“Ai Ura Ai Gwau, ‘Oibe!’ ”

IEHOVA ENA WITNES TAUDIA edia brens opesi Nigeria dekenai, ese vanegai revareva ta idia abia, ena hereva haida ia gwau:

“Aiemai natuna mero, Anderson, ena mauri lagani be 14 neganai ia mase. Ia do mase lasi neganai, kokoroku rua ia ubua. Ia ura ia hoihoilaidia bena ia abia monina be kontribusen bamona brens opesi dekenai do ia siaia, tanobada hegegemadai haroro gaukarana durua totona. To ia do hoihoilaidia lasi neganai ia mase.”

“Iena ura ai laloa bada dainai, ai, iena tama sina, ese unai kokoroku ai ubua bona ai hoihoilaidia. Ai siaia monina be Anderson ena kontribusen. Iehova ena gwauhamata dainai, ai diba momokani​—kahirakahira​—Anderson do ai itaia lou. Gabeai, bema ai ia nanadaia iena ura gauna ai karaia eiava lasi neganai, ai ura ai gwau, ‘Oibe!’ Momokani, ai ura bada Anderson sibona lasi, to do idia toreisi lou “witnes taudia hutuma bada ori ta bamona” ai itaia.”​—Heberu 12:1, NW; Ioane 5:​28, 29.

Ataiai ia noho revarevana ese ia hahedinaraia goevagoeva bamona, toreisi lou helarona abidadama henia karana ese Keristani taudia momokanidia ia hagoadaia. Anderson ena famili bamona, famili milioni ma haida be edia lalokau taudia, mase dekenai idia haboioa taudia unai, do idia hedavari henidia lou neganai, do idia moale bada herea!​—1 Korinto 15:24-​26.

Dirava ena Hereva ia gwauhamata, toreisi lou ena helaro be kahirakahira kara maoromaoro tanobadana dekenai, Dirava ena Basileia henunai, do ia vara hahenamona ta. (2 Petero 3:​13) Dirava ese unai negai taunimanima totona do ia karaia gaudia be Baibel ese ia gwauraia: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:4.