Iseda Diba Hegeregerena Ita Karaia!

“OIEMU diba hegeregerena oi karaia.” Nega ta Iehova ena Witnes taudia edia Hakaua Oreana tauna ta ese misinari tauna ta dekenai unai sisiba namona ia henia. To dahaka dainai ia manada vadaeni haroro tauna dekenai unai bamona sisiba ia henia? Misinari momo be idia gari lasi bona idia be manumanu, gaigai, siahu, gorere, bona hekwakwanai idauidau idia haheaukalaia taudia, ani?

Iehova ena Witnes taudia edia misinari taudia be ita bamona tatau bona hahine sibona, idia be Keristani taudia bona edia lalokau badana Iehova bona taunimanima dekenai ese edia lalona ia veria dainai idau tanodia ai hesiai gaukara idia karaia. Idia gaukara goada, mai edia diba hegeregerena Iehova idia hesiai henia totona, bona ia amo goada idia tahua.​​—⁠Efeso 6:​10.

Misinari gaukarana ita dibaia totona, mani ita laloa ita be dina ta ai West Africa dekenai misinari rumana ta ita vadivadi henia.

Dina ta ai Misinari Gaukara Ita Karaia

Nega be kahirakahira 7:00 a.m. dabai. Nega maorona ai misinari rumana dekenai ita ginidae, idia ida dina ena siri ita herevalaia totona. Misinari taudia 10 ese ita idia welkam henia bona gabu idia atoa hegaegae, aniani teibolo badinai ita helai totona. Ita herevahereva lalonai, lagani momo misinari gaukara ia karaia taihuna ese haroro gaukara lalonai ia davaria kiri ia havaraia ekspiriens ia gwauraia hedinarai. To unai dina ai hereva ia naria seamani ese ita kiri taudia ia hadibaia, nega ia abia dina ena siri ita laloa totona, bona iseda herevahereva ita hadokoa. France gado ai dina ena siri do ita herevalaia. Unai gado ita diba lasi, to idia hereva dalana amo ia hedinarai goevagoeva inai idau gabu amo idia mai misinari taudia be unai gado idia diba namonamo.

Baibel ena hereva idia herevalaia murinai, mai kudouna ibounai ida guriguri ita gwauraia, bena aniani ita abia. Cornflakes bamona aniani ita abia sisina bada neganai, ita badinai ia helai misinari tauna ese ita ia hamaoroa namona be biku be eda aniani ida ita abia. Ita hamaoroa biku ita ura henia lasi, to ia gwauhamata unai gabu dekenai idia hadoa biku ita mamia neganai eda lalohadai do ita haidaua. Unai dainai eda aniani ida biku ita abia. Ia hereva maoro! Inai biku ena mamina be namo herea​​—⁠ice cream ena digara bamona! Bona ita idia hamaoroa ita ania paraoa be France taudia edia paraoa bamona bona hari dabai misinari rumana ena dala unai kahanai, sitoa maragina ta dekenai idia gabua.

Daba aniani murinai, dina ibounai misinari tadikaka bona ena adavana ida do ita gaukara hebou, edia ladana ita gwauraia Ben bona Karen. Ita ese inai West Africa tanona ena teritori namona ena sivarai ita kamonai vadaeni, bona ita ura bada unai sivarai ita hamomokania.

Basi naria gabuna dekenai ita ginidae neganai, taunimanima 12 bamona be unuseniai idia naria noho. Daudau lasi murinai, iseda misinari turadia be hahine bona ena natuna mero ida Baibel ena hereva ta idia herevalaia namonamo. France gado ita diba lasi dainai ita gini bona kiri sibona! Unai hahine be Gima Kohorona bona Noga! magasin ia abia noho lalonai, basi ia ginidae, bona nega tamona taunimanima ibounai idia daekau toho! Ita daekau totona ita hekwarahi neganai, iseda murina amo hutuma ese ita idia doria. Basi ena murina kahanai ita raka lao neganai ita moru lasi be mai hekwarahi. Basi ia lao matamaia neganai, ita dogoatao auka. Nega ta ta ai, basi ia stopu, bona taunimanima ma haida idia daekau. Idia guia taudia ma haida ita kiri henia bona ita idia kiri henia danu. Ita ura bada edia gado ai ita hereva diba!

