Iehova ese Kamonai Taudia Ia Hanamoa Bona Naria
“To lau dekenai do ia kamonai tauna, be do ia noho mai mauri danu. Ia be do ia noho namonamo, gari ta lasi.”—AONEGA HEREVADIA 1:33.
1, 2. Dahaka dainai Dirava ita kamonai henia be gau badana? Haheitalai oi gwauraia.
KOKOROKU natudia idia bisi bada, rei lalonai aniani idia tahua, bona idia diba lasi bogibada ta be edia ataiai ia roho. Karaharaga, sinana ese idia ia hadibaia totona ia boiboi badabada bona ena hanina ia kehoa. Ena natudia be ia dekenai idia heau lao, bona karaharaga ena hanina henunai idia komu bona dika idia davaria lasi. Bogibada be unai gabu ia rakatania.a Unai amo dahaka ita dibaia? Kamonai karana ese ta ia hamauria!
2 Hari Keristani taudia dekenai, unai haheitalai amo ita dibaia gauna be mai anina bada, badina Satani ia gaukara goadagoada Dirava ena taunimanima ia hadikaia totona. (Apokalupo 12:9, 12, 17) Iena tahua gauna be iseda hetura karana Iehova ida do ia hadikaia, unai amo Iehova ena lalo-namo bona mauri hanaihanai danu do ita haboioa. (1 Petero 5:8) To bema Dirava kahirakahira ita noho bona iena Hereva bona orea amo idia mai hakaua daladia ita badinaia, ita diba momokani ia ese ita do ia naria. Salamo torea tauna ia gwau: “Lohiabada ese iena hanina dekena amo oi do ia koua, vadaeni iena naria dainai oi be do oi mauri.”—Salamo 91:4.
Kamonai Lasi Besena be Dika Ia Davaria
3. Israela taudia edia kamonai lasi karana dainai dahaka ia vara?
3 Israela besena be Iehova idia kamonai henia neganai, hanaihanai iena henari amo namo idia davaria. To, nega momo idia ese edia Havaraia Tauna idia rakatania bona au bona nadi amo idia karaia diravadia—‘anina lasi gaudia, idia ia hamauria diba lasi’ gaudia—dekenai idia lao. (1 Samuela 12:21) Lagani handred momo lalonai unai bamona idia gwau-edeede murinai, unai bese taudia ibounai be hereva momokani negea karana lalonai idia vareai momokani dainai idia namo lou diba lasi. Unai dainai Iesu be mai lalohisihisi ida ia gwau: “Ierusalema e! Ierusalema e! Peroveta taudia oi alaia mase, bona oi dekenai Dirava ese ia siaia taudia be nadi dekenai oi hodoa. Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi! Inai, umui emui ruma be do ia noho kava anina lasi.”—Mataio 23:37, 38.
4. Iehova ese Ierusalema ia rakatania karana be edena bamona lagani 70 C.E. ai ia hedinarai?
4 Iehova ese gwau-edeede Israela taudia ia rakatania karana be lagani 70 C.E. ai hisihisi bada dalana ai ia hedinarai. Unai lagani ai, Roma tuari taudia be Ierusalema lalonai idia vareai, edia ugava manu ena laulau idia hahedinaraia pepe be ataiai idia abia isi, bona taunimanima momo herea idia alaia mase. Unai neganai hanua dekenai be Pasova aria moalelaia taudia momo idia noho. Idia henia boubou gaudia momo amo Dirava ena lalo-namo idia abia lasi. Unai be Samuela ena hereva kamonai lasi King Saulo dekenai: “Edena kara be Lohiabada ia ura henia bada, a? Idia gabua boubou, bona boubou idauidau ia ura henia, a? Lasi, Lohiabada ena hereva idia kamonai henia taudia, be ia ura henia, ani? Oi laloa namonamo: Lohiabada kamonai henia kara, ese boubou karadia ia hereaia, bona Lohiabada ena hereva badinaia kara, ese mamoe namodia edia digara ia hereaia.”—1 Samuela 15:22.
5. Iehova be edena bamona kamonai karana ia ura henia, bona edena bamona ita diba unai bamona kamonai karana ita hahedinaraia diba?
