Mai Emu Kudouna Ibounai ida Iehova Oi Abidadama Henia
“Oiemu ladana idia diba taudia ese, oi do idia abidadama henia.”—SALAMO 9:10.
1, 2. Taunimanima ese noho namo idia davaria totona, edena gaudia haida idia abidadama henia kava sibona?
HARI, gau momo ese iseda noho namo dalana idia hadikaia gwauraia neganai, tau ta eiava gau ta ena heduru ita ura tahua be vaia taunimanima edia kara. Taunimanima haida idia laloa bema moni bada idia abia neganai edia vaira negana do ia namo, to moni ese nega sisina sibona idia ia durua diba. Baibel ia gwau: “Iena moni bona kohu ia abidadama henia tauna . . . do ia moru.” (Aonega Herevadia 11:28) Ma haida ese tanobada lohia taudia dekenai idia tabekau, to gunalaia taudia namodia danu be kerere idia karaia. Bona gabeai idia ibounai idia mase. Aonega dalanai, Baibel ia gwau: “King taudia do umui abidadama henia lasi, badina taunimanima ese umui do idia hamauria diba lasi.” (Salamo 146:3) Dirava ena lauma amo ia vara herevana ese ita ia sisiba henia, sibona iseda goada dekenai ita tabekau lasi. Ita danu be “taunimanima” sibona.
2 Peroveta tauna Isaia ese iena nega lalonai idia noho Israela taudia edia lohia taudia ia gwau henia, badina idia ese “hereva koikoi” idia abidadama henia. (Isaia 28:15-17) Noho namo idia tahua totona, edia dekena tanodia edia politikol turadia ai idia lao. Unai bamona hetura karana be anina lasi—koikoi gauna. Unai hegeregerena, hari inai negai tomadiho gunalaia taudia momo ese politikol taudia badadia idia tura henidia. Unai hetura karadia danu be “koikoi” gaudia ai do idia lao. (Apokalupo 17:16, 17) Idia ese nega daudau lalonai noho namo do idia mailaia lasi.
Iosua Bona Kaleba Edia Haheitalai Namona
3, 4. Edena dala ai Iosua bona Kaleba idia gwauraia sivaraina be idau bona spai taudia ten idia gwauraia sivaraina be ma idau?
3 Vadaeni, edeseniai noho namo ita tahua be namo? Mose ena nega lalonai, Iosua bona Kaleba ese idia tahua gabuna dekenai ita tahua danu. Israela taudia be Aigupito ena igui amo idia roho mauri bena daudau lasi murinai, idia hegaegae Gwauhamata Tanona, Kanana, lalonai idia vareai totona. Tatau 12 idia siaia lao tano idia itaia totona, bona dina 40 idia ore murinai, idia giroa lou idia itaia gaudia idia gwauraia totona. Spai taudia rua sibona, Iosua bona Kaleba, idia gwau Israela taudia be gabeai Kanana tanona dekenai do idia noho namo. Ma haida danu idia gwau unai tano be tano namona, to idia gwau: “Unai tano ena taudia be goada herea, edia hanua danu be bada herea, bona mai edia magu. . . . Unai tano taudia ita tuari henia diba lasi, badina idia be goada, ita be manoka.”—Numera 13:27, 28, 31.
4 Israela taudia ese spai taudia ten edia hereva idia kamonai bona idia gari, bona Mose idia maumauraia danu. Gabeai, Iosua bona Kaleba be mai edia ura bada ida idia gwau: “Unai ai itaia tanona be namo herea. Bema Lohiabada ese ita dekenai ia laloa namo neganai, ia ese unai tano dekenai ita do ia hakaua. Oibe, ia ese unai tano, rata bona hani dekenai ia honu tanona ita dekenai do ia henia. To Lohiabada do umui tuari henia lasi, bona unai tano taudia do umui gari henia lasi.” (Numera 14:6-9) To, Israela taudia idia kamonai lasi, unai dainai unai nega ai Gwauhamata Tanona lalonai idia vareai lasi.
