Duahia Taudia Edia Henanadai

Dirava dekenai guriguri ita henia neganai, bema ita gwau lasi “Iesu ena ladana ai,” unai be maoro, a?

Baibel ia hahedinaraia bema Keristani taudia idia ura Iehova dekenai idia guriguri, Iesu ena ladana ai idia karaia be namo. Iesu be ena hahediba taudia ia hamaoroa: “Tamana dekenai do idia lao taudia ibounai edia dala ta be lasi, lau sibona.” Ma ia gwau: “Egu ladana dekenai do umui noia gaudia ibounai do lau karaia, vadaeni egu Tamana ese hairai do ia abia, iena Natuna dainai. Bema gau ta lauegu ladana dekenai umui noia, lau be do lau karaia.”​—⁠Ioane 14:​6, 13, 14.

Cyclopedia of Biblical, Theological, and Ecclesiastical Literature ese Iesu ena dagi idauna ta ia herevalaia, ia gwau: “Dirava sibona dekenai guriguri ita henia be namo, to Iesu, Maino Havaraia Tauna, ena ladana amo ita henia. Unai dainai, seint taudia eiava aneru dekenai noinoi ita henia be anina lasi, bona ia be Dirava hadikaia karana. Mauri gaudia tomadiho henia karadia ibounai, herevana edia hairai be bada, be kaivakuku tomadiho henia karana, bona Dirava ena taravatu helagana ese unai ia taravatua.”

To edena bamona bema tau ta dekenai gau namona ta ia vara murinai ia gwau, “Iehova lau ura oi lau tanikiu henia” to “Iesu ena ladanai” ia atoa lasi? Unai be maoro lasi, a? Reana lasi. Bema Keristani ta dekenai dika ta ia vara kava bona ia boiboi: “Iehova e, mani lau oi durua!” Dirava ese ena hesiai tauna do ia durua lasi badina “Iesu ena ladanai” ia atoa lasi, a? Ita diba Dirava be unai bamona lasi.

To, namona be inai ita laloa, bema mai eda gado regena ida Dirava dekena ita hereva, ena anina lasi be unai be guriguri ta. Hegeregere, Kaino ese ena tadina Abela ia hamasea murinai, Iehova ese ia hahemaoro henia, bona Kaino ia gwau: “Lauegu dika davana be metau herea. Inai tano bona oiemu vairana dekena amo lau oi lulua noho. Lau be ruma lasi bona loa kava tauna do lau lao tanobada dekenai, bona sedira lau idia davaria taudia ese lau do idia alaia mase.” (Genese 4:​13, 14) Ena be Kaino ese Iehova ia hereva henia, to mai badu ida ia be kara dika ena huahua ia maumauraia sibona.

Baibel ese ita ia hamaoroa: “Dirava ese hekokoroku taudia edia dala ia koua, to manau taudia dekenai iena hariharibada ia henia.” Bema ta be Ataiai Momokani Diravana ia hereva henia, bona ia be taunimanima ta bamona ia hereva henia, unai be manau lasi karana. (Iamesi 4:6; Salamo 47:2; Apokalupo 14:⁠7) Dirava ena Hereva ese Iesu ena dagi ia herevalaia, bona bema tau ta ese unai dagi ia diba, to mai ena ura ida guriguri ia henia bona Iesu Keriso ia laloa lasi, unai danu be hemataurai lasi karana.​—⁠Luka 1:​32, 33.

To ai gwau lasi Iehova ia ura guriguri henia dalana tamona sibona ita gaukaralaia. Gau badana be unai tauna ena kudouna be namo. (1 Samuela 16:⁠7) Aposetolo taudia edia negai, Roma ami ofesa, Korenelio, be “nega ibounai Dirava dekenai ia guriguri.” Korenelio, kopina ia utua lasi Idau Bese tauna, be Iehova dekenai iena mauri ia gwauhamatalaia lasi. Ena be iena guriguri be Iesu ena ladana ai ia henia lasi, to ‘Dirava dekenai idia daekau, bona ia laloa noho.’ Dahaka dainai? Badina ‘kudouna ia tohoa’ Diravana ia itaia Korenelio be ‘Dirava ia badinaia bona ia dekenai ia gari tauna.’ (Kara 10:​2, 4; Aonega Herevadia 17:⁠3) Korenelio be “Iesu, Nasareta tauna,” ia dibaia neganai, lauma helaga ia abia bona Iesu ena hahediba tauna, bona bapatiso ia abia tauna, ai ia lao.​—⁠Kara 10:​30-48.

Ita tahua namonamo murinai, inai ita davaria: Taunimanima ese Dirava do ia kamonai eiava do ia kamonai henia lasi guriguri abia hidi gaukarana idia karaia lasi. Bema nega ta Keristani tauna be hereva ta ia henia Dirava dekenai bona hereva ta, hegeregere “Iesu ena ladanai” ia gaukaralaia lasi, namo lasi unai ia lalohisihisilaia bada. Iehova be ita karaia diba lasi gaudia ia diba bona ia ura ita ia durua. (Salamo 103:​12-14) Ita diba bema ‘Dirava ena Natuna ita abidadama henia, gau ta iena ura hegeregerena ita noia neganai, ia ese ita dekenai do ia kamonai.’ (1 Ioane 5:​13, 14) Keristani taudia momokanidia ese Baibel dekenai Iesu ena gaukara Iehova ena ura lalonai idia abia dae, bona taunimanima vairanai guriguri idia henia neganai, unai idia laloa bada. Bona mai kamonai ida idia hekwarahi Iesu idia matauraia bona ia amo Dirava dekenai edia guriguri idia henia.