Do Oi Duahia Gauna—Solomona Ena Aonega Sisibana

“BUKA momo idia torea noho, doko lasi, bona edia anina do oi tahua neganai, oi dekenai hesiku do ia havaraia.” (Hadibaia Tauna 12:12) Israela ena aonega King Solomona ese lagani 3,000 gunanai unai hereva ia torea neganai, ia ese buka duahia karana ia gwauraia dika lasi. To, ia hahedinaraia ita duahia gauna be do ita abia hidi namonamo. Unai sisiba be nega maorona ai idia henia, badina hari lagani ta ta ai printa masinidia amo duahiduahi bukadia bilioni momo idia halasia noho!

Ia hedinarai goevagoeva, Solomona ia herevalaia “buka momo” be lalona idia hagoadaia lasi bukadia. Unai dainai, ia gwau bema nega bada ita haorea ita duahia totona, namo ta do ia havaraia lasi to ‘ita dekenai hesiku do ia havaraia.’

To, Solomona ena hereva ena anina be duahia tauna do ia durua buka ta mai ena hakaua hereva namodia idia noho lasi, a? Lasi, to ma ia gwau: “Aonega taudia edia hereva be au ta mai matana, mamoe naria taudia ese idia iusilaia, mamoe hakaua totona gauna bamona. Bona aonega herevadia, idia haboua namonamo gaudia, be mai edia goada, idia kokoa auka ikokodia bamona. Mamoe Naria Tauna tamona, Dirava ese, inai aonega hereva ita dekenai ia henia.” (Hadibaia Tauna 12:11) Momokani, idia torea hereva haida be “au ta mai matana” bamona, ta dekenai heduru namona idia henia diba. Ta ia hagoadaia diba dala maorona dekenai ia raka totona. Bona danu, “idia kokoa auka ikokodia bamona” ta ia durua ena lalona ia hadaia goada bona unai ese ia do ia durua.

Edeseniai unai bamona aonega sisiba ita davaridia diba? Solomona ena hereva hegeregerena, unai bamona aonega hereva hereadaedia be, Mamoe Naria Tauna tamona Iehova amo ita abia diba. (Salamo 23:⁠1) Unai dainai, unai aonega herevadia davaria totona, ta ese Dirava ena lauma amo ia vara bukana​​—⁠Baibel​—⁠ia abia hidi be namo. Unai bamona hereva namodia ia duahia hanaihanai karana ese ia do ia durua, bena ‘kara namodia ibounai do ia karaia mai kwalimu danu.’​​—⁠2 Timoteo 3:​16, 17.