Motuka ia heau noho lalonai, uindo amo dala ai edia gaukara idia karaia taudia ita itaia. Hahine rua idia raka hebou bona edia kwarana latanai gau metaudia idia huaia. Idia ta ese ena kwarana latanai ranu disi badana ia atoa. Hoihoi tauna ta ese dala badinai blanketi latanai herahera gaudia ia atoa bona ia ura hoihoilaidia. Gabu ibounai dekenai taunimanima ese gau idauidau momo herea idia hoihoilaia.

Karaharaga Ben, lau badinai ia gini, ia mamia gau ta ese ena aena ia kodoa. Unai gauna be dahaka? Basi ia honu momokani, to unai gauna ia mamia lou. Ena aena ia itaia. Ena aena badinai baege ta lalonai ia mauri daki ta ia noho, nega haida kwarana ia atoa daekau bona Ben ena aena ia kodoa! Ben ia gwau, reana daki ena biaguna ese ia abia lao maketi dekenai do ia hoihoilaia totona.

Iseda teritori dekenai ita ginidae neganai, ita moale badina ita kamonai do ita vadivadi henia gabuna be Africa taudia momo idia noho gabuna bamona. Ruma ginigunana kahirakahira ita lao neganai, Ben ese ena imana ia patapataia goada, ruma tauna ia kamonai totona. Tanobada ena inai kahana dekenai taunimanima be unai dala ai “iduara dekenai idia pidipidi.” Tau matamata ta ia hedinarai bona ia gwau ia bisi to ia ura gabeai unai daba ai do ita giroa lou.

Iduara ma ta dekenai, Ben ia diba lasi gadona ai ia hereva hahine ta ita davaria. Iena natuna mero ia boiria bona ia noinoi Ben ia herevalaia gauna do ia hahanaia. Ben ese ena hereva ia haorea murinai, hahine be Baibel ia herevalaia buklet ta ia abia, bona ena natuna mero ia gwauhamata ia dekenai do ia hahedinaraia. Ruma ihatoina dekenai, matamata taudia haida be ruma vairanai idia helai. Idia rua ese edia helai gauna idia rakatania haraga, vadivadi taudia idia helai diba totona. Tomadiho lalonai korosi gaukaralaia karana ita herevalaia namonamo. Palani ita karaia pura vairai do ita giroa mai totona. Hari nega ia abia, ruma ginigunana dekenai ita davaria ia bisi tauna matamatana ita vadivadi henia lou totona. Dala ta ai ia kamonai vadaeni, unai matamata taudia ida ita herevahereva. Ia be mai ena Baibel henanadai momo bona ia noinoi Baibel stadi do ia abia. Ben ese ena sediual ia itaia murinai, ia gwau hari nega hegeregerena vaira purana ai do ia giroa mai. Misinari rumana dekenai dina tubua aniani totona ita giroa lou lalonai, Ben bona Karen idia gwau edia Baibel stadi gaukara idia palanilaia namonamo be namo, badina Baibel stadi momo idia hamatamaia haraga diba, to reana idia naria namonamo diba lasi.

France gado idia diba namonamo dainai ita hanamodia. Ben ia gwau ia bona Karen be lagani 6 bamona misinari gaukara idia karaia, bona France gado idia manadalaia matamaia. Ita idia hamaoroa, gado matamata dibaia karana be auka, to haheauka ese anina namona ia havaraia.

Adorahi 12:⁠30 p.m. ai, misinari taudia ibounai be dina tubua aniani idia abia hebou. Ita idia hadibaia dina ta ta ai, misinari idauna ta idia abia hidi daba bona adorahi aniani ia hegaegaelaia totona bona unai murinai mereki do ia huridia. Hari dina ai, misinari ta ese mamina namona kokoroku ia gabua, France taudia ese idia karaia dalanai poteto ia gabua, bona tomato ia hegaegaelaia​​—⁠ia diba momo gauna!

