Mauri Hanaihanai Dalana Abia Hidi

TAUNIMANIMA momo be abia hidi momo idia karaia, guna bamona lasi. Hegeregere, ita karaia dabua, ita ania anianina, bona ita gaukara gabuna bona ita noho gabudia be nega momo ita abia hidi gaudia. Danu, tanobada ena kahana momo dekenai, adavana ta abia hidi karana be hari nega momo idia karaia karana. To, Baibel ese abia hidi ta ia gwauraia, unai abia hidi ese abia hidi ibounai ia hanaia momokani​—⁠unai be taunimanima ibounai totona.

Baibel ia gwau: “Kara maoromaoro ia ura momokani tauna ese, mauri ia davaria noho, to kara dika ia ura karaia tauna, be do ia mase.” (Aonega Herevadia 11:19) Bona Iesu Keriso ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​​—⁠Ioane 17:⁠3.

Oibe, iseda Havaraia Tauna ese ita ia boiria mauri hanaihanai dekenai ia lao dalana ita abia hidi totona! Mauri hanaihanai ita abia totona, dahaka ita karaia be namo?

Baibel ia gwau, “kara maoromaoro ena dala, be mauri dekenai ia lao noho.” (Aonega Herevadia 12:28) Ita be mauri hanaihanai ia lao henia dalana dekenai idia raka noho kara maoromaoro taudia huanai ita noho diba. Edena dala ai? Iseda mauri be Dirava ena ura bona iena taravatu hegeregerena be namo. (Mataio 7:​13, 14) Unai dainai, namona be ita ese abia hidi maorona ita karaia bona Dirava ena harihari gauna, mauri hanaihanai do ita abia.​​—⁠Roma 6:⁠23.