Basileia Haroro Ripoti

Revareva ta Alejandra Amo

REVAREVA torea dalana be haroro dalana namona ta. Ena be nega haida ena anina ia vara lasi, to unai dala idia badinaia noho taudia be hahenamo idia davaria. Idia be Baibel ena aonega sisibana idia laloatao: “Dabai neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.”​​—⁠Hadibaia Tauna 11:⁠6.

Iehova ena Witnes taudia edia brens opesi Mexico dekenai lagani 10 ia gaukara witnes matamatana ta, Alejandra, be kensa totona kemoterapi ia abia. Ena gorere ia bada ia lao, bona ena tauanina ia goada lasi dina ta ta ena gaukara karaia totona. Ia ura lasi ena haroro gaukara ia dadaraia dainai, Alejandra be revareva ia toredia. Unai revareva lalodiai davana lasi Baibel stadi dalana ia herevalaia bona ena sinana ena telefon namba danu ia torea. Bena unai revareva be ena sinana dekenai ia henia bona ruma-ta-ruma-ta haroro gaukarana amo taunimanima idia noho lasi rumadia dekenai ia rakatania totona.

Unai nega ai, Diojany, kekeni matamatana ta Guatemala amo, be Cancún, Mexico dekenai ia lao ruma hagoevaia gaukarana totona. Unuseniai ia noho neganai, Iehova ena Witnes taudia ia davaria bona mai moale ida idia danu Baibel idia herevalaia hebou. Gabeai, ena gaukara biagudia ese edia lalona idia hadaia Mexico City dekenai idia lao bona idia ura ia danu ia lao. Diojany ia ura lasi ia lao badina unai amo ia ida Baibel idia herevalaia Witnes taudia do ia rakatania.

Ena gaukara biaguna idia gwau “Oi laloa momo lasi, Witnes taudia be gabu ibounai dekenai idia noho. Unuseniai ita ginidae neganai idia do ita tahua.” Diojany ia moale badina ia diba unai gabu ai Witnes taudia do ia davaria dainai, ia ura idia danu ia lao. Mexico City ai idia ginidae neganai, Diojany ena gaukara biagudia be Witnes taudia idia tahua. Badina haida dainai Witnes taudia idia davaria lasi, ena be Witnes taudia 41,000 mai kahana bona kongrigeisen 730 idia noho unai siti dekenai.

Daudau lasi murinai, Diojany ia lalo-manoka badina Baibel herevalaia lou totona Witnes taudia ia davaria lasi. Dina ta, ena gaukara biaguna hahinena be ia dekenai ia mai, bona ia gwau: “Hoa gauna! Oiemu Dirava be emu guriguri ia kamonai.” Revareva ta ia henia, bona ia gwau: “Witnes taudia ese inai revareva idia rakatania oi totona.” Inai be Alejandra amo ia mai revarevana.

Diojany be Alejandra ena sinana bona iena tadina kekeni Blanca ia ringi henidia, bona Baibel stadi ia abia dae. Pura haida murinai, ia moale badina Alejandra danu ia hedavari. Alejandra ese ia hagoadaia ena Baibel stadilaia karana ia hadokoa lasi, unai amo lauma dalanai do ia goada ia lao.

Hua haida murinai, July 2003 ai, Alejandra ia mase; iena tadikaka bona taihu dekenai abidadama bona boga auka karana dekenai haheitalai namona ia hahedinaraia. Mase guria herevana idia gwauraia murinai, momo be Diojany idia hedavari henia neganai, ia gwau: “Alejandra bona ena ruma bese be haheitalai namona lau dekenai. Lauegu lalona lau hadaia Iehova do lau hesiai henia bona bapatiso do lau abia. Lau ura dikadika Alejandra do lau itaia lou Paradaiso dekenai!” Unai hereva ese momo edia kudouna ia hamarerea bada.

Oibe, ena be revareva be gau maragina, to anina namona ia havaraia bona ena namo be nega daudau lalonai ia noho diba!