5. Dahaka dainai Iosua bona Kaleba ese sivarai namona idia mailaia?
5 Dahaka dainai Iosua bona Kaleba ese sivarai namona idia gwauraia, to spai taudia ten ese sivarai dikana idia gwauraia? Idia ibounai ese gau tamona idia itaia, hanua badadia mai edia bese goadadia. Bona unai spai taudia ten idia hereva maoro, idia gwau Israela taudia be idia goada lasi unai tano idia hadarerea totona. Iosua bona Kaleba danu be unai idia diba. To, unai spai taudia ten ese taunimanima edia laloa dalana amo unai gaudia idia itaia. To, Iosua bona Kaleba ese Iehova idia abidadama henia. Idia ese Aigupito ai, Davara Kakakakana ai, bona Sinai Ororona dekenai Iehova ena hoa karadia mai siahudia idia itaia vadaeni. Unai dainai, lagani momo murinai unai kara badadia edia sivarai sibona ese Rahaba ena lalona ia hamarerea bada bona Iehova ena taunimanima totona kahirakahira ena mauri ia haboioa! (Iosua 2:1-24; 6:22-25) Iehova ena hoa karadia idia itaia taudia, Iosua bona Kaleba, idia diba momokani Dirava be ena taunimanima totona do ia tuari noho. Lagani 40 murinai, Israela taudia edia uru matamatana be Iosua ena hakaua henunai, Kanana tanona lalonai idia vareai bona idia hadarerea neganai, edia abidadama karana idia hamomokania.
Iehova Ita Abidadama Henia Momokani Ena Badina
6. Dahaka dainai hari inai negai Keristani taudia ese hahetoho idia davaria, bona daika idia abidadama henia be namo?
6 Inai “metau dikadia momo” negana lalonai, ita be Israela taudia bamona, ita idia inai henia taudia goadadia idia noho. (2 Timoteo 3:1) Idia ese lauma bona tauanina dalanai, bona kara goeva dekenai ita idia tohoa. Sibona iseda goada dekenai unai gaudia ita dadaraia diba lasi, badina idia be taunimanima edia siahu ia hanaia tauna, Satani Diabolo, amo idia mai. (Efeso 6:12; 1 Ioane 5:19) Edeseni amo heduru ita abia diba? Baibel negadiai ia noho kamonai tauna ta be guriguri amo Iehova dekenai ia gwau: “Lohiabada e, oiemu ladana idia diba taudia ese, oi do idia abidadama henia.” (Salamo 9:10) Bema Iehova ita diba momokani bona iena ladana ena anina ita lalo-pararalaia momokani, Iosua bona Kaleba ese ia idia abidadama henia hegeregerena, ia do ita abidadama henia danu.—Ioane 17:3.
7, 8. (a) Dirava ese ia havaraia gaudia dekenai dahaka badina haida ita itaia dainai, Iehova ita abidadama henia? (b) Baibel ese dahaka badina haida ia hahedinaraia dainai, Iehova ita abidadama henia?
7 Dahaka dainai Iehova ita abidadama henia be namo? Iosua bona Kaleba ese Iehova idia abidadama henia badina ena siahu idia hamomokania karadia idia itaia. Ita danu ese unai gaudia ita itaia. Hegeregere, Iehova ese ia havaraia gaudia, unives mai ena hisiu oreadia bilioni momo herea, mani ita laloa. Iehova ese guba bona tanobada idia haheaua siahuna ia biagua namonamo karana ese ia hahedinaraia, ia be Siahu Ibounai Diravana. Ia havaraia gaudia ita lalohadailaia neganai, Iobu ida ita lalo-tamona, Iehova be inai bamona ia gwauraia: “Ta ese Iehova ia koua diba lasi. Daika ese do ia nanadaia, do ia gwau, ‘Dahaka oi karaia noho?’ ” (Iobu 9:12) Momokani, bema Iehova be iseda kahana ai, guba bona tanobada ibounai lalonai tau ta do ita gari henia lasi.—Roma 8:31.
