Lalo-Maino Nega Dikadia Lalonai

HARI inai negai ita kamonai nius be lalo-maino sivaraidia lasi. Tau ta ia gwau: “Hari idia vara gaudia ese lalohisihisi idia havaraia dainai, nega momo ai daradara bema 6 o’klok nius do ai itaia, eiava lasi.” Tanobada be tuari, gari idia havaraia karadia, hisihisi, taravatu utua karadia, bona gorere amo ia honu​​—⁠reana kahirakahira unai bamona dika ta do ita davaria bema ita do davaria lasi.

Unai dika idauidau be Baibel ese ia perovetalaia maoromaoro. Iesu ese iseda nega ia herevalaia neganai, ia gwau tuari badadia, daihanai goreredia, hitolo bada, bona tano mareremarere do idia vara. (Luka 21:​10, 11) Unai hegeregerena, aposetolo Paulo ese “metau dikadia momo do idia vara” negana ia herevalaia danu, unai nega ai taunimanima do idia dagedage, moni do idia mataganigani henia, bona kara namodia do idia ura henia lasi. Unai nega ia gwauraia “nega ena dokona.”​​—⁠2 Timoteo 3:​1-5.

Unai dainai, tanobada dekenai idia vara gaudia ita herevalaia neganai, nius dekenai idia herevalaia gaudia be Baibel ese ia perovetalaia gaudia hegeregerena. To unai dala sibona dekenai idia hegeregere. Baibel ese lalohadai ma ta ia gwauraia to nius ese ia gwauraia lasi. Dirava ena lauma amo ia vara Herevana amo, dika idauidau idia vara ena badina ita lalo-pararalaia sibona lasi, to vaira negana ita lalo-pararalaia diba danu.

Dirava Ena Lalohadai Gwau-Edeede Karana Dekenai

Baibel ese Dirava ena lalohadai iseda nega ai idia vara lalohisihisi havaraia gaudia dekenai ia gwauraia hedinarai. Ena be hari idia vara hisihisi ia diba vadaeni, to unai gaudia ia abia dae lasi eiava do ia haheaukalaidia lasi ela bona hanaihanai. Aposetolo Ioane ia gwau, “Dirava be lalokau.” (1 Ioane 4:⁠8) Iehova ese taunimanima ia lalodia bada bona dika ibounai ia inai henia. Unai dainai Dirava ena lalo-maino ita tahua be maoro, badina ena kara be namo bona hebogahisi, bona ia be mai ena siahu bona mai ena ura inai tanobada dekena amo kara dika do ia kokia totona. Salamo torea tauna ia gwau: ‘Ogogami taudia be [Dirava ese ia abia hidi guba Pavapavana] dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria. Ia ese manoka taudia, bona ogogami taudia dekenai do ia bogahisihisi, bona gau lasi taudia do ia hamauria. Bema dagedage idia davaria, king ese idia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.’​​—⁠Salamo 72:​12-14.

Hisihisi idia davaria taudia totona oi hebogahisi, a? Reana hebogahisi mamina oi abia. Ma haida edia hemami laloa karana be Iehova ese ita lalonai ia atoa karana ta, badina ita be ia sibona ena toana hegeregerena ia karaia. (Genese 1:​26, 27) Unai dainai, ita diba momokani, taunimanima idia davaria noho hisihisi be Iehova ese ia mamia danu. Iesu be Iehova ia diba namonamo, ma ta be ia bamona lasi, ia ese ita ia hadibaia Iehova be ita ia laloa bada bona ena hebogahisi be bada herea.​​—⁠Mataio 10:​29, 31.

Dirava ia havaraia gaudia ese idia hahedinaraia Dirava ese taunimanima ia lalodia. Iesu ia gwau Dirava ese “kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mataio 5:45) Aposetolo Paulo ese Lusitera hanua dekenai idia noho taudia ia hamaorodia, ia gwau: “[Dirava] ese taunimanima dekena amo ia hunia lasi. Lasi, ia ese iena noho ia hamomokania noho, iena kara namodia dekena amo, gaudia inai: Medu ia siaia diho guba dekena amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.”​​—⁠Kara 14:⁠17.

Daika Ena Kerere?

Namona be ita laloa danu Paulo be Lusitera taudia dekenai ma ia gwau: “Gunaguna neganai Dirava ese bese idauidau edia ura kara dalana ia koua lasi.” Unai dainai taunimanima idia davaria dika idauidau be sibodia edia kerere dainai idia vara. Ia be Dirava ena kerere lasi.​​—⁠Kara 14:⁠16.

Dahaka dainai Dirava ese dika ia koua lasi? Kara ta do ia karaia, a? Unai henanadai edia haere be Dirava ena Hereva sibona lalonai ita davaria diba. Unai bamona ita hereva badina lauma tauna ta be unai henanadai edia haere henia karana lalonai ia noho danu bona lauma taudia ma haida edia vairanai hepapahuahu ta ia havaraia.

[Pictures on page 4]

Taunimanima be ma haida edia hemami idia laloa. Dirava ese taunimanima idia davaria hisihisina ia mamia lasi, a?

[Picture Credit Lines on page 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Picture Credit Line on page 3]

Starving child: UN PHOTO 146150 BY O. MONSEN