“Inai be Do Ia Hisihisi Sisina”

GUNA unai bamona hereva oi kamonai, a? Reana doketa ta eiava sista ta ese medikol heduruna ia do henia lasi neganai unai bamona herevadia idia gwauraia.

Reana, unai medikol heduruna oi dadaraia lasi unai hisihisi oi mamia lasi totona. To, ena hisihisi oi haheaukalaia, vaira negana ai namo oi abia totona. Hekwakwanai badadia ai, unai heduru oi abia dae eiava oi dadaraia ese mauri eiava mase ia havaraia diba.

Ena be reana ita ibounai be medikol doketa ese ia itaia hanaihanai lasi, to ita goevadae lasi taudia ibounai ese matahakani, eiava sisiba ita abia be namo, ena be nega haida unai be mai ena hisihisi. (Ieremia 10:23) Baibel ese ia hahedinaraia natudia be unai do idia abia be namo, ia gwau: “Natuna maragidia ibounai ese kavakava idia karaia noho, to emu natuna oi kwadia neganai, inai kavakava kara do ia rakatania momokani.”​—⁠Aonega Herevadia 22:⁠15.

Unai kara ai, kwadia auna ese tama sina edia siahu ia laulaulaia. Momokani, natudia be matahakani idia ura henia lasi. Bema ena anina be panisi idia abia, reana do idia badu. To, aonega bona lalokau tama sina ese edia natuna ena lalo-hisihisi idia itaia, to iena namo idia laloa bada. Keristani tama sina idia diba Dirava ena Hereva be momokani, ia gwau: “Tamana ese metau bona hisihisi ita dekenai ia henia neganai, iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.”​—⁠Heberu 12:11; Aonega Herevadia 13:⁠24.

Momokani, natudia sibona ese matahakani idia abia lasi. Taunimanima badadia ese idia abia danu be namo. Baibel be taunimanima badadia ia hereva henia, ia gwau: “Hadibaia hereva do oi dogoatao, do oi rakatania lasi. Inai diba do oi gimaia, badina ia be oiemu mauri ena badina.” (Aonega Herevadia 4:13) Oibe, aonega taudia​—⁠matamata bona buruka​—⁠ese Dirava ena Hereva, Baibel, amo matahakani do idia abia, badina unai bamona idia karaia neganai, mauri do idia abia.