5 Ena be Iehova ia ura ia ita kamonai henia, to ia diba goevadae lasi taudia edia goada be mai ena hetoana. (Salamo 130:3, 4) Ia ura ita hahedinaraia gaudia be, kudouna amo ita kara momokani, abidadama dainai ia ita kamonai henia bona lalokau henia, bona ia ita habadua garina ita gari. (Deuteronomi 10:12, 13; Aonega Herevadia 16:6; Isaia 43:10; Mika 6:8; Roma 6:17) Keriso ia do vara lasi neganai idia noho “witnes taudia hutuma bada ori ta bamona” ese idia hahedinaraia unai bamona kamonai karana ita hahedinaraia diba, badina idia ese kara maoromaoro idia badinaia noho, herevana hahetoho badadia idia davaria, bona idia mase danu. (Heberu 11:36, 37; 12:1) Unai taudia ese Iehova ena kudouna idia hamoalea! (Aonega Herevadia 27:11) To, ma haida be matamanai abidadama idia hahedinaraia, to gabeai unai dala dekenai idia raka noho lasi. Idia ta be idaunegai ia noho Iuda ena King, Ioasa.
Hebamo Dikadia Dainai King ta ese Dika Ia Davaria
6, 7. Iehoiada ena mauri negana lalonai, Ioasa be edena bamona king?
6 King Ioasa be beibi neganai, kahirakahira ia idia hamasea. Ioasa ena mauri lagani be 7 neganai, Hahelaga Tauna Badana Iehoiada be mai ena gari lasi ida Ioasa ia abia raka-lasi bona king ai ia halaoa. Dirava ia gari henia tauna Iehoiada be tamana ta bona sisiba henia tauna ta bamona Ioasa dekenai, unai dainai unai lohia tauna matamatana be “kara maoromaoro ia karaia, hahelagaia tauna Iehoiada ena mauri lagani ibounai lalonai.”—2 Sivarai 22:10–23:1, 11; 24:1, 2.
7 Ioasa ena kara namona ta be ia ese Iehova ena dubu ia hanamoa—ia “laloa” bada gaukarana ta unai. Ia ese Hahelaga Tauna Badana Iehoiada ia hadibaia Iuda bona Ierusalema amo dubu ena takisi monina do ia gogoa, ‘Mose ese ia gwauraia’ hegeregerena, unai amo dubu hanamoa gaukara ena davana idia karaia diba. Toana be Iehoiada ese unai king matamatana ia hagoadaia namonamo dainai, ia be Dirava ena Taravatu ia stadilaia bona badinaia. Unai dainai, dubu bona dubu kohudia dekenai idia karaia gaukara idia haorea haraga.—2 Sivarai 24:4, 6, 13, 14; Deuteronomi 17:18.
8. (a) Dahaka badina badana dainai Ioasa be lauma dalanai ia moru? (b) King ena kamonai lasi karana ese ia veria dahaka ia karaia totona?
8 Madi, Ioasa ena kamonai karana Iehova dekenai be ia noho daudau lasi. Dahaka dainai? Dirava ena Hereva ese ita ia hamaoroa: “Iehoiada ia mase murinai, Iuda lohia taudia idia mai, king Ioasa dekenai idia tomadiho henia. Vadaeni king ese edia hereva ia kamonai henia, bona idia ese Lohiabada, edia sene taudia edia Dirava ena Dubu Helaga idia rakatania, Asera kaivakuku bona kaivakuku haida idia tomadiho henia. Idia edia kerere dainai, Dirava ena badu be Iuda bona Ierusalema edia latanai ia vara.” Iuda ena lohia taudia edia hebamo dikana ese king ia veria dainai Dirava ena peroveta taudia ia kamonai henia lasi danu, bona unai peroveta tauna ta be Iehoiada ena natuna Sekaraia, ia be mai ena gari lasi ida Ioasa bona Israela taudia edia kamonai lasi karana dainai idia ia sisiba henia. Ioasa ia helalo-kerehai lasi, to ia ese oda ia henia dainai Sekaraia be nadi amo idia hodoa mase. Ioasa be hebogahisi bona kamonai lasi tauna dikana ai ia lao—unai ibounai ia vara badina ena turadia dikadia edia hereva ia kamonai henia!—2 Sivarai 24:17-22; 1 Korinto 15:33.
