Dika ta ese Tanobada Besena Ia Hadikaia Ore!

Oi noholaia tanobadana ena siti idauidau, mauri dalana, saiens gaudia idauidau, bona idia noho taudia bilioni momo mani oi itaia. Ena toana be do ia dika diba lasi, ani? Oi laloa inai tanobada gaudia be nega ta idia boio diba, a? Reana unai oi laloa be auka. To, buka namona ta ia hahedinaraia hari inai tanobada besena ia do tubu lasi neganai dika ta ese idaunegai tanobada besena ia hadikaia ore. Unai oi diba, a?

UNAI tanobada besena be diba bada lasi iduhu haida taudia lasi. Unai dika ese ia hadikaia ore taudia be, mai edia siti, imana gaukara idauidau dekenai idia kwalimu, bona saiens aonegana idia abia. To, Baibel ena sivarai ese ita ia hamaoroa, bese kwarana, Aberahamo, ia do vara lasi laganidia 352 idia noho neganai, hua iharuana ena dina namba 17 ai, abata ta ia vara bona taunimanima ibounai ia hadikaia ore.a

Unai sivarai be maoro, a? Unai bamona gauna ta ia vara momokani, a? Inai nega ena tanobada besena ia vara lasi neganai idaunegai tanobada besena ia noho bona dika ta ese ia hadikadia ore, a? Bema oibe, dahaka dainai idia ia hadikadia ore? Dahaka kerere ia vara? Bona ia vara dikana amo gau ta ita dibaia diba, a?

Idaunegai Tanobada Besena Ia Hadikaia Ore, A?

Bema unai bamona dika badana ia vara momokani, do ita laloaboio lasi. Unai dainai, tano momo dekenai unai dika laloatao sivaraidia idia noho. Hegeregere, Baibel ai idia torea maoromaoro dinana mani oi laloa. Idaunegai kalenda ena hua iharuana be hari ita gwauraia October huanai ia lao November huanai. Unai dainai dina namba 17 be November ena dina ginigunana bamona. Unai dainai, toana be unai nega ai gabu momo dekenai mase taudia edia aria karadia idia karaia kava lasi.

Abata ia hamomokania gaudia ma haida be taunimanima edia sene herevadia ai idia gwauraia. Idaunegai besedia ibounai be mai edia gori ta, idia hahedinaraia edia tubuna be tanobada ibounai abatana amo idia roho mauri. Africa ena Pygmy taudia, Europe ena Celt taudia, South America ena Inca taudia​​—⁠ibounai be unai bamona gori idia gwauraia, bona Alaska, Australia, China, India, Lithuania, Mexico, Micronesia, New Zealand, bona North America ena kahana haida taudia danu, bona unai be gabu haida sibona.

Momokani, nega ia heau lalonai gori idia hahairaidia, to idia ibounai edia kahana haida ese inai hereva badadia idia hahedinaraia: Dirava be taunimanima edia kara dika dainai ia badu. Abata badana ia mailaia. Taunimanima ibounai ia hamasea. To, kara maoromaoro taudia haida sibona idia mauri. Lagatoi idia karaia bena idia bona animal be lagatoi lalonai idia noho dainai idia mauri. Gabeai, manu idia siaia tano kaukauna idia tahua totona. Vadaeni, lagatoi be ororo dekenai ia helai. Roho mauri taudia be lagatoi amo idia raka-lasi neganai boubou gauna idia henia.

Unai ese dahaka ia hamomokania? Unai bamona gaudia idia hegeregere be idia vara kava lasi. Unai gori idauidau be Baibel ena idaunegai sivaraina idia hamomokania, anina be abata ese tanobada bese gunana ia hadikaia ore neganai idia roho mauri taudia edia amo taunimanima ibounai idia mai. Unai dainai, idia vara gaudia ita diba totona gori sivaraidia dekenai ita tahua be anina lasi. Baibel ena Heberu Revarevadia lalonai idia naria namonamo sivaraina ia noho.​​—⁠Genese, karoa 6-8.

Baibel lalonai Dirava ena lauma amo ia vara sivarai ia noho, ia giroa lou ela bona taunimanima edia mauri ia matamaia negana. To, gau haida ese idia hamomokania unai be taunimanima edia histori sibona lasi. Ena peroveta herevadia idia momokani bona ena aonega dobuna ese ia hahedinaraia ia amo Dirava ese taunimanima ia hereva henia. Baibel be gori hegeregeredia lasi, Baibel lalonai be ladana, deit, bese taudia edia ladana edia lista bona gabu ta ta ena idaunegai sivaraidia idia noho. Ita dekenai Abata ia do vara lasi maurina ena toana ia hadibaia bona unai tanobada besena ibounai ia ore haraga ena badina ia hahedinaraia.

Unai idaunegai taudia be dahaka kerere idia karaia? Sivarai gabena ese unai henanadai ia haerelaia. Hari iseda mauri ena namo do ia noho eiava lasi idia laloa momo taudia dekenai unai be henanadai badana ta.

[Footnote]

[Chart on page 4]

(For fully formatted text, see publication)

Tanobada Ibounai Lalonai Abata Goridia

Tano Hegeregere Gaudia 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Dirava be kara dika dainai ia badu

2: Abata ese dika ia havaraia

3: Dirava ese ia hamasedia

4: Dirava ese hadibaia hereva ia henidia

5: Taunimanima haida sibona idia roho mauri

6: Lagatoi ta lalonai idia mauri

7: Animal idia mauri

8: Manu eiava mauri gaudia ma haida idia siaia

9: Vadaeni ororo ta dekenai ia helai

10: Boubou gauna idia henia