Duahia Taudia Edia Henanadai

Keristani hahine ese Dirava badinaia karana bona ena murimuri adavana kamonai henia karana be edena bamona ia laloa maoromaoro bema ena tau be tomadiho holide karadia ia karaia?

Ia laloa maoromaoro totona mai ena aonega bona diba ida ia kara be namo. Unai maduna ruaosi ia laloa maoromaoro totona ia hekwarahi be kara maorona. Iesu ese unai bamona dala ta ia sisibalaia, ia gwau: “Kaisara ena gau, Kaisara dekenai umui henia, to Dirava ena gau be Dirava dekenai umui henia.” (Mataio 22:21) Momokani, ia ese iseda maduna gavamani dekenai ia herevalaia, bona gabeai Paulo ese Keristani taudia ia hamaorodia danu gavamani idia kamonai henidia be namo. (Roma 13:⁠1) To, hahine ese ena maduna Dirava dekenai bona Baibel ena hereva hegeregerena iena maduna ena tau, murimuri tauna, dekenai ia lalodia maoromaoro totona, Iesu ena sisiba ia laloa diba.

Baibel ia gwau Keristani tauna ena maduna ginigunana be nega ibounai Siahu Ibounai Diravana do ia badinaia, bona Baibel ia diba namonamo tauna ese unai ia gorea diba lasi. (Kara 5:29) To, nega momo tomadiho momokani tauna be murimuri tauna mai ena siahu ena ura gaudia do ia karaia diba, to ia karaia lalonai Dirava ena taravatu hereadaedia do ia utua lasi.

Haheitalai namona ta be Heberu memero toi edia, Daniela karoa 3 dekenai ia noho. Edia gavamani biagua tauna, Nebukanesa, ese hahegani ia henia idia bona ma haida be Dura ena taora dekenai idia mai. Unai Heberu memero toi idia diba taunimanima be tomadiho koikoi kara do idia karaia dainai, reana do idia laloa unuseniai idia lao lasi be namo. Reana Daniela be gwaumaoro ia abia, to unai memero toi idia abia lasi.a Unai dainai hahegani hegeregerena unai gabu idia lao, to kara kererena ta do idia karaia lasi⁠​—⁠bona idia karaia lasi.​​—⁠Daniela 3:​1-18.

Unai hegeregerena, holide negadia ai murimuri tauna be reana ena Keristani adavana ia noia eiava hamaoroa ia ura momokani lasi karana ta ia karaia totona. Haheitalai haida mani oi laloa: Hahine ia hamaoroa, ia bona ma haida ese holide ta idia moalelaia dinana ai aniani idauna ta do ia nadua. Eiava ia hamaoroa ruma bese (iena hahine danu) be unai dina ai iena varavara do idia vadivadi henidia idia aniani hebou totona eiava idia herevahereva sibona. Eiava holide dinana ia do mai lasi neganai, ena hahine be sitoa dekenai ia lao neganai ia hamaoroa ia totona gau haida do ia hoia be namo​—⁠hegeregere holide dekenai idia ania aniani idaudia, harihari gaudia, eiava iena harihari gaudia ia kumia pepana bona kadi.

Unai neganai danu, Keristani hahine be lalona do ia hadaia tomadiho koikoi karadia lalonai do ia vareai lasi, to ena tau ia noia gaudia be edena bamona? Tau be ruma bese kwarana, bona Dirava ena Hereva ia gwau: “Hahine taudia e, emui adavana do umui kamonai henia. Badina inai be maoro Lohiabada ena vairana dekenai.” (Kolose 3:18) Unai bamona negadia ai, tau ia kamonai henia lalonai Dirava ia badinaia, a? Ia ese ena adavana kamonai henia karana bona unai ia hereaia gauna, Dirava kamonai henia karana, do ia lalodia maoromaoro dalana do ia abia hidi.

Ma nega haida, iena tau ese ia noia aniani idauna ta do ia nadua, badina unai aniani ia ura henia eiava badina iena kara ta be nega badana ta ai unai aniani ia ania. Ia ura tau dekenai lalokau ia hahedinaraia bona ena kwara dagina ia matauraia. Bema tau ese ia noia holide dinana dainai unai aniani ia nadua, do ia karaia, a? Keristani hahine haida be reana unai idia karaia neganai edia lalona ena hemami ia dika lasi, reana idia laloa unai be dina ta ta aniani hegaegaelaia karana ta sibona. Momokani, abidadama Keristani hahine ese unai gauna dainai holide dinana ta ia laloa lasi, ena be tau ese unai ia laloa. Unai hegeregerena, reana tau ia ura hua eiava lagani ta ta edia dina haida ai iena varavara do ia vadivadi henidia neganai, hahine do ia mai danu. Bema unai be holide dinana ta, do ia lao diba danu, a? Eiava ia ura tau ena ura gaudia ia hoia, bona iena hoihoi negana ai tau totona ia hoia gaudia be tau ese dahaka totona ia gaukaralaia be do ia laloa lasi, a?

Momokani, Keristani hahinena ese ma haida do ia laloa​—⁠edia hemami unai gauna dekenai ia laloa. (Filipi 2:⁠4) Iena kara do ia naria namonamo, unai amo ma haida do idia laloa lasi ia be unai holide ia laloa bada, hegeregere unai Heberu taudia toi be Dura ena taora idia lao henia lalonai reana idia ura lasi ma haida ese idia itadia. Unai dainai reana tau ida do ia herevahereva bena do ia diba bema tau be iena hemami ia laloa dainai sibona ese unai holide gaudia haida do ia karaia eiava, unai amo ia dekenai lalokau bona hemataurai ia hahedinaraia hahinena ia durua. Reana do ia itaia, aonega karana be unai gauna ia dadaraia, badina be bema unai nega ai hahine ia ura lasi idia ida tomadiho koikoi karadia ia badinaia, idia ruaosi do idia hemarai. Oibe, mai manau ida herevahereva guna karana amo maino dalana ta idia davaria diba.​​—⁠Aonega Herevadia 22:⁠3.

Unai ena anina korikori be, kamonai Keristani tauna ese gau ibounai do ia laloa namonamo, bena do ia karaia karana ia abia hidi. Dirava kamonai henia karana do ia atoa guna, Heberu memero toiosi idia karaia bamona. (1 Korinto 10:31) To, Keristani tauna be unai ia laloatao lalonai, ia sibona ese iena ruma bese eiava hanua lalonai siahu tauna ese ia noia gaudia amo ia badinaia diba karadia maorodia do ia abia hidi.

[Footnote]