9. Ioasa bona lohia taudia dekenai ia vara gauna ese edena dala ai ia hahedinaraia kamonai lasi karana be kavakava kara dikana?
9 Ioasa ese Iehova ia rakatania dainai, ia bona ena lohia turadia dikadia dekenai dahaka ia vara? Suria ena ami taudia—edia “orea be bada lasi”—be Iuda lalonai idia vareai bona ena “lohia taudia ibounai idia alaia mase.” Idia ese king idia doria danu ena kohu bona dubu ena siliva bona golo ia henidia totona. Ena be Ioasa ia mase lasi, to ia manoka bona ia gorere momokani. Daudau lasi murinai, ena hesiai taudia huanai palani dikana idia karaia taudia ese ia idia alaia mase. (2 Sivarai 24:23-25; 2 King Taudia 12:17, 18) Iehova ena hereva be Israela taudia dekenai ia momokani: “Bema Lohiabada, emui Dirava umui kamonai henia lasi, bona iena oda bona iena Taravatu . . . umui badinaia namonamo lasi neganai, inai dika gaudia be umui dekenai do idia vara”!—Deuteronomi 28:15.
Seketere ta be Ena Kamonai Karana Dainai Ia Mauri
10, 11. (a) Dahaka dainai Iehova ena sisiba Baruku dekenai ita laloa be heduru gauna? (b) Iehova ese Baruku dekenai dahaka sisiba ia henia?
10 Keristani haroro gaukara lalonai oi davaria taudia momo amo haida sibona ese sivarai namona idia kamonai henia dainai, nega haida oi lalo-manoka, a? Nega haida, taga taudia dekenai oi mama bona idia sibodia edia ura idia tahua guna maurina oi ura henia sisina, a? Bema oibe, namona be Ieremia ena seketere Baruku oi laloa bona Iehova ese ia dekenai Ia henia lalokau sisibana oi laloa.
11 Baruku be peroveta herevana ta ia torea noho lalonai, Iehova ese ia laloa bada. Dahaka dainai? Badina Baruku be ena mauri dalana dekenai ia lalohisihisi matamaia bona ena hesiai gaukara namona Dirava dekenai ia laloa lasi to gau ma ta ia ura henia matamaia. Iehova ia itaia Baruku ena laloa dalana ia idau dainai, ia sisiba henia mai hebogahisi ida, ia gwau: “To oi ese gau namo herea, oi sibona totona, oi tahua noho, a? . . . Inai bamona tahua kara do oi karaia lasi, badina be lau ese taunimanima ibounai dekenai dika do lau havaraia, to oiemu mauri be oi dekenai do lau henia. Do oi lao gabudia ibounai dekenai oi be do oi heau mauri.”—Ieremia 36:4; 45:5.
12. Dahaka dainai hari inai nega lalonai, ita sibona totona “gau namo herea” ita tahua noho lasi be namo?
12 Ieremia ida mai ena abidadama bona gari lasi ida Iehova ia hesiai henia tauna, Baruku, dekenai Iehova ena hereva amo oi itaia diba ia ese unai tau namona ia laloa bada, a? Unai hegeregerena hari inai negai, idia laloa inai nega lalonai gabu ma ta dekenai gau namo herea do idia abia dainai dibagani idia davaria taudia be Iehova ese ia lalodia bada. Ita moale badina Baruku bamona, unai bamona taudia momo be lauma dalanai lo tadikaka ese mai edia lalokau ida idia durua bena edia lalohadai idia haidaua. (Luka 15:4-7) Oibe, namona be ita ibounai ita diba hari inai nega lalonai sibodia totona “gau namo herea” idia tahua noho taudia be vaira neganai do idia mauri lasi. Unai bamona taudia ese moale korikori idia do davaria lasi, to unai sibona lasi, dika bada do idia davaria, kahirakahira inai tanobada bona ena ura dikadia idia ore neganai, do idia ore danu.—Mataio 6:19, 20; 1 Ioane 2:15-17.
