Lalona Ena Mamina Namona Ena Davana be Dahaka?

“KOTA ese Gavamani Ia Oda Henia R$20,000 Ia Abia Totona.” Unai hereva kwarana idauna be vanegai Brazil ena niuspepa ta ladana Correio do Povo dekenai ia hedinarai. Unai hereva ese pos opesi dekenai ia gaukara tauna Luiz Alvo de Araújo, gavamani dekenai ena tano ena kahana ia hoihoilaia tauna, ena sivarai ia herevalaia. Tano be gavamani dekenai ia henia murinai, Luiz ia hoa bada badina gavamani amo idia herevalaia monina sibona lasi to ma R$20,000 (K28,000 bamona) ia abia!

Gavamani dekenai unai idia henia kava monina ia henia giroa lou be ia hekwarahi bada. Nega momo gavamani dipatmen ia vadivadi henia bona ia kwalimu lasi murinai, Luiz idia hamaoroa loea ta ia abia bona kota dekenai unai hekwakwanai idia hamaoromaoroa. Gavamani be moni do ia abia bona kota ena davana do ia henia totona oda ia henia diadi ia gwau, “tau ta be kerere ia karaia, bona taravatu maragimaragidia dainai, ta be ia diba lasi edena dala ai unai gauna do idia hamaoromaoroa. Unai bamona gauna be guna lau itaia lasi.”

Luiz be Iehova ena Witnes tauna ta, bona ia gwau: “Egu lalona ena mamina be Baibel amo lau ia hadibaia dainai bema gau ta be lauegu lasi do lau dogoatao diba lasi. Unai moni lau henia lou be namo.”

Momo idia laloa unai bamona laloa dalana be ia idau eiava unai idia lalo-pararalaia diba lasi. To Dirava ena Hereva ese ia hahedinaraia Keristani taudia momokanidia be siahu idia abia taudia idia kara henidia lalonai edia lalona ena mamina ia namo. (Roma 13:⁠5) Iehova ena Witnes taudia be edia lalona idia hadaia edia ‘kudouna ena laloa be ia maoromaoro bona nega ibounai kara maoromaoro do idia karaia.’​​—⁠Heberu 13:⁠18.