8 Iehova ena Hereva, Baibel, danu mani ita laloa. Dirava ena aonega bada herea be unai buka lalonai ia noho, bona ia be mai ena siahu ita ia durua diba iseda kara kereredia ita rakatania bona Iehova ena ura ita badinaia totona. (Heberu 4:12) Baibel amo Iehova ena ladana ita diba bona unai ladana ena anina ita itaia. (Esodo 3:14) Ita lalo-parara Iehova be sibona ena ura hegeregerena lalokau Tamana ta, kara maoromaoro Hahemaoro Tauna, bona ia kwalimu Tuari Tauna ai ia lao diba, iena ura ia hagugurua totona. Bona ita itaia iena hereva be hanaihanai ia momokani. Dirava ena Hereva ita stadilaia neganai, salamo torea tauna ia hereva bamona, ita gwau diba: “Oiemu hereva lau abidadama henia noho.”—Salamo 119:42; Isaia 40:8.
9. Edena dala ai Iesu ena mauri davalaia boubouna bona toreisi lou ese iseda abidadama Iehova dekenai ia hagoadaia?
9 Mauri davalaia boubouna be Iehova ita abidadama henia ena badina ma ta. (Mataio 20:28) Dirava ese iena Natuna ia siaia iseda mauri davalaia boubouna bamona ia mase be gau hereadaena! Bona unai mauri davalaia boubouna be mai anina bada gauna. Unai boubou ese idia helalo-kerehai bona Iehova dekenai idia giroa lou kudou-maoro taudia ibounai edia dika ia gwauatao. (Ioane 3:16; Heberu 6:10; 1 Ioane 4:16, 19) Iesu ese unai mauri davalaia boubouna ia henia totona, ia toreisi lou be namo. Unai hoa karana be taunimanima handred momo ese idia itaia, bona unai be Iehova ita abidadama henia ena badina ma ta. Unai ese ia hamomokania ita abidadama henia gaudia be do idia vara momokani.—Kara 17:31; Roma 5:5; 1 Korinto 15:3-8.
10. Ita ese Iehova ita abidadama henia ena badina haida be dahaka?
10 Unai be Iehova ita abidadama henia momokani diba ena badina haida sibona. Badina momo idia noho, idia haida be sibona eda mauri lalonai idia vara. Hegeregere, nega ta ta ai, ita ibounai ese iseda mauri lalonai nega aukadia ita davaria. Unai gaudia ita hanaia totona Iehova ena hakaua dalana ita tahua neganai, unai hakaua herevana ena namo ita itaia. (Iamesi 1:5-8) Iseda dina ta ta maurina lalonai, Iehova dekenai ita tabekau bona unai ena namo ita itaia neganai, iseda abidadama ia dekenai do ia goada ia lao.
Davida ese Iehova Ia Abidadama Henia
11. Davida ena noho dalana be edena bamona, to Iehova ia abidadama henia?
11 Idaunegai Israela dekenai ia noho tauna, Davida, ese Iehova ia abidadama henia. Saulo ia ura Davida ia hamasea bona Pilistia tuari orea goadana be Israela idia halusia toho gwauraia, unai gaudia ese Davida idia hagaria. To, ia mauri bona ia kwalimu danu. Dahaka dainai? Davida ia gwau: “Lohiabada be lauegu diari, ma ia ese lau ia hamauria noho. Daika dekenai do lau gari? Lohiabada ese mase gaudia ibounai dekena amo, lau ia gimaia noho. Daika garina do lau gari?” (Salamo 27:1) Bema ita danu be Iehova ita abidadama henia, do ita kwalimu.
12, 13. Ena be ita idia inai henia taudia be edia hereva amo ita idia tuari henia, to Davida ese edena bamona ia hahedinaraia Iehova ita abidadama henia be namo?
