Tama Sina E—Emui Natudia Dekenai mai Anina Bada Gaudia Umui Henia!

NATUDIA ese sisiba bona matahakani mai lalokauna idia abia be namo, bona tama sina ese unai idia henia be gau badana. Brazil hadibaia hahinena ta, Tania Zagury, ese unai ia herevalaia, ia gwau: “Natudia ibounai idia ura moale karadia idia tahua. Taravatu idia atoa be gau badana. Tama sina ese unai do idia karaia be namo. Bema unai idia karaia lasi, natudia do idia hakaua be auka.”

To, tano momo dekenai, inai taravatu lasi tanobadana dainai taunimanima ese sibona edia ura idia abia isi bona ataiai ia noho herevana idia badinaia be auka. Tama sina ese edeseni amo heduru idia abia diba? Dirava idia gari henia tama sina idia diba edia natudia be “Dirava ena harihari gauna.” (Salamo 127:⁠3) Unai dainai, natudia idia naria totona Dirava ena Hereva, Baibel, amo heduru idia tahua. Hegeregere, Aonega Herevadia 29:15 ia gwau: “Kwadia auna bona sisiba hereva ese, natuna dekenai aonega ia havaraia noho.”

Baibel lalonai inai hereva “kwadia auna” ena anina be panisi henia sibona lasi; ia ese kara hamaoromaoroa daladia ia hahedinaraia, herevana idia be dahaka. Momokani, reana nega momo hereva sibona idia hegeregere natuna ena gwau-edeede karana hamaoromaoroa totona. Aonega Herevadia 29:17 ia gwau: “Oiemu natuna tau do oi matakani henia, vadaeni ia ese laga-ani oi dekenai do ia henia. Ia ese oiemu laumana do ia hamoalea.”

Natudia ese matahakani mai lalokauna idia abia be namo, namo lasi karadia kokia totona. Unai bamona sisiba henia bona hamaoromaoroa karana ia hahedinaraia tama sina ese natuna idia laloa bada. (Aonega Herevadia 22:⁠6) Unai dainai tama sina e, umui hesiku lasi! Baibel ena sisiba namona umui badinaia neganai, Iehova Dirava umui hamoalea bona emui natudia ese umui do idia matauraia.