Matamata Taudia Edia Kudouna Ia Hamarerea Vidio Ta

MATAMATA taudia momo ese inai vidio Young People Ask​​—⁠How Can I Make Real Friends?a idia itaia neganai, edia lalona ia hagoadaia edia kara idia laloa namonamo totona. Unai vidio lalonai Baibel ena sisiba hereva namodia, Keristani matamata taudia edia hemami, bona lalona ia hagoadaia Baibel drama ta, Daina ena sivarai amo ia hahedinaraia. (Genese, karoa 34) Henunai be inai vidio idia itaia matamata taudia Mexico amo, edia hemami ia hahedinaraia.

Martha ia gwau: “Unai vidio ese egu kudouna ia hamarerea momokani. Toana be unai vidio be lau totona idia karaia. Lau laloa bema egu tisa bona sikuli turadia idia diba lau be Iehova ena Witnes kekenina ta, unai be hegeregere. Idia lau haroro henidia lasi dainai, lau hamomokania lasi lau be Witnes kekenina ta. Iehova ese ia henia hereva namodia ibounai dainai ia lau tanikiu henia bada, inai bamona vidio amo hegeregerena, iseda kudouna ia hamarerea bada.”

Juan Carlos ia gwau: “Unai vidio ese emu lalona ia veria oi laloa totona. Lau matamata dainai, kerere haida lau karaia vadaeni bona drama idia karaia taudia ese idia hahedinaraia karadia lau lalo-pararalaia diba. Lagani haida gunanai, mauri daladia rua lau badinaia, to lau lalo-parara unai bamona mauri dalana ese dika ia mailaia diba. Unai vidio lau itaia murinai, egu lalona lau hadaia Iehova do lau badinaia noho.”

Sulem ese ena hemami ia gwauraia hedinarai, ia gwau: “Unai vidio lau itaia neganai, egu kudouna ia hamarerea momokani. Guna, Baibel duahiduahi karana lau hadokoa, bona nega momo Iehova lau guriguri henia lasi. To, unai vidio lalonai matamata taudia edia hereva lau kamonai neganai, edia hereva ese lau ia hagoadaia Baibel stadilaia karana lau hamatamaia lou bona Iehova lau guriguri henia totona.”

 Hari inai negai, matamata taudia be lalo-hekwarahi gaudia momo idia davaria, bona idia abia hidi turadia ese edia mauri dalana ia hanamoa eiava ia hadikaia diba. (Salamo 26:4; Aonega Herevadia 13:20) Inai vidio Young People Ask​​—⁠How Can I Make Real Friends? ese matamata taudia ia durudia noho dala namodia idia abia hidi totona.

[Footnote]