Hereva Namodia Ioane Bukana Amo

IEHOVA ena lauma helaga ese ia buruka tauna, aposetolo Ioane, ia hasiahua Iesu Keriso ena mauri bona haroro gaukara ena sivarai ia torea totona. Lagani 98 C.E. ai, Efeso dekenai eiava Efeso kahirakahira dekenai unai Evanelia buka ia torea. Dahaka gaudia ia sivarailaia? Bona ia lalonai hereva namodia be dahaka?

Sivarai Ia Habadaia

Ioane be ia torea sivaraidia momo be Mataio, Mareko, bona Luka idia torea sivaraidia hegeregerena lasi. Oibe, ia itaia bona ia torea sivaraidia momo herea, hegeregere 90 pesen, be Evanelia buka haida dekenai idia sivarailaidia lasi. Hegeregere, Iesu be guna guba dekenai ia noho bona gabeai unai “Hereva be taunimanima ena tauanina dekenai ia halaoa” ena sivarai be Ioane sibona ese ia torea. (1:​1-14) Evanelia buka oredia idia torea sivaraina lalonai idia gwau Iesu ena haroro gaukara dokona neganai ia ese dubu ia hagoevaia, to Ioane ia torea sivaraina lalonai ia gwau Keriso be ena haroro gaukara ia matamaia neganai danu unai bamona ia karaia. (2:​13-17) Unai buruka aposetolo tauna sibona be Iesu ia karaia hoa karadia ma haida ia torea hedinarai, hegeregere, ranu be uaina dekenai ia halaoa, ia mase tauna Lasaro ia hatoreaisi lou, bona Iena toreisi lou murinai idia haoda neganai hoa karana amo edia reke lalonai gwarume momo idia abia ena sivarai ia torea hedinarai.​—2:​1-11; 11:​38-44; 21:​4-14.

Evanelia buka idia torea taudia ibounai be Iesu ena mase laloatao totona ia gwauraia dalana ena sivarai idia torea hedinarai, to Ioane sibona be ia hahedinaraia idia dekenai manau karana idia diba totona Keriso be unai hanuaboi dekenai edia aena ia huria. Ma danu, unai nega lalonai mai kudouna ibounai ida Iesu ese idia ia hereva henia bona idia totona ia henia gurigurina, Ioane sibona ese ia torea hedinarai.​—13:1–17:26.

Unai Evanelia buka dekenai, idia torea ladana Ioane be Ioane Bapatiso, bona unai buka ia torea tauna ese sibona ia gwauraia ia be “Iesu ena lalokau tauna.” (13:23) Unai aposetolo tauna be Iesu ia lalokau henia momokani, bona iseda lalokau karana Keriso dekenai ia bada ita ese Ioane ena sivarai ita duahia neganai, badina ia gwau Iesu be Hereva, ia be mauri ena paraoa, ia be tanobada ena diari, ia be Mamoe Naria Tauna Namona, dala be ia, hereva momokani be ia, bona mauri be ia. (1:​1-3, 14; 6:35; 8:12; 10:11; 14:6) Ioane ia torea sivaraina ena badina be inai: “Inai idia torea gaudia edia badina korikori be, umui ese do umui abia dae Iesu be Keriso, Dirava ena Natuna, vadaeni do umui abidadama henia dainai, mauri do umui abia iena ladana dekenai.”​—20:31.

Manau bona Moale

Ioane ia torea Evanelia bukana lalonai ia gwau Iesu be Hereva, ia be kara dika kokia Mamoena bona ia hahedinaraia ena hoa karadia amo ia hamomokania Ia be “Dirava ena Helaga Tauna.” (1:1–9:41) Unai sivarai dekenai danu Ioane Bapatiso be manau tauna bona ia be moale tauna ia hahedinaraia. Ia be Keriso ena dala ia hegaegaelaia, to ia gwau: “Lau be hegeregere lasi iena tamaka varona do lau ruhaia.” (1:27) Tamaka idia kwatua boromakau kopina ena varo amo. Igui hesiai tauna ena maduna be ma tau ta ena tamaka ena varona ia ruhaia bona ena tamaka ia huaia. Ioane Bapatiso be unai hereva amo ia hahedinaraia ia be mai ena manau bona ia diba ia be maragi, to ena Biaguna be ia bada. Unai be sisiba namona ita totona, badina manau taudia sibona be idia hegeregere Iehova bona iena Mesia Pavapavana edia hesiai gaukara idia karaia totona!​—Salamo 138:6; Hereva Lada-isidia 21:4.

