Pama Auna amo Gau ta Ita Dibaia

“TOANA be namo herea, ena hairai be idau momokani.” Unai be Baibel ensaiklopidia ta ese deit huahua ena pama auna ia herevalaia dalana. Baibel negadiai bona hari inai negai, deit huahua ena pama audia ese Aigupito ena Naila Kourana idia hahairaia, bona Negeb Tano Kaukauna ai tubutubu gaudia idia tubu gabuna dekenai gabu ikerukeru namona ia henia.

Pama audia haida hegeregerena, deit huahua ena pama au idia gini maoromaoro. Haida edia lata be mita 30 bamona bona lagani 150 lalonai huahua idia do havaraia noho. Oibe, deit huahua ena pama auna ena toana be namo herea bona huahua momo herea ia atoa. Lagani ta ta ai unai au be deit huahua edia orea haida ia atoa. Unai orea tamona sibona dekenai deit huahua 1,000 mai kahana ia atoa diba. Diba bada tauna ta ese deit huahua ia herevalaia, ia gwau: “Daika daika be . . . sitoa sibona dekena amo idia hakaukaua deit huahuadia ia abia bona mamia be au amo idia abia matamata neganai idia ania gauna ena digara idia diba lasi.”

Baibel ese taunimanima haida be pama audia ida ia hahegeregerea be maoro. Huahua momo ia havaraia pama auna ta hegeregerena, tau ta be Dirava ena matana ai ia namo noho totona, kara maoromaoro ia badinaia bona gaukara namodia ia karaia noho be namo. (Mataio 7:​17-20) Unai badina dainai, Solomona ena dubu bona Esekiela ese ena matahanai lalonai ia itaia dubuna lalonai pama audia idia koroa, herahera gaudia bamona. (1 King Taudia 6:​29, 32, 35; Esekiela 40:​14-​16, 20, 22) Unai dainai, Dirava ese ta ena tomadiho karana ia abia dae totona, namona be ena kara idia namo, deit huahua ena pama auna be au namona hegeregerena. Dirava ena Hereva ia gwau: “Kara maoromaoro taudia, be do idia tubu daekau namo herea momokani, huahua namodia ia atoa [pama] au namona bamona.”​—⁠Salamo 92:12.