emu lalokau ida, badina be oi laloa bada. Namona be emu lalokau be emu hereva bona emu kara amo oi hahedinaraia! Hahine ia ura bada ena adavana ese ena lalokau do ia hahedinaraia hanaihanai. Reana ena tau ese tauanina dalana ai ia naria namonamo, to unai sibona be hegeregere lasi. Hahine haida edia aniani be hegeregere bona edia ruma be namo, to idia lalohisihisi bada, badina be edia adavadia ese idia lalodia lasi.

To, bema hahine ta ia diba ena adavana ese ia lalokau henia bona ia laloa bada, ia moale diba. Bona tau danu be unai bamona. Lalokau herevadia momokanidia ese lalokau korikori idia habadaia. Solomona ena Ane lalonai, mamoe naridia tauna ia gwau: “Egu lalokau e, egu adavana e, oiemu ura henia ese lau ia hamoalea bada noho. Oiemu lalokau ena namo ese, uaina ena namo ia hereaia noho. Oiemu dehoro ena bonana ese, muramura ibounai edia bonana ia hereaia noho.”​—⁠Solomona ena Ane 4:​10.

“Bona oi do lau matauraia”: Lagani handred momo lalodiai tatau haida ese hahine idia hadikadia. World Health magasin ia gwau, hari inai negai danu “tano iboudiai ai taga taudia bona ogogami taudia ese hahine idia dagedage henidia. Bese momo ai, idia laloa tau ese ena adavana ia botaia be maoro.” Tatau momo be unai bamona idia kara lasi. To, toana be tatau momo ese hahine idia laloa momo gaudia idia laloa momokani lasi. Unai dainai hahine momo ese tatau idia abidadama henia lasi. Hahine haida idia gwau, “Egu adavana lau lalokau henia, to lau matauraia diba lasi!”

To Iehova Dirava ese ia laloa bada hahinena ena kara be inai bamona: Ena be nega ta ta ia laloa ena adavana ena kara be hegeregere lasi, to ia matauraia toho. Ia diba ena tau be mai ena dagi, Dirava ese ia henia gauna. (1 Korinto 11:3; Efeso 5:​23) Iena adavana ia matauraia bada karana be ena tomadiho karana ta, Dirava ia kamonai henia dainai ia karaia. Dirava ese hahine namodia edia kamonai ia laloa.​—⁠Efeso 5:​33; 1 Petero 3:​1-6; ma danu Heberu 6:​10 itaia.

Namona be tau be ena adavana ida idia hemataurai heheni, hahegani mo dainai lasi, to edia kara edia davana bamona. Ta ese ena adavana ia hereva dika henia be maoro lasi. Emu adavana oi gwauraia dika be lalokau o hemataurai karana lasi. Bema emu adavana ena kerere oi hahedinaraidia eiava haida dekenai oi kikilaidia, unai ese namo ia havaraia diba lasi. Ta be ena hevaseha amo ia hahedinaraia diba ia be mai ena hemataurai lasi, lasi momokani. Efeso 4:​29, 32 be mai anina tau bona hahine ruaosi dekenai; ia gwau: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, . . . Ibounai ta ta do umui bogahisihisi henia.”

‘Dirava ese taravatu . . . ia henia hegeregerena’: Dirava ia ura iseda dala do ita abia hidi bona do ita kara mai eda ura kwalimu ida. Headava taravatudia momo amo ita ia hametaua lasi. To, iseda namo havaraia totona, hakaua herevadia haida ia henia.

Hari inai negai, headava sisibalaia bukadia be momo, bona taunimanima momo be sibodia mai edia lalohadai. To oi naria namonamo! Idia halasia headava herevadia momo be Baibel ena hereva hegeregeredia lasi.

Inai oi diba be namo: Tau ta mai ena adavana be idau bona ma tau ta mai ena adavana be ma idau. Idia be snowflake hegeregeredia; daudau amo edia toadia be hegeregere, to idia ta ta iboudiai be idauidau. Oi be emu adavana ida umui kara heheni dalana be ma tau ta mai ena adavana edia hegeregerena lasi. Unai dainai haida edia lalohadai oi abia dae haraga lasi. Taunimanima ta ena sisiba be hegeregere lasi headava iboudiai dekenai!

To Baibel ena hahegani iboudiai be momokani bona mai anina. Aposetolo Paulo ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa.” (2 Timoteo 3:​16; Salamo 119:151) Bema Baibel oi duahia bona ena hahediba herevadia be dina ta ta iboudiai oi badinaia, emu headava gwauhamatana do oi badinaia diba.​—⁠Salamo 119:105.

“Iseda mauri dinadia iboudiai lalodiai”: Anina be nega daudau do umui noho hebou. Dirava ia hahegani “tau ese tamana sinana do ia rakatania, iena adavana dekenai do ia noho.” (Genese 2:​24) Iehova ia ura umui ruaosi do umui noho hebou. Iena hesiai umui lao henia hebou. Iena Hereva umui stadilaia hebou. Nega umui atoa, do umui raka hebou, do umui helai hebou, bona do umui aniani hebou. Mauri umui moalelaia hebou!

Haida be dala idia tahua, dina ta ta iboudiai edia adavadia ida do idia hereva heheni. Lagani momo idia headava murinai danu, unai be mai anina bada headava moalelaia karana ai.

‘Dirava ese taravatu . . . ia henia hegeregerena’: Headava be harihari gauna Iehova Dirava ena amo; ia ese headava ia havaraia. (Aonega Herevadia 19:14) Bema ena dala oi badinaia lasi, unai ese emu headava do ia hadikaia bona Dirava ese oi do ia lalo-namo henia lasi. To, bema tau mai ena adavana ida ese Iehova ena hereva badinaia karana amo idia hahedinaraia ia ida idia hetura namonamo karana idia goadalaia, idia be ma haida ida do idia maino, bona ruaosi do idia maino heheni danu.​—⁠Aonega Herevadia 16:7.

Mani inai oi laloaboio lasi: Emu headava gwauhamatana ia kamonai Tauna badana be Iehova. Unai gwauhamata metauna oi badinaia noho, bena emu headava ese Iehova Dirava do ia hanamoa bona do ia hahairaia!

[Footnotes]

[Blurb/Pictures on page 22]

Headava taudia ta ta mai ena adavana mai ena adavana be “snowflake” hegeregeredia. Reana daudau amo edia toadia be hegeregere, to idia be idauidau

[Credit Line]

Snow Crystals/Dover