Basileia Haroro Ripoti

Mexico Dekenai Lauma be Idia Lalonai Ia Hururu

“Toana be Mexico ena kahana iboudiai idia hururuhururu, tadikaka idia gaukara goadagoada dainai.” Watch Tower Society ena branch opesi Mexico dekenai ese unai hereva ia torea. Bona unai hereva be momokani! Mexico lalonai idia karaia gaukarana badana be inai gau amo ia hedinarai: pablisa taudia edia namba be hua 70 lalonai ia bada daekau ela bona August lalonai pablisa edia namba be 277,436. Danu, Bible stadi 400,000 bona ma haida idia karaia unai hua lalonai bona lagani 1989 ai taunimanima 1,046,291 be Memorial dekenai idia mai. Unai dainai nega vairai edia namba do ia bada daekau diba!

Lagani 1989 lalonai mai anina bada gauna ta ia vara. Mexico dekenai gavamani ese iena taravatu Iehova ena Witness taudia edia gaukara dekenai ia kokia. Unai dainai Witness taudia be nega ginigunana Bible idia gaukaralaia diba ruma ta ruma ta gaukara idia karaia neganai, bona nega ginigunana edia hebou be guriguri amo idia kehoa diba. Kara haraga, unai ese anina namona ia havaraia. Hua rua lalonai, pablisa taudia edia namba ia bada daekau ia lao 17,000.

Unai gau namona dainai tadikaka idia moale, bona edia hereva amo edia moale ia hedinarai. Idia ta ia gwau: “Kongregesen ena hebou lalonai revareva idia duahia neganai tadikaka idia moale dainai nega rua duahiduahi idia utua revareva ena hereva idia hanamoa totona. Unai be gau namo herea momokani!” Idia ma ta ia gwau: “Ai moale bada herea dainai aiemai matana ranu ai koua diba lasi. Hari, tadikaka be hebou dekenai idia mai haraga; hebou idia do kehoa lasi neganai idia mai. Idia ura lasi hebou ena guriguri ginigunana idia reaia.”

Ma Witness tauna ta ia gwau: “Aiemai teritori lalonai hahine ta, Roma Katolik Dubu ena Bible stadi gaukarana ia durua hahinena, ia gwau: ‘[Witness taudia] be edia hereva bona edia magasin sibodia amo aiemai uduna idia koua diba. To, hari Bible idia kehoa aiemai iduara dekenai idia gini neganai, bona unai dainai ai kwalimu diba lasi!’ ”

Mexico lalonai Iehova ena Witness taudia be nega idauidau bona gabu idauidau ai idia haroro goadagoada. Taihu ta be hahine ta dekenai ia raka lao neganai, unai hahine ese taihu ia nanadaia sinana ena bogana lalonai ia noho natuna hamasea karana be edena bamona ia laloa. Witness hahinena ia gwau: “Gau badana be lauegu lalohadai lasi, to Bible ena hereva.” Bible siri haida idia duahia murinai taihu ia gwau: “Gau ibounai ia havaraia Tauna dekenai mauri be gau badana, edia sinana amo ia do mara lasi natudia edia mauri danu.”

Unai hahine ia gwauraia hedinarai ia be mai bogana, iena natuna ginigunana unai, to kliniki taudia ese iena bogana idia sekea murinai idia gwau do ia mara neganai iena natuna ena tauanina do ia dika. Iena doketa ia ura iena natuna be iena bogana dekenai do ia hamasea, bona iena tau ese doketa ena lalohadai ia abia dae, to unai hahine ia daradara. Pablisa ese Bible ena hereva ma haida ia kikilaia ia dekenai, iena ladana be ia dekenai ia henia, bena idia parara.

Lagani 5 murinai, distrik hebouhebouna ta dekenai, tau ta, iena adavana bona edia lagani 4 natuna maragina idia ura unai taihu bona ena adavana do idia itaia. Unai tau ena hahine be guna ia itaia hahinena! Guna, dahaka ia vara? Witness hahine danu idia kiki hebou murinai, unai hahine ese iena lalona ia hadaia iena natuna do ia havaraia, do ia hamasea lasi. Iena doketa ia ura lasi unai hahine do ia itaia lou, bona iena tau ia gwau ia mara neganai, bema natuna ena tauanina ia dika, hahine do ia rakatania. Hahine ia mara gwauraia neganai, doketa tauna ta ia tahua bona ta ia davaria bena ia dekenai ia lao.

Ia mara murinai, doketa ia gwau: “Sinana e, namo bada herea! Natu kekeni hairaina oi abia inai!” Sinana ese iena hereva ia abia dae haraga diba lasi, unai dainai doketa ia noia iena natuna ena tauanina do ia sekea namonamo. Bena ia ese iena sivarai ibounai be doketa dekenai ia hamaoroa. Doketa ia gwau: “Hari ia vara gauna be hoa karana ta.” Hahine ia moale dikadika badina ia boga auka bona Iehova ena lalohadai mauri dekenai ia badinaia, iena lalohadai be mauri ia helaga. Hahine ese taihu ena ladana be iena natuna dekenai ia henia. Hahine ena goada ia hegeregere neganai, Witness taudia ia tahudia, bena idia danu Bible stadi ia hamatamaia. Lagani tamona ia do ore lasi neganai, ia bona iena tau idia bapatiso.

Aposetolo Paulo ia gwau: “Gaukara goada. Gaukara lalonai do umui lahedo lasi. Lohiabada ena gaukara do umui karaia mai emui lalona ibounai.” (Roma 12:11) Ma gabu iboudiai dekenai idia noho Keristen taudia momokanidia hegeregeredia, Iehova ena Witness taudia Mexico dekenai ese unai sisiba idia badinaia mai edia kudou ibounai ida. Unai badina dainai Mexico ena gabu iboudiai dekenai Witness taudia idia gaukara goadagoada bona lauma gaukara momo idia karaia. Iehova ese kamonai taudia ia hanamodia bada herea!