Ben bona Karen edia palani adorahi totona be dahaka? Idia gwau taunimanima ibounai be adorahi 1:00 p.m. ia lao 3:00 p.m. ai, dina ena siahu dainai ruma dekenai idia noho, unai dainai nega momo misinari taudia ese unai nega ena kahana ta idia gaukaralaia, idia stadi eiava idia laga-ani totona. Karen ese ita ia hamaoroa misinari matamatadia ese karaharaga unai kara idia manadalaia, bona unai ita hoalaia lasi!

Laga-ani murinai, haroro gaukara dekenai ita giroa lou. Nega sisina daudau lalonai Ben ese ia davaria toho kamonai tauna be ruma dekenai ia do noho lasi, to Ben ese ena imana ia patapataia neganai tau matamata rua be iduara dekenai idia mai. Ita idia hamaoroa ruma tauna ese idia dekenai Ben ena vadivadi ia gwauraia bona idia ia hagoadaia Diba ese Mauri Dekenai Ita Ia Hakaua Lao bukana do idia abia. Mai moale ida idia dekenai unai buka ena kopi ta ita rakatania. Unai murinai, basi ita abia bona Karen ese kamonai hahinena ta ida ia karaia Baibel stadi gabuna dekenai ita lao.

Taunimanima momo idia noho daladia dekenai ita gui lalonai, Karen ese ita ia hamaoroa nega ta ma haida ida taksi ai idia gui hebou neganai unai hahine ia davaria. Karen ese unai hahine dekenai pepapepa ta ia henia, ena laolao ai do ia duahia totona. Hahine ese unai pepapepa ia duahia bona ma idauna ta ia noia. Unai pepapepa ia duahia mai ena ura bada ida. Idia ginidae neganai, Karen ese dala ia karaia unai hahine ena ruma dekenai ia do ia vadivadi henia bona Dirava Ia Ura Dahaka Ita Karaia? buklet amo Baibel stadi namona ia hamatamaia. Hari dina ai, Karen ese unai buklet ena kahana namba 5 do ia karaia.

Iseda dina be haroro gaukara lalonai ita moalelaia, to misinari gaukara dekenai iseda henanadai ma haida idia do noho. Iseda naria taudia ese ita idia hamaoroa ruma dekenai ita giroa lou neganai, idia ese aniani sisina do idia karaia bona iseda henanadai do idia haerelaia.

Idia Gaukara Noho Dalana

Idia gabua gatoi, French paraoana, bona sisi ita ania lalonai, misinari taudia edia noho dalana dekenai diba ma haida ita abia. Nega momo Monday ai idia laga-ani eiava sibodia edia gaukara idia karaia. Misinari taudia momo ese unai dina ai nega sisina idia gaukaralaia, edia famili bona turadia dekenai revareva idia torea totona. Misinari taudia dekenai edia gabu amo sivarai idia kamonai be gau badana, bona revareva idia siaia bona abia negana ai idia moale.

Misinari taudia be idia noho bona idia gaukara hebou dainai, namona be idia hebamo heheni bona lauma gaudia idia herevalaia karadia amo edia herevahereva dalana idia naria. Unai idia karaia totona, sibona edia Baibel stadi sediual idia badinaia, bona danu, Monday hanuaboi ibounai, misinari taudia be Baibel bona Gima Kohorona magasin idia stadilaia. Ben ia gwau, gabu idauidau amo idia mai misinari taudia idia noho hebou neganai, lalohadai idauidau idia vara, to lauma dalanai idia ia hagoadaia ruma bese stadi ese idia ia durua, maino bona lalo-tamona ai idia noho totona. Ia gwau sibona idia laloa bada lasi karana be heduru gauna badana danu.

