Tanobada be Gabu Namona ta ai Do Oi Halaoa Diba, A?

Tanobada be Gabu Namona ta ai Do Oi Halaoa Diba, A?

“Politikol karadia ese taunimanima edia noho dalana do ia hanamoa diba lasi. Ia be hegeregere lasi guna idia abia dae kara namodia ia havaraia lou totona. Edia palani namo hereadia ese tau bona hahine edia hebamo eiava headava, tama ena natudia naria maduna do ia huaia, bona dika lalohisihisilaia eiava hemarailaia mamina idia havaraia lou diba lasi . . . Taravatu ese ita lalo-hekwarahilaia kara kereredia amo idia vara hekwakwanai momo ia haorea diba lasi.”

OI ESE unai hereva, guna U.S. gavamani ia durua tauna ta ena hereva, oi abia dae, a? Bema oi abia dae, hari inai negai mataganigani, famili lalonai lalokau lasi karana, goeva lasi karadia, diba lasi karadia, bona taunimanima edia noho dalana ia hadikaia gaudia ma haida dainai idia vara hekwakwanai momo hanamoa dalana be dahaka? Taunimanima haida idia laloa hanamoa dalana be lasi, unai dainai edia diba hegeregerena idia noho sibona. Ma haida idia laloa dina ta, mai ena siahu bona gunalaia tauna namona, sedira tomadiho gunalaia tauna ta, do ia hedinarai bona dala maorona dekenai idia do ia hakaudia.

Momokani, lagani 2000 gunanai, taunimanima idia ura Iesu Keriso be edia king ai idia halaoa badina idia diba ia be Dirava ese ia siaia bona ia be gunalaia tauna namona ai do ia lao. To, Iesu be edia lalohadai ia dibaia neganai, karaharaga unai gabu ia rakatania. (Ioane 6:14, 15) Gabeai, Roma ena gavana ta dekenai ia hereva hedinarai ia gwau: “Lauegu Basileia be inai tanobada gauna lasi.” (Ioane 18:36) To, hari inai negai, momo be Iesu ia karaia bamona idia karaia lasi—⁠tomadiho gunalaia taudia danu, ena be sibodia idia gwauraia iena murinai idia raka taudia. Unai taudia haida be idia hekwarahi inai tanobada be gabu namona ta ai idia halaoa toho totona, unai dainai tanobada idia lohiaia taudia edia lalona idia veria toho eiava idia danu be politikol dagi idia abia. Lagani 1960 bona 1970 murinai idia vara karadia amo unai ita itaia diba.

Tomadiho Ena Hekwarahi Tanobada Ia Hanamoa Totona

Lagani 1960 lalonai, Latin-America tanodia dekenai tomadiho stadilaia taudia haida ese ogogami bona hisihisi taudia totona heduru daladia idia tahua. Unai ia vara totona, idia ese ruhaia lalohadai ta idia havaraia, idia gwau Keriso be Baibel ese ia herevalaia dalana sibona dekenai hahemauri tauna lasi to politikol bona moni dalanai danu. United States dekenai, dubu gunalaia taudia haida be kara maoromaoro taravatudia abia dae lasi karana idia lalo-hekwarahilaia bada dainai, orea ta, ladana Moral Majority, idia haginia. Edia ura badana be ruma bese hagoadaia karadia do idia haginia diba taudia idia abia hidi politikol gaukarana idia karaia totona. Unai hegeregerena, Muslim tanodia momo dekenai, grup haida be kara koikoi bona kara gageva idia koua toho totona Koran badinaia karana idia habadaia.

Unai bamona hekwarahi dainai, oi abia dae tanobada be gabu namona ta, a? Momokani, idia vara vadaeni gaudia ese idia hahedinaraia, kara maoromaorodia idia ore noho bona taga taudia bona ogogami taudia edia padana be ia bada noho, bona unai be unai ruhaia lalohadai idia laloa bada tanodia dekenai danu ia vara.

Moral Majority be ena ura gaudia badadia United States dekenai ia havaraia lasi dainai, lagani 1989 ai, unai orea ia haginia tauna, Jerry Falwell, ese unai orea ia koua. Orea ma haida ese ena gabu idia abia. To, inai hereva “moral majority” ia havaraia tauna, Paul Weyrich, be Christianity Today magasin dekenai ia gwau: “Herevana politikol dagi totona ai abia hidi taudia be idia uini, to unai ese ai abia dae mai anina bada palani edia anina idia havaraia lasi.” Bona ma ia gwau: “Taunimanima edia mauri dalana be ia dika momokani. Iseda noho dalana ia dika noho, guna ia vara bamona lasi, unai dika ia bada herea dainai politikol dala be hegeregere lasi.”

Niuspepa torea bona toretore tauna Cal Thomas be politikol dalana amo taunimanima edia mauri hanamoa karana lalonai iena lalohadai dekenai kerere gauna badana ia hahedinaraia, ia gwau: “Mauri hanamoa momokani karana be taunimanima ta ta ibounai amo do ia vara, politikol eleksen ai idia uini karana amo lasi, badina iseda hekwakwanai badadia be moni bona politikol dalanai lasi to idia be kara maoromaoro badinaia karana dekenai bona lauma dalanai.”

To taunimanima be sibodia idia abia dahaka be namo bona dika bona taravatu idia laloa lasi tanobadana dekenai kara maoromaoro badinaia lasi bona lauma dalana ai hekwakwanai be edena dala ai do idia hanamoa? Bema mai edia siahu bona lalo-momokani taudia—⁠tomadiho taudia eiava tomadiho lasi taudia—⁠ese inai tanobada be gabu namona ta ai idia halaoa diba lasi, vadaeni daika ese ia karaia diba? Sivarai gabena dekenai do ita itaia, haere ia noho. Momokani, unai haere dainai Iesu ia gwau ena Basileia be inai tanobada ena lasi.

[Picture Credit Lines on page 2]

[Picture Credit Lines on page 3]