Harihari Gauna Hereadaena Unai

APOSETOLO burukana Ioane ena mase negana ia kahirakahira neganai, ia gwau: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea.”​—⁠3 Ioane 4.

Kamonai aposetolo tauna be ena natudia, lauma dalanai, ia herevalaia. To, tama sina momo ese aposetolo tauna ena hereva idia gwauraia diba. Idia hekwarahi edia natudia dekenai ‘Lohiabada ena hadibaia hereva [“bona ena sisiba herevadia,” Buka Helağa] idia hadibaia,’ bona hari idia moale badina idia itaia edia natudia be “hereva momokani ena dala dekenai idia raka noho.” (Efeso 6:⁠4) Momokani, ta ese ena natudia dekenai mauri hanaihanai ena dala ia hadibaia neganai, ia be idia dekenai harihari gauna hereadaena ia henia unai. Unai ena badina be Dirava badinaia karana, Iehova ia ura Keristani taudia ese do idia noholaia mauri dalana “be mai ena gwauhamata, inai mauri dekenai bona mauri gabena dekenai.”​​—⁠1 Timoteo 4:​8, Buka Helağa.

Iehova, Tamana goevadaena unai, ese Dirava idia badinaia tama sina Ia laloa bada, badina be idia hekwarahi lauma dalanai edia natudia idia hadibaia totona. Natudia be idia kamonai neganai, edia tama sina ida tomadiho momokanina idia badinaia hebou mai moale bada danu. Unai bamona natudia edia mauri lagani ia bada ia lao neganai, unai nega namodia idia laloatao. Haida be nega ginigunana Tiokratik Haroro Sikuli ena kahana ta idia karaia ena sivarai be mai moale ida idia laloatao.a Eiava ruma-ta-ruma-ta haroro gaukarana ai edia tamana eiava sinana ida idia gaukara hebou neganai, nega ginigunana siri ta idia duahia diba negana idia laloa. Edia tama sina ese “Lau Egu Bible Sivarai Buka” eiava “Hadibaia Tauna Badana Ita Kamonai Henia”b idia duahia lalonai idia kamonai, unai bamona negadia be do idia laloaboio lasi, ani? Gabriel be ia ura henia bada karana ta ia laloa lou, ia gwau: “Lauegu mauri lagani be 4 sibona neganai, dina iboudiai egu sinana be ia nanadu lalonai ane ia abia lau dekenai. Basileia anena ta be lau do laloatao noho. Gabeai, unai ese lau ia durua Iehova ena hesiai gaukara ena namo lau itaia totona.” Reana oi danu be Gabriel ia herevalaia ane namo hereana oi laloatao. Unai be Ane amo Iehova Hanamoa bukana ai ia noho ane namba 157, bona ena ladana be “Memero Kekeni e, Iehova Umui Hanamoa.”

Ane herevana ia matamaia: “Nega ta natu maragidia, Keriso idia hanamoa.” Momokani, guna natudia haida be Iesu idia bamoa be hahenamo badana, bona reana edia kara momokani bona namodia amo ia idia hamoalea. Danu, natuna maragidia idia ura ta ese idia ia hadibaia be namo, bona Iesu ese unai haheitalai ia gaukaralaia ena hahediba taudia ese idia tohotohoa totona. (Mataio 18:​3, 4) Unai dainai, Iehova tomadiho henia karana dekenai natudia be mai edia gabu. Momokani, ane herevana ma ia gwau: “Iehova idia hanamoa.”

