Aonega Karana be Oi Heau Oho

HARI inai tanobada lalonai, gari lasi toana, hepapahuahu hamatamaia haraga karana, bona lalo-ani karadia momo oi davaria. To, taunimanima ese unai bamona gaudia amo ia heau oho tauna idia gwauraia manoka, eiava idia gwau ia gari kava. Reana idia ese ia idia kirikirilaia.

To, Baibel ese ia hahedinaraia goevagoeva nega haida ita heau oho be aonega bona gari lasi karana. Unai hereva hamomokania totona, Iesu Keriso be ena hahediba taudia ia do siaia lasi neganai, ia hamaorodia: “Hanua ta dekenai umui do idia dagedage henia neganai be idau gabu dekenai do umui heau lao.” (Mataio 10:23) Oibe, Iesu ena hahediba taudia be dagedage taudia amo idia heau be namo. Hahediba taudia ese mai dagedage ida ma haida idia doria lasi edia tomadiho idia haidaua totona. To maino sivaraina idia gwauraia. (Mataio 10:​11-​14; Kara 10:​34-​37) Unai dainai, badu ia do vara lasi neganai, namona be Keristani taudia be badu idia havaraia taudia amo idia heau siri, bona idia amo idia noho daudau. Unai bamona idia karaia neganai, edia lalona ena mamina namona idia dogoatao diba bona edia turana karana Iehova ida idia hadikaia lasi.​—2 Korinto 4:​1, 2.

Haheitalai dikana ta be Baibel buka Aonega Herevadia lalonai ita davaria. Tau matamata ena sivarai ia gwauraia, hedibagani amo ia heau oho lasi, to ariara hahine murinai ia lao, “boromakau be do idia alaia gabuna, dekenai ia lao bamona.” Dahaka ia vara? Hedibagani amo ia raka siri lasi dainai, ena mauri ibounai ia hadikaia.​—Aonega Herevadia 7:​5-8, 21-​23.

Bema matabodaga eiava dika ma ta karaia hedibaganina oi davaria neganai be edena bamona? Dirava ena Hereva hegeregerena, kara maorona be unai gabu do oi rakatania haraga, ia amo oi noho daudau be namo.—Aonega Herevadia 4:​14, 15; 1 Korinto 6:​18; 2 Timoteo 2:​22.