13. Edena dala ai Baruku ena sivarai ese ita dekenai manau karana ia hadibaia?
13 Baruku ena sivarai ese ita dekenai manau karana ia hadibaia danu. Iehova ese maoromaoro Baruku ia sisiba henia lasi to Ia ese Ieremia amo Baruku ia hereva henia, bona Baruku be reana Ieremia ena goevadae lasi karadia ia diba namonamo. (Ieremia 45:1, 2) To, Baruku ia hekokoroku lasi; mai manau ida ia abia dae unai sisiba ia henia tauna korikorina be Iehova. (2 Sivarai 26:3, 4, 16; Aonega Herevadia 18:12; 19:20) Unai dainai, ‘bema ita kerere’ bona Dirava ena Hereva amo ita idia sisiba henia, namona be Baruku ena lo karana, ena laloa kehoa lauma dalanai, bona ena manau karana ita tohotohoa.—Galatia 6:1.
14. Dahaka dainai ita idia hakaua taudia ita kamonai henia be mai ena namo?
14 Unai bamona manau karana ita hahedinaraia ese sisiba idia henia taudia do ia durua danu. Heberu 13:17 ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” Elda taudia be nega momo herea mai momokani ida Iehova dekenai boga-auka, aonega, bona diba totona idia guriguri, idia do ia durua edia mamoe naria gaukarana ai unai kahana aukana idia karaia totona! Namona be ita ese “unai bamona taudia ita hanamoa bona matauraia.”—1 Korinto 16:18.
15. (a) Ieremia be edena dala amo ia hahedinaraia Baruku ia abidadama henia? (b) Baruku be mai manau ida ia kamonai dainai dahaka davana namona ia abia?
15 Ia hedinarai Baruku ese ena lalohadai ia haidaua, badina Ieremia ese gabeai ia dekenai gaukara badana ia henia—dubu dekenai ia lao bona Ieremia ena uduna amo ia kamonai bona torea diho hahemaoro herevadia do ia duahia badabada. Baruku ese unai ia abia dae, a? Oibe, ia ese “Ieremia ena hereva ibounai ia karaia.” Momokani, unai hahemaoro herevana tamona be Ierusalema ena lohia taudia dekenai ia duahia danu, bona unai ia karaia totona ia gari lasi be namo. (Ieremia 36:1-6, 8, 14, 15) Lagani 18 murinai unai hanua be Babulonia taudia ese idia hamorua neganai, mani oi laloa Baruku be ia moale bada badina Iehova ena hereva ia badinaia bona ia sibona totona “gau namo herea” ia tahua lasi dainai ia mase lasi!—Ieremia 39:1, 2, 11, 12; 43:6.
Hanua ta Idia Koua Hegege Neganai Kamonai Karana Dainai Haida Idia Mauri
16. Lagani 607 B.C.E. ai, Babulonia ese Ierusalema ia koua hegege neganai, Iehova ese edena dala ai unai hanua dekenai idia noho Iuda taudia dekenai hebogahisi ia hahedinaraia?
16 Lagani 607 B.C.E. ai, Ierusalema ena dokona ia ginidae neganai, Dirava ena hebogahisi karana kamonai taudia dekenai be ma ia hedinarai lou. Hanua idia koua hegege momokani neganai, Iehova be Iuda taudia dekenai ia gwau: “Kamonai, lau ese mauri dalana bona mase dalana be emui vairana dekenai lau atoa vadaeni. Inai hanua lalonai do ia noho tauna be tuari kaia, bona hitolo, bona hanaia gorere dikana dekena amo do ia mase. To ia sibona bema hanua dekena amo murimurinai do ia raka, bona sibona be Babulonia taudia, idia gini hagegea taudia dekenai do ia henia tauna, be do ia mase lasi, to iena mauri do ia dogoatao.” (Ieremia 21:8, 9) Ena be Ierusalema noholaia taudia do idia mase be maoro, to Iehova ese ia idia kamonai henia taudia dekenai hebogahisi ia hahedinaraia, unai nega dikana ena nega kwadogina lalonai danu.b
17. (a) Iehova ese Ieremia ia hadibaia edia hanua idia koua hegege Iuda taudia do ia hamaoroa ‘Babulonia taudia dekenai sibodia idia henia,’ unai ese edena dala rua amo ena kamonai karana ia tohoa? (b) Edena dala ai ita be Ieremia ena gari lasi kamonai karana amo namo ita abia diba?