Natudia momo edia kara namodia​​—⁠ruma ai, sikuli gabunai bona ma gabu haida dekenai⁠—​ese Iehova bona edia ruma bese idia hanamoa. Edia Keristani tama sina, hereva momokani idia ura henia taudia unai, idia abia be hahenamo badana. (Deuteronomi 6:⁠7) Dirava gari henia tama sina be Dirava ia gwauraia gaudia idia badinaia, badina Ia be lalokau Tamana ta bamona Ia havaraia taudia edia raka dalana Ia hadibaia. Bona hahenamo momo idia abia! Unai dainai, tama sina ese edia ruma bese lalonai natuna maragidia idia hadibaia, bona natudia “idia kamonai . . . amo tama bona sina be idia hamoaledia.” (Isaia 48:​17, 18) Angélica, hari Mexico ena Iehova ena Witnes taudia edia brens opesi dekenai ia gaukara taihuna, ia gwau: “Nega ibounai egu tama sina idia hekwarahi Baibel ena hakaua herevadia idia badinaia totona. Unai dainai egu matamata negana be nega namona. Lau moale.”

Unai bamona Keristani taudia idia gwau danu, emu tama sina ese lauma dalanai oi idia hadibaia gaudia oi naria namonamo be gau badana. Reana oi be Keristani kara namodia ia hadibaia ruma besena ta lalonai oi tubu daekau matamata tauna ta. Bema oibe, unai ane ese oi ia hadibaia: “Keristani memero kekeni e, dala goevana badinaia.” Nega ta do ia mai bona oi sibona be abia hidi do oi karaia dainai, hari oi maragi noho negana lalonai Iehova tabekau henia karana oi dibaia. To taunimanima ese oi idia ura henia bada totona oi hekwarahi lasi.

Bema emu mauri lalonai oi atoa guna gauna be, oi ura taunimanima ese oi idia ura henia bada, reana oi idia hadibaia gaudia ibounai be anina lasi gaudia ai idia lao bona emu vaira negana oi hadikaia diba. Unai bamona ura dainai emu gima noho karana oi haboioa diba. Haida ese idia bamoa taudia be reana taunimanima namodia mai hairaidia bamona, to Keristani taravatudia idia ura henia lasi. Unai kara be Tara ese ia haheitalaia, unai taihu be vidio ladana Young People Ask​​—⁠How Can I Make Real Friends? ena kahana badana ta ia karaia. Tara bamona, bema Keristani matamata taudia ese tomadiho momokani laloa bada lasi taudia idia bamoa, gabeai do idia davaria inai ane, “hebamo dika tahua lasi, umui kara dika garina” ena hereva be momokani. Kara namodia havaraia totona be mai ena hekwarahi bona lagani momo lalonai unai do oi karaia, to unai kara namodia oi hadikaia haraga diba.

Momokani, Dirava gari henia karana be auka. To, ane herevana ma ia gwau, “oi do matamata negana ai, Iehova oi hesiai henia” neganai, mauri namona ena badina aukana do oi haginia. Bona “do oi bada negana ai, ruaosi do umui moale.” Do oi abia dae momokani Iehova ena lalokau henari henunai, gau ta ese oi do ia koua diba lasi, iena matana ai kara namodia oi karaia totona. Unai dala amo, oi be Dirava gari henia lo tauna ai do oi lao. Ma danu, oi idia hadibaia Keristani dalana oi gaukaralaia namonamo neganai, unai ese dala do ia kehoa Dirava oi hamoalea totona. Taunimanima dekenai, unai be hahenamo hereadaena, ani?​—⁠Aonega Herevadia 27:⁠11.

Unai dainai, matamata taudia e, nega ibounai umui laloaboio lasi, Iehova bona emui Keristani tama sina edia hadibaia karana be mai anina bada. Namona be edia lalokau bada karana ese oi ia hagoadaia Iehova ia moalelaia karadia oi karaia totona. Iesu Keriso bona kamonai matamata tauna Timoteo bamona, emu guba Tamana bona emu tanobada tama sina do oi hamoaledia. Bema vaira negana dekenai tama sina ta ai oi lao, reana oi ese Angélica, guna ai herevalaia taihuna ena hereva do oi abia dae, ia gwau: “Bema natuna ta lau abia, do lau hekwarahi bada ena beibi negana ai Iehova lalokau henia karana be ena kudouna ai do lau atoa totona, unai lalokau be iena dala hadiaria gauna bamona.” Momokani, mauri hanaihanai ia lao henia dala maoromaorona be harihari gauna hereadaena!

[Footnotes]