Ioane Bapatiso be mai hekokoroku danu Iesu ia badu henia lasi, to ia gwau: “Headava matamata hahine be headava matamata tauna ese ia biagua. To headava matamata tauna ena turana be ia gini noho, ia hakala, vadaeni headava matamata tauna ena gadona ia kamonai neganai ia moale bada. Unai dainai, lauegu moale be ia momokani vadaeni.” (3:29) Headava gwauraia tauna ena gadona ia badinaia tauna, be iena turana dainai ena headava dalana ia hegaegaelaia, bona nega haida ia ese kekeni ia mailaia ena turana ia adavaia totona, danu ia lao unai maoheni kekeni dekenai harihari gaudia ia henia totona bona headava davana kekeni ena tamana dekenai ia henia totona. Iena heduru gaukarana ia hagugurua neganai ia moale bada. Unai hegeregerena, Ioane ia moale Iesu ena headava hahine ena orea taudia ginigunadia Ia dekenai ia mailaia neganai. (Apokalupo 21:​2, 9) Headava tauna ena turana ena gaukara be ia noho daudau lasi hegeregerena, Ioane ena gaukara be ia noho daudau lasi. Iena gaukara be ia maragi ia lao, to Iesu ena gaukara be ia bada ia lao.​—Ioane 3:30.

Iesu be Taunimanima Ia Bogahisi Henia

Sukara hanua kahirakahira ena ranu guri ta dekenai, Iesu ese Samaria hahine dekenai mauri hanaihanai ranuna ena sivarai ia kikilaia. Ena hahediba taudia idia ginidae neganai, “idia hoa, badina ia be hahine ta danu ia herevahereva.” (4:27) Dahaka dainai idia hoa? Badina, Iuda taudia be Samaria taudia idia ura henidia lasi momokani bona idia hereva henidia lasi. (4:9; 8:48) Danu Iuda hahediba tauna be hahine danu taunimanima vairainai idia herevahereva lasi. To Iesu be taunimanima ia bogahisi henia dainai unai hahine ia haroro henia, bena unai kara dainai, taunimanima momo be hanua amo idia mai bona “Iesu dekenai idia lao.”​—4:​28-30.

Taunimanima ia bogahisi henia dainai, Iesu ia gwau: “Ranu mase tauna be lau dekenai ia mai, ranu do ia inua.” (7:37) Unai bamona ia hereva neganai, ia be dina 8 Kalaga Ariana dekenai idia atoa kau karana ta ia herevalaia. Unai aria negana lalonai hahelaga tauna be daba kahanai, dina ta ta 7 lalonai ranu ia utua dae, Siloama ena ranu guri amo, bona ia abia lao bona ia bubua dubu ena pata dekenai. Unai be gau haida ia haheitalaia, idia gwau unai be lauma helaga bubua diho karana ia laulaulaia. Pentekoste 33 C.E. ena nega amo, Dirava ena lauma helaga ese Iesu ena hahediba taudia ia hasiahudia mauri hanaihanai ranuna tanobada taudia ibounai dekenai idia abia lao totona. Keriso dekena amo Iehova mo sibona be “mauri ranuna” ia henia diba, taunimanima ese mauri hanaihanai do idia abia totona.​—Ieremia 2:13; Isaia 12:3; Ioane 17:3.

Mamoe Naria Tauna Namona be Taunimanima Ia Laloa Bada!

Ita diba Iesu be taunimanima ia laloa bada badina Mamoe Naria Tauna Namona ena gaukara ia karaia neganai ena mamoe bamona hahediba taudia ia naria namonamo. Ena be kahirakahira do ia mase, to Iesu be mai lalokau danu ena hahediba taudia ia sisiba henia bona idia totona ia guriguri. (10:1–17:26) Ia be henaohenao eiava kohu abia kava tauna bamona ia mai lasi, ia be mamoe edia magu ena iduara dekenai ia vareai. (10:​1-5) Mamoe haboua gabuna be magu amo idia koua hegege bena hanuaboi dekenai unuseniai idia atodia henaohenao taudia eiava dagedage animal ta do idia hadikaia garina. Unai magu be nadi amo idia karaia, bona reana ia latanai au rigina mai ginigini idia atoa, bona iduara badinai naria tauna ia gini noho.