12 Nega ta Davida ia guriguri, ia gwau: “Dirava e, lau be mai laloa hekwarahi danu. Egu noinoi mani do oi kamonai henia. Lau idia hadikaia gwauraia taudia dekenai lau gari noho. Egu mauri mani do oi gimaia. Kara dika taudia ese lau alaia totona dala idia tahua noho, be mani emu kara idia dekena amo lau do oi hunia. Idia edia malana, be tuari kaia bamona idia segea noho, bona dagedage herevadia lau dekenai idia pidia, peva dekena amo diba do idia pidia bamona. Idia ese hunia gabuna dekena amo, kerere lasi tauna idia pidia noho.” (Salamo 64:1-4) Ita diba momokani lasi dahaka gaudia ese Davida ia doria unai hereva ia torea totona. To ita diba hari, ita idia inai henia taudia ese ‘edia malana idia segea noho,’ edia hereva amo ita idia tuari henia totona. Kerere lasi Keristani taudia idia “pidia” totona, idia gwauraia eiava torea sivarai kereredia be “peva” bamona idia gaukaralaia. Bema Iehova ita abidadama henia momokani, dahaka do ia vara?
13 Davida be ma ia gwau: “Dirava ese iena diba dekena amo idia do ia pidia, bona idia be bero do idia davaria haraga. Badina be edia malana edia dika dainai, idia sibodia ese edia dika do idia havaraia. . . . Kara maoromaoro taudia ese, Lohiabada dainai do idia moale bada, bona idia ese Lohiabada dekenai do idia heau mauri.” (Salamo 64:7-10) Oibe, ena be ita idia inai henia taudia ese ita idia hadikaia totona edia malana idia segea, to gabeai edia malana ese ‘idia sibodia dekenai dika do ia havaraia.’ Iehova ese gabeai anina namona do ia havaraia, unai amo ia idia abidadama henia taudia ibounai be ia dainai idia moale diba.
Hesekaia Ena Abidadama be mai Anina
14. (a) Dahaka dika badana ia vara gwauraia, to Hesekaia ese Iehova ia abidadama henia? (b) Hesekaia ese edena dala ai ia hahedinaraia, ia ese Asuria taudia edia koikoi herevadia ia abia dae lasi?
14 Iehova dekenai abidadama karana dainai anina namona ia davaria tauna ma ta be King Hesekaia. Hesekaia ena lohia negana lalonai, Asuria ena tuari orea goadana be Ierusalema idia hadikaia gwauraia. Unai tuari oreana ese bese momo ia hadarerea vadaeni. Iuda hanuadia danu ia halusia to Ierusalema sibona ia do halusia lasi, bona Senakeriba ia hekokoroku, ia gwau unai hanua danu do ia halusia. Rabesake amo ia gwau Aigupito ena heduru tahua karana be anina namona ta do ia havaraia lasi—bona ena hereva be maoro. To, ma ia gwau: “Oiemu Dirava, oi abidadama henia Diravana ena gwauhamata, Ierusalema be Asuria ena king ena siahu henunai do ia moru lasi, ena gwauhamata be do oi hamomokania lasi.” (Isaia 37:10) To, Hesekaia ia diba Iehova ese ia do ia koia lasi. Unai dainai ia guriguri, ia gwau: “Lohiabada, aiemai Dirava e, oi dekenai lau noinoi, Senakeriba ena siahu dekena amo ai do oi hamauria. Vadaeni tanobada basileia ibounai be do idia diba, oi Lohiabada e, oi sibona be Dirava momokani.” (Isaia 37:20) Iehova ese Hesekaia ena guriguri ia kamonai. Hanuaboi tamona lalonai, aneru tamona ese Asuria ena tuari taudia 185,000 ia alaia mase. Ierusalema idia hadikaia lasi, bona Senakeriba be Iuda tanona ia rakatania. Unai sivarai idia kamonai taudia ibounai ese Iehova ena siahu bada idia dibaia.
15. Ia idau ia lao noho tanobadana lalonai, dahaka sibona ese ita do ia durua, nega aukadia lalonai ita hegaegae noho totona?
