Do Oi Lalo-Hekwarahi Lasi, A?
TAUNIMANIMA momo be reana do idia mamia bema ia idia gwauraia lalo-hekwarahi lasi tauna, ia karaharaga lasi, ia manau bona gau idauidau ia haheaukalaia tauna, unai be hanamoa herevana. To, lalo-hekwarahi lasi karana be mai ena kahana ma ta. Baibel ia gwau: “Kavakava taudia ese, aonega idia tahua lasi [“lalo-hekwarahi lasi karana,” NW] dainai dika idia davaria noho.” (Aonega Herevadia 1:32) Unai ena anina be dahaka?
Baibel haida ese unai Heberu gado herevana idia tore hanai, “laloa momo lasi karana” (American Standard Version), “sibona ena diba ia laloa bada karana” (The New American Bible), bona “sibona ena lalona ia hegeregere karana.” (The New English Bible) Unai dala dekenai, lalo-hekwarahi lasi karana be lahedo bona ma gau haida laloa bada lasi karana danu ia hakapua, unai dainai kavakava bona aonega lasi karana ida idia hakapua danu.
Aposetolo edia negai, Laodikea kongregesen dekenai idia noho Keristani taudia be lauma dalana ai idia dabu gaudia idia lalo-hekwarahilaia lasi eiava idia laloa lasi. Sibodia edia namo idia heagilaia bona idia gwau “gau ibounai [idia] dekenai be hegeregere vadaeni.” Iesu Keriso ese idia ia sisiba henidia, edia Keristani lalo-goada do idia hamauria lou totona.—Apokalupo 3:14-19.
Laloa lasi karana be Noa ena nega lalonai idia noho taudia edia kara ta. Idia be mauri ena tauanina gaudia idia goadalaia, “idia aniani noho, idia inuinu noho, idia headava noho, taunimanima ese idia laloa lasi dahaka do ia vara, . . . bona abata badana ia ginidae, vadaeni abata ranu ese ibounai ia abia lao.” Iesu ma ia gwau: “Taunimanima ena Natuna do ia mai neganai [“ena noho,” NW ] danu unai bamona do ia vara.”—Mataio 24:37-39.
Baibel ena peroveta herevadia idia guguru ese ia hahedinaraia ita be Iesu Keriso, ‘taunimanima ena Natuna, ena noho’ negana ai ita noho. Namona be sibona eda lalona ia hegeregere karana, laloa lasi karana, sibona eda diba laloa bada karana—dala kererena ai lalo-hekwarahi lasi karadia unai—do ita hahedinaraia lasi.—Luka 21:29-36.