Mamoe naria taudia idauidau edia mamoe serina be idia haboua tamona unai gabu tamona dekenai, to unai mamoe iboudiai be edia biaguna ena gadona sibona do idia kamonai henia. Ena buka ladana Manners and Customs of Bible Lands lalonai, Fred H. Wight ia gwau: “Seri idauidau hapararaia totona, mamoe naria taudia ta ta do idia gini bona idia boiboi, idia gwau: ‘Tahhoo! Tahhoo!’ eiava ma boiboi ta do idia boiboilaia edia ura hegeregerena. Unai neganai mamoe be edia kwarana idia abia isi, bona idia ibounai idia haragaharaga sibodia edia biaguna ta ta murinai idia raka totona. Idia daradara lasi, ta ta ibounai be sibona ena biaguna, sibona ena biaguna, edia hereva toana idia diba. Ena be idau taudia ese edia boiboi hereva idia tohotohoa, to idia boiboi kava badina mamoe be idia murinai idia lao lasi.” Unai be Iesu ena hereva hegeregerena, ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai.” (10:​27, 28) “Orea maragi” taudia bona “mamoe idaudia” be Iesu ena gadona idia kamonai, ia ena kara idia tohotohoa, bona mai hebogahisi danu idia ia naria dainai idia moale.​—Luka 12:32; Ioane 10:16.

Dirava ena Abidadama Noho Natuna

Keriso be tanobada dekenai ia noho neganai ena abidadama karana Dirava dekenai ia goada noho bona ia be lalokau mamoe naria tauna namona. Toreisi lou murinai ia hedinarai neganai ena hebogahisi karana ia hahedinaraia. Taunimanima ia bogahisihisi henidia dainai Iesu ese Petro ia hagania Iena mamoe do ia ubudia totona.​—18:1–​21:25.

Iesu be haheitalai namona ita dekenai, badina au dekenai idia hasatauroa, to ela bona ia mase ena abidadama ia goada noho. Peroveta herevana hagugurua totona tuari taudia be taunimanima vairanai idia hahemaraia ‘ena dabua idia haria’ neganai. (Salamo 22:18) Laki gadara idia karaia daika ese ena dabua namona (Greek, khi·tonʹ) do ia abia totona. Unai dabua be turia hakapua lasi gauna. (19:​23, 24) Unai bamona dabua be reana mamoe huina eiava linen amo idia karaia bona ena turia hakapua gauna be lasi, bona ena kala be kurokuro eiava ma kala ta. Nega momo unai dabua idia karaia neganai imana ia koua lasi, bona kopina kahirakahira dekenai idia atoa bona ena lata be ia diho ela bona tuina eiava aena komukomu. Ita diba Iesu be kohu tahua momo tauna lasi, to unai dabua namona ia karaia, turia hakapua lasi gauna unai.

Iesu be ia toreisi lou murinai, iena hahediba taudia dekenai nega ta ia hedinarai neganai, idia ia hanamoa herevana be inai: “Maino umui abia.” (20:19) Iuda taudia momo be unai bamona hanamoa herevana idia gwauraia. (Mataio 10:​12, 13) Reana idia momo be unai hereva idia laloa bada lasi. To Iesu ese unai hereva ia laloa bada, badina guna ena hahediba taudia dekenai, ia gwau: “Maino umui dekenai lau rakatania, lauegu maino lau henia umui dekenai.” (Ioane 14:27) Iesu ese ena hahediba taudia dekenai ia henia mainona ena anina be idia abidadama ia be Dirava ena Natuna, bona unai idia diba dainai edia kudouna bona lalona dekenai idia hekwarahi lasi, bena maino idia abia unai.

Unai hegeregerena, ita be “Dirava ena maino” ita abia diba. Iehova ita bamoa namonamo diba iena lalokau Natuna dekena amo, bona namona be unai karana amo ia havaraia mainona ita laloa bada.​—Filipi 4:​6, 7.

[Picture Credit Line on page 31]

Pictorial Archive (Near Eastern History) Est.