Duahia Taudia Edia Henanadai
Abata murinai, Noa ese lagatoi amo ia siaia pune ta be “olive ena rauna” ida ia giroa. Pune ese unai au rauna be edeseni amo ia abia?
Baibel ese ita ia hadibaia “abata ia bada daekau noho ela bona ororo badadia ibounai ia koua.” (Genese 7:19) Unai abata ranu ia diho neganai, wiki ta ta lalonai Noa ese pune ta ia siaia, nega toi unai bamona ia karaia. Nega iharuana ai, pune be ia giroa lou neganai, “iena uduna dekenai be olive ena rauna matamata ta. Vadaeni, Noa ia diba ranu be ia diho vadaeni.”—Genese 8:8-11.
Momokani, abata ese tanobada ena kahana ta ia koua ena daudau be hari ta ese ia gwauraia diba lasi, badina Abata ese tanobada ena oromana ia haidaua. Toana be nega daudau lalonai ranu ese gabu momo ia koua dainai au momo idia mase diba. To, au haida be idia do mauri noho, ranu ia diho neganai, unai ese idia ia durua idia tubu lou totona.
The New Bible Dictionary ese olive auna ia herevalaia neganai, ia gwau: “Bema idia utua, ena ramuna amo au matamatadia faiv bamona idia tubu. Kahirakahira idia mase olive audia be unai bamona idia tubu danu.” The New Schaff-Herzog Encyclopedia of Religious Knowledge ia gwau, ia be “hegeregere ia tubu bona ia mase diba lasi.” Hegeregere hari inai negai taunimanima ta lasi ese abata ranu ena damena bona ena keru eiava siahu ia diba. Unai dainai, abata ranu ese olive audia bona tubutubu gaudia haida dekenai ia havaraia gauna ita diba lasi.
To, olive audia be keru gabudia ai idia mase diba, hegeregere ororo ena atai dekenai idia vara gaudia. Unai olive audia be ororo ena henuna kahana ena mita 1,000 bamona dekenai idia vara, unuseniai gabu ena siahu ena bada be averes 10°Celcius ia hanaia. Buka ta ladana The Flood Reconsidered ia gwau, “Unai dainai, Noa be manu ese au amo ia kokia au raurau matamatana amo ia diba, ranu ia diho noho bona koura maragidia idia hedinarai idia lao noho danu.” Wiki ta murinai Noa ese unai pune ia siaia neganai, ia giroa mai lasi, unai ese ia hahedinaraia tubutubu gaudia bona manu ena laga-ani gabudia be momo.—Genese 8:12.