17 Ieremia ese Iuda taudia do ia hamaoroa Babulonia taudia dekenai sibodia do idia henia, unai ese iena kamonai karana ia tohoa danu. Badina ta be Dirava ena ladana totona ia lalo-goada. Ia ura lasi edia inai taudia idia gwau edia mauri lasi kaivakukudia dainai idia kwalimu bona unai ese Iehova ena ladana do ia hadikaia. (Ieremia 50:2, 11; Lalohisihisi ena Ane 2:16) Ma danu, Ieremia ia diba bema taunimanima ia hamaoroa Babulonia taudia dekenai idia sibodia do idia henia, iena mauri be do ia haboioa diba, badina taunimanima momo do idia laloa ia be gavamani gwau-edeede henia herevadia ia gwauraia. To ia gari lasi, mai ena kamonai ida Iehova ena hereva ia gwauraia. (Ieremia 38:4, 17, 18) Ieremia bamona, ita gwauraia herevana be taunimanima momo ese idia ura henia lasi. Iesu danu be unai sivarai tamona ia gwauraia dainai, taunimanima ese idia dadaraia. (Isaia 53:3; Mataio 24:9) Unai dainai taunimanima dekenai ita gari lasi, to Ieremia bamona, namona be Iehova ita kamonai henia, ia ita abidadama henia momokani.—Aonega Herevadia 29:25.
Goga ese Ita Ia Tuari Henia Lalonai Kamonai Karana Hahedinaraia
18. Vaira negana ai, dahaka hahetoho ese Iehova ena hesiai taudia edia kamonai karana do idia tohoa?
18 Kahirakahira Satani ena tanobada dikana ibounai be “hisihisi bada herea” lalonai do ia ore. (Mataio 24:21) Ita daradara lasi unai nega vairanai bona lalonai, Dirava ena taunimanima ese edia abidadama bona edia kamonai karana idia tohoa gaudia badadia do idia davaria. Hegeregere, Baibel ese ita ia hamaoroa Satani, “Goga, Magoga tano tauna,” ese Iehova ena hesiai taudia do ia dagedage henia bada herea, bona ena tuari taudia do ia haboua, idia be “orea badana . . . , ori koremakorema ese tano ia koua bamona.” (Esekiela 38:2, 14-16) Dirava ena taunimanima be momo lasi bona idia dekenai tuari gauna ta be lasi dainai, Iehova ena “hanina” henunai do idia heau lao, inai hanina ia kehoa ia idia kamonai henia taudia do ia gimaia.
19, 20. (a) Israela taudia be Davara Kakakakana dekenai idia ginidae neganai, dahaka dainai edia kamonai karana be mai anina bada? (b) Edena dala ai mai guriguri ida Davara Kakakakana ai ia vara gauna ena sivarai ita laloa karana amo namo ita davaria diba?
19 Do ia vara gauna ita laloa neganai, Israela taudia ese Aigupito idia rakatania negana ita laloa. Iehova ese Aigupito taudia dekenai hisihisi dikadia 10 ia henidia murinai, Ia ese iena taunimanima be Gwauhamata Tanona dekenai ia lao dala kwadogina dekenai ia hakaudia lao lasi, to Davara Kakakakana dekenai ia hakaudia diho, unuseniai Aigupito taudia ese idia koudia haraga diba bona idia tuari henidia. Tuari taudia edia lalohadai dekenai, unai be dika do idia davaria dalana. Bema oi be unuseniai oi noho, Iehova ena hereva Mose amo do oi kamonai bona mai emu abidadama goadana ida Davara Kakakakana dekenai do oi diho, ena be oi diba Gwauhamata Tanona be gabu idauna dekenai ia noho, a?—Esodo 14:1-4.