15 Hari, Hesekaia bamona, ita be tuari ta lalonai ita noho. To unai tuari be lauma tuarina. Ita be lauma dalanai ita tuari taudia dainai, roho mauri daladia idauidau ita dibaia be namo. Idia vara diba dika ita laloa guna bona ita hegaegae, unai amo unai dika ita koua diba. (Efeso 6:11, 12, 17) Ia idau ia lao noho tanobadana lalonai, noho daladia be idia senisi haraga diba. Tano tamona taudia huanai tuari ia vara haraga diba. Tomadiho idauidau idia abia dae tanodia be haraga herea tomadiho idia koua diba. To bema ita be Hesekaia bamona, Iehova ita abidadama henia momokani, do ita gini hegaegae noho, herevana dahaka ia vara.
Iehova Ita Abidadama Henia Ena Anina be Dahaka?
16, 17. Edena dala ai ita hahedinaraia ita be Iehova ita abidadama henia?
16 Iehova ita abidadama henia karana be uduna amo ita gwauraia herevadia sibona lasi. Ia be iseda kudouna dekenai ia noho gauna bona iseda kara amo ita hahedinaraia. Bema Iehova ita abidadama henia, Iena Hereva, Baibel, do ita abidadama henia momokani. Dina ta ta ai do ita duahia, do ita lalohadailaia, bona iseda mauri lalonai ita do ia hakaua. (Salamo 119:105) Iehova ita abidadama henia ena anina be lauma helaga ena siahu ita abidadama henia danu. Lauma helaga ena heduru amo, Iehova ese ia moalelaia huahua ita havaraia diba, bona ita manadalaia kara dikadia ita rakatania diba. (1 Korinto 6:11; Galatia 5:22-24) Lauma helaga ena heduru dainai, momo ese kuku bona drag abia karana idia rakatania vadaeni. Ma haida ese matabodaga mauri dalana idia rakatania. Oibe, bema Iehova ita abidadama henia, iena goada dekenai do ita kara bona sibona iseda goada dekenai lasi.—Efeso 3:14-18.
17 Ma danu, Iehova ita abidadama henia ena anina be ia abidadama henia taudia ita abidadama henia danu. Hegeregere, Iehova be dala ia karaia “hesiai tauna mai ena kamonai, bona mai ena kara maoromaoro” ese “iena kohu” ia naria totona. (Mataio 24:45-47) Ita ura lasi sibona eda ura dekenai ita kara, eiava ia abia hidi taudia ita dadaraia, badina Iehova ese ia abia hidi dalana ita abidadama henia. Danu, elda taudia be Keristani kongregesen lalonai idia gaukara bona, aposetolo Paulo ena hereva hegeregerena, idia be lauma helaga ese ia abia hidi. (Kara 20:28) Kongregesen lalonai elda taudia ida ita gaukara hebou karana amo, ita hahedinaraia danu ita ese Iehova ita abidadama henia.—Heberu 13:17.
Paulo Ena Haheitalai Tohotohoa
18. Hari Keristani taudia ese edena dala ai Paulo ena haheitalai idia tohotohoa, to dahaka dekenai edia abidadama idia atoa lasi?
18 Aposetolo Paulo ese iena hesiai gaukara lalonai hahetoho momo ia davaria, ita danu ita davaria bamona. Iena nega lalonai, haida ese gavamani ena gaukara taudia dekenai Keristani tomadihona idia gwauraia kerere, bona nega haida unai hereva koikoidia ia hamaoromaoroa toho eiava kota dekenai sivarai namona harorolaia ena maoro ia hamomokania. (Kara 28:19-22; Filipi 1:7) Hari inai negai, Keristani taudia ese iena haheitalai idia tohotohoa. Dala idia kehoa negadiai, ma haida ita durudia iseda gaukara idia lalo-pararalaia totona. Bona ita gaukara goada sivarai namona ena maoro ita gwauraia bona kota dekenai ita hamomokania totona. To, unai bamona gaukara dekenai iseda abidadama ita atoa lasi, badina iseda kwalimu karana be kota dekenai ita kwalimu eiava taunimanima ese ita idia gwauraia namo karana amo ia mai lasi. To, Iehova ita abidadama henia. Iena hagoadaia herevana idaunegai Israela taudia dekenai ita laloatao: “Lau dekenai do umui abidadama. Unai neganai goada do umui davaria, bona mauri namona do umui davaria.”—Isaia 30:15.
