Edena Dala ai Tanobada Ena Dokona amo Oi Roho Mauri Diba?

BAIBEL ese inai nega ena dokona ia herevalaia, ia gwau ia be “badu ena dina, hisihisi bona laloa hekwarahi ena dina, hadikaia kava, bona hadikaia ore ena dina. Dibura bona lalohisihisi ena dina. Ori koremakorema, bona diari lasi ena dina.” (Sepanaia 1:​15) Momokani, unai bamona dina do oi ura lasi oi itaia! To, aposetolo Petero ese Keristani taudia ma haida ia hadibaia “Dirava ena Dina do umui naria noho, bona do ia ginidae haraga totona do umui gaukara goada noho. Unai Dina neganai lahi ese guba do ia araia ore, bona siahu badana ese guba dekenai noho hisiu, hua bona dina do ia gabua ore. To Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”​​—⁠2 Petero 3:​12, 13.

Petero be guba korikori bona tanobada korikori hadikaia karana ia herevalaia lasi. To unai “guba” bona “tanobada,” Petero ia herevalaia gaudia, be hari taunimanima edia gavamani dikadia bona Dirava idia dadaraia taudia idia laulaulaia. “Lohiabada ena dina” be tanobada do ia hadikaia lasi to “tanobada ena kara dika taudia do ia hadikadia ore.” (Isaia 13:⁠9) Hari inai tanobada dikana lalonai, idia vara “kara dika rohoroho ibounai” idia taitailaia bona idia lalohisihisilaia taudia dekenai, Iehova ena dina be hahemauri dinana.​​—⁠Esekiela 9:⁠4.

Edena dala ai ta be Iehova ena dina badana mai garina dekena amo ia roho mauri diba? Iehova ena hereva be ena peroveta tauna ta dekenai ia hahedinaraia, ia ese unai henanadai ena haere ia henia: “Iehova ena ladana idia boiboilaia taudia ibounai be do idia heau mauri.” (Ioela 1:1; 2:​31, 32, NW ) Iehova ena Witnes taudia be mai moale ida oi do idia durua Iehova ena ladana boiboilaia karana ena anina oi dibaia totona.