20 Esodo karoa 14 ita duahia neganai, Iehova ese ena siahu bada herea amo ena taunimanima ia hamauria dalana ita itaia. Unai bamona sivarai ita stadilaia bona laloa dobu neganai, iseda abidadama idia hagoadaia bada! (2 Petero 2:9) Abidadama goadana ese ita ia hagoadaia Iehova ita kamonai henia, bona taunimanima edia lalohadai amo toana be iena hahegani ia idau negadiai danu do ita kamonai. (Aonega Herevadia 3:5, 6) Unai dainai oi sibona oi nanadaia, ‘Lau hekwarahi noho Baibel stadilaia goadagoada, guriguri, bona laloa dobu, bona hanaihanai Dirava ena taunimanima ida lau hebou karana amo egu abidadama lau hagoadaia noho, a?’—Heberu 10:24, 25; 12:1-3.
Kamonai Karana ese Helaro Ia Havaraia
21. Iehova idia kamonai henia taudia ese hari bona vaira negana ai dahaka hahenamo do idia davaridia?
21 Iehova kamonai henia karana be edia mauri dalana ai idia halaoa taudia dekenai Aonega Herevadia 1:33 ena hereva ia momokani, ia gwau: “To lau dekenai do ia kamonai tauna, be do ia noho mai mauri danu. Ia be do ia noho namonamo, gari ta lasi.” Unai hagoadaia herevadia be Iehova ena badu dinana ai do ia momokani danu! Oibe, Iesu be ena hahediba taudia dekenai ia gwau: “To inai gaudia do idia vara hamatamaia neganai, be emui kwarana do umui abia isi. Badina be umui emui hamauria be ia kahirakahira vadaeni.” (Luka 21:28) Ia hedinarai goevagoeva, Dirava idia kamonai henia taudia sibona be mai edia abidadama ida unai hereva do idia badinaia.—Mataio 7:21.
22. (a) Dahaka dainai Iehova ena taunimanima idia lalo-goada? (b) Stadi hereva gabena dekenai dahaka do ita herevalaia?
22 Ita lalo-goada ena badina ta be “kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia ia hamaorodia guna.” (Amosa 3:7) Hari inai negai, Iehova ese peroveta taudia ia hasiahua lasi guna ia karaia bamona; to ia ese hesiai tauna mai ena kamonai oreana ia gaukaralaia, nega korikori ai iena ruma taudia dekenai lauma aniani idia henia totona. (Mataio 24:45-47) Unai dainai gau badana be unai “hesiai tauna” ita kamonai henia! Stadi hereva gabena ese do ia hahedinaraia, unai bamona kamonai amo ita hahedinaraia ita be unai “hesiai tauna” ena biaguna, Iesu, ita kamonai henia danu. Ia dekenai ‘bese ibounai idia kamonai’ be namo.—Genese 49:10.
[Footnotes]
a Ena be idia gwau kokoroku sinana ia gari, to animal idia naria orea ta ena buka ta ia gwau: “Kokoroku sinana ese ena natudia be dika amo ia naria totona, do ia heatu ela bona ia mase.”
b Ieremia 38:19 ese ia hahedinaraia Iuda taudia haida be Babulonia taudia dekenai idia “hanaia vadaeni” bona idia hamasedia lasi to idia abidia lao. Ieremia ena hereva dainai idia sibodia idia henia Babulonia taudia dekenai be Baibel ese ia gwauraia lasi. To, idia roho mauri ese peroveta tauna ena hereva ia hamomokania.
Oi Laloatao, A?
• Israela taudia edia kamonai lasi karana dainai dahaka ia vara?
• King Ioasa ena hebamo karadia, ena matamata negana lalonai bona ia buruka negana ai, ese dahaka idia havaraia?
• Baruku ena sivarai amo dahaka ita dibaia diba?
• Inai tanobada dikana ena dokona ia mai kahirakahira lalonai, dahaka dainai Iehova idia kamonai henia taudia idia gari lasi?
[Picture on page 21]
Iehoiada ena henari henunai, tau matamata Ioasa be Iehova ia kamonai henia
[Picture on page 23]
Ioasa ena turadia dikadia ese iena lalona idia veria Dirava ena peroveta tauna ia hamasea totona
[Picture on page 24]
Bema unai neganai oi noho, Iehova do oi kamonai henia bona ena siahu bada herea do oi itaia, a?