Manau karana danu be gau badana. Misinari taudia idia siaia, haida ese idia hesiai henia lasi, to idia ese ma haida idia hesiai henia totona. Iseda turadia idia gwau herevana edena gado ita gaukaralaia, “Lau sori” ita gwauraia be auka, bona ta ese ia gwauraia o karaia kava gauna ta dainai sori herevana ia gwauraia be auka herea. Ben ese Abigaila ena sivarai Baibel amo ia herevalaia, ia ese ena adavana ena hemataurai lasi karana dainai sori herevana ia gwauraia bona unai amo dika badana ia havaraia hekwakwanai idia hanamoa. (1 Samuela 25:​23-​28) Ta be misinari tauna namona ai ia lao totona ‘maino ai ia noho’ be mai anina bada.​​—⁠2 Korinto 13:⁠11.

Hua iboudiai lalonai misinari taudia be hebou ta idia karaia, famili ena heau dalana idia herevalaia bona reana sediual lalonai gau haida idia haidaua totona. Unai murinai, aniani digarana namona idia moalelaia. Ita laloa unai dala be namo herea​​—⁠bona mamina namona.

Aniani ita haorea murinai, nega sisina lalonai misinari rumana ita itaia loaloa. Ita itaia, herevana ia be dava bada rumana lasi, to idia gaukara hebou ia goeva momokani totona. Unuseniai frisa, dabua huria masini, bona aveni idia noho. Karen ese ita ia hamaoroa siahu gabudia, West Africa bamona gabudia dekenai, reana daiutu hakerua masini idia noho danu. Noho gabu namodia bona aniani namona idia abia, bona edia tauanina idia naria dainai misinari taudia idia gorere lasi bona edia gaukara lalonai anina idia havaraia.

Namo Gaudia Idia Laloa

Ita moale bada inai gau ibounai ita itaia dainai. Ita ese misinari gaukara ita karaia diba, a? Edena bamona do ita diba? Iseda naria taudia ese gau haida idia hamaoroa do ita laloa totona.

Guna, ita idia hamaoroa, Keristani misinari taudia be sibona edia moale havaraia gau matamatadia idia tahua lasi. Idia ese Dirava ena gwauhamata namodia idia ura kamonai kudou-maoro taudia idia tahua. Misinari taudia ese hua iboudiai lalonai hora 140 ai haroro gaukara idia karaia, unai dainai haroro gaukara laloa bada karana be gau badana.

To ita laloa, ‘gaigai, ariha, bona manumanu be edena bamona?’ Ben ese ita ia hamaoroa, ena be unai gaudia be misinari gabudia momo dekenai idia noho, to misinari taudia ese idia manadalaidia. Ma ia gwau, misinari gabudia idauidau be mai edia namo, bona nega ia hanaia lalonai, misinari taudia ese edia gaukara ena namo gaudia idia laloa. Guna gau haida idia gwauraia “idau,” to nega sisina murinai idia idau lasi, bona nega haida idia moalelaidia. West Africa dekenai lagani momo ai misinari gaukara ia karaia hahinena ta be ia abia maduna dainai ena gabu dekenai ia giroa lou neganai ia gwau ena misinari gabuna ia rakatania be auka, guna ena noho gabuna ia rakatania be unai bamona ia auka lasi. Ena misinari gabuna be ena gabu bamona ai ia lao.

Oi Hegeregere, A?

Ben bona Karen ese gau momo idia gwauraia ita laloa totona. Oi be edena bamona? Nega ta oi laloa tano idauna ta dekenai reana oi ese misinari gaukara do oi karaia diba, a? Bema oibe, do oi davaria diba. Unai totona mai anina bada gauna ta be ful-taim hesiai gaukara oi ura henia bada bona taunimanima durua gaukarana oi moalelaia. Laloaboio lasi, misinari taudia be taunimanima goadadia lasi, to ita ibounai bamona tatau bona hahine sibona. Mai edia diba hegeregerena idia gaukara, mai anina bada gaukarana idia haorea totona.

[Pictures on page 27]

Baibel ena siri ta herevalaia karana amo dina ta ta idia hamatamaia

[Pictures on page 28, 29]

Laulau haida Africa amo

[Picture on page 29]

Misinari maurina be anina ia havaraia