19. Iseda tadikaka ese dagedage idia davaria neganai, edena dala ai edia abidadama Iehova dekenai be mai anina?
19 Iseda nega lalonai, iseda gaukara be Eastern bona Western Europe ai, Asia bona Africa ena kahana haida ai, bona South bona North America ena tano haida dekenai idia koua eiava taravatua. Unai ena anina be iseda abidadama karana Iehova dekenai be anina lasi, a? Lasi. Ena be nega haida badina namona ta ia laloa dainai dagedage karadia ia koua lasi, to Iehova ese mai ena lalokau ida unai dagedage idia davaria taudia ia hagoadaia. Unai bamona dagedage karadia lalonai, Keristani taudia momo be Dirava abidadama henia karana dainai ladana namona idia abia.
20. Ena be iseda gaukara idia taravatua lasi, to edena dala ai iseda Keristani gini siri karana do ita rakatania lasi?
20 To, tano momo dekenai iseda gaukara idia koua lasi, bona nega haida niusi halasia oreadia ese ita idia gwauraia namo. Unai ita laloa bada bona ita diba unai danu ese Iehova ena ura hagugurua karana ia durua. Iehova ena lalo-namo dainai ia kehoa noho dalana ita gaukaralaia, sibona eda mauri ita hanamoa totona lasi, to Iehova ena hesiai gaukara ita karaia badabada totona. To, ita ese iseda Keristani gini siri karana do ita negea lasi, iseda haroro gaukara do ita hadokoa lasi, eiava dala ma haida ai iseda hesiai gaukara Iehova dekenai do ita hamanokaia lasi siahu taudia ese ita do idia lalo-namo henia totona. Ita be Mesia Basileiana henunai ita noho taudia bona Iehova ena lohia siahuna ita abia dae momokani. Iseda helaro be inai nega dikana dekenai lasi, to tanobada matamatana lalonai, unuseniai Mesia ena guba Basileia gavamanina sibona ese tanobada ibounai do ia lohiaia. Bomu o tuari roketi, eiava niuklia tuari gaudia ta ese unai gavamani ia hamarerea diba lasi eiava guba amo ia hamorua diba lasi. Unai gavamani be ta ese do ia hadarerea lasi bona ia ese Iehova ena ura do ia hagugurua.—Daniela 2:44; Heberu 12:28; Apokalupo 6:2.
21. Iseda lalona ita hadaia edena dala ai ita raka noho totona?
21 Paulo ia gwau: “Ita be Dirava ena dala do ita rakatania lasi. Ita be boio taudia lasi. Lasi, to ita be abidadama taudia dainai, mauri do ita abia.” (Heberu 10:39) Namona be ita ibounai ese mai abidadama ida Iehova ita hesiai henia ela bona dokona. Badina namodia momo dainai, hari ela bona hanaihanai Iehova ita abidadama henia momokani.—Salamo 37:3; 125:1.
Dahaka Oi Dibaia?
• Dahaka dainai Iosua bona Kaleba ese sivarai namona idia mailaia?
• Dahaka badina haida dainai Iehova ita abidadama henia momokani be namo?
• Iehova ita abidadama henia ena anina be dahaka?
• Iehova ita abidadama henia dainai, iseda lalona ita hadaia edena dala ai ita raka noho totona?
[Picture on page 25]
Dahaka dainai Iosua bona Kaleba ese sivarai namona idia mailaia?
[Pictures on page 26]
Iehova ia havaraia gaudia ese Iehova ita abidadama henia ena badina namona ia hahedinaraia
[Credit Line]
All three images: Courtesy of Anglo-Australian Observatory, photograph by David Malin
[Picture on page 28]
Iehova ita abidadama henia ena anina be ia abidadama henia taudia ita abidadama henia danu