Dirava Ena Hereva ese Oi Ia Hagoadaia, A?
HEKWAKWANAI oi davaria neganai, edena bamona oi haheaukalaia? Iesu be siri maorodia ia laloatao karana ese ia durua Satani ena hahetoho ia dadaraia totona. (Mataio 4:1-11) Unai hegeregerena, King Davida be ena mauri lalonai hekwakwanai ia davaria neganai, Dirava ena Hereva ese ia hagoadaia. Ia gwau: “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”—Salamo 94:19.
Unai hegeregerena, hekwakwanai ita davaria neganai, ita ura henia bada sirina ta ese ita ia hagoadaia diba. Hegeregere, Rex, hari ena mauri lagani be 89, ena ful-taim hesiai gaukara be lagani 1931 ai ia karaia matamaia. To, ia gwau: “Nega momo hesiai gaukara badana ta idia henia neganai, lau laloa lau hegeregere lasi.” Edena bamona unai ia haheaukalaia? “Lau ura henia bada sirina be Aonega Herevadia 3:5, ia gwau: ‘Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.’ Unai siri lau laloa lou bona lau badinaia neganai, unai ese lau ia durua lau abia gaukarana lau karaia namonamo totona.”
Matamata taudia danu be siri ta idia ura henia bada karana amo namo idia davaria. Jack, ena mauri lagani be 6, ia gwau ia ura henia bada sirina be Mataio 24:14. Unai siri ese ia hagoadaia ena tama sina ida ia haroro totona. Ia gwau: “Lau ura bada Saturday ibounai egu sinana, tamana bona taihuna ida lau haroro.”
Iesu bamona, nega haida emu abidadama idia tohoa gaudia oi davaria, a? Vadaeni, reana Filipi 4:13 be oi ura henia bada sirina ai oi halaoa diba. King Davida bamona, ‘emu lalona ia hekwarahi momo,’ a? Vadaeni, reana Filipi 4:6, 7 laloa lou karana ese oi ia durua oi haheaukalaia totona. Nega haida oi lalo-hekwarahi badina Dirava oi hesiai henia karana be anina lasi, a? Vadaeni, 1 Korinto 15:58 oi laloatao karana ese oi do ia hagoadaia.
Siri maorodia ita laloa lou neganai, dala ita kehoa iseda mauri dekenai Dirava ena Hereva ia gaukara totona. (Heberu 4:12) Ita ura henia bada siridia ese ita idia hagoadaia diba.—Roma 15:4.