‘Ranu Namona Gabuna Dekenai Lau Ia Hakaua Noho’

BAIBEL tanodia edia siahu bada negana ai, mamoe be dina iboudiai ranu idia inua be namo. Unai dainai, mamoe naria tauna ena gaukara ena kahana badana be ena mamoe dekenai ranu ia henia. Nega haida mamoe naria taudia be ranu guri amo mamoe ena ranu idia abia, inua gauna lalonai idia bubua, unai amo mamoe ese idia inua diba. (Genese 29:​1-3) To, medu negana lalonai, sinavai maragidia bona sinavai badadia badinai be maino dekenai laga-ani “ranu namona gabuna” ia noho.​​—⁠Salamo 23:⁠2.

Mamoe naria tauna namona ia diba edeseniai iena mamoe totona ranu bona tano namona do ia davaria. Ena diba unai gabu dekenai ese ia hahedinaraia ena mamoe do idia mauri noho. Davida, lagani momo Iudea ena ororo dekenai mamoe ia naria tauna, be Dirava ese lauma dalanai ita ia hakaua dalana be unai mamoe naria tauna ese tano namona bona mauri ranuna dekenai iena mamoe ia hakaua dalana danu ia hahegeregerea. Davida ia gwau: “Ranu namona gabuna dekenai . . . lau ia hakaua noho.”​​—⁠Salamo 23:​1-3.

Lagani haida murinai, Iehova ese ena peroveta tauna Esekiela amo, unai bamona haheitalai ia gaukaralaia. Ia gwauhamata iena taunimanima be idia lao tanodia idauidau amo do ia hakaudia mai, mamoe naria tauna ese iena mamoe ia hakaudia bamona. Ia hamaorodia: “Israela ena ororo bona sinavai namodia gabudia dekenai do lau hakaudia mai.”​​—⁠Esekiela 34:⁠13.

Iehova Dirava danu be lauma ranuna henia karana ia laloa bada. Apokalupo bukana ese “mauri ranuna ena sinavai” ta ia herevalaia, Dirava ena helai gabuna amo ia aru mai noho. (Apokalupo 22:⁠1) Taunimanima ibounai dekenai boiboi ta ia lao, unai sinavai amo ranu do idia inua totona. ‘Ranu idia ura henia taudia be mauri ranuna idia abia diba, ia be davana lasi.’​​—⁠Apokalupo 22:⁠17.

Unai mauri ranuna be Dirava ese mauri hanaihanai totona ia henia gaudia ia laulaulaia. Ta be unai ranu ia inua matamaia diba bema ‘Dirava momokani tamona ia diba noho bona Iesu Keriso, ia ese ia siaia tauna danu ia diba noho.’​​—⁠Ioane 17:⁠3.