Kekero Muramura Gaukaralaia Karana Laloa Maoromaoro
“Uaina bona kekero muramura ese, kerere bona heai idia havaraia noho. Inua kekero ese ia hakaua kerere taudia be kavakava.”—AONEGA HEREVADIA 20:1.
1. Salamo torea tauna ese Iehova amo idia mai harihari gaudia namodia laloa bada karana be edena bamona ia herevalaia?
HAHEDIBA TAUNA Iamesi ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia.” (Iamesi 1:17) Salamo torea tauna be Dirava ena harihari gaudia namodia idauidau ia laloa bada dainai, ia gwau: “Oi ese rei oi hatubua, boromakau do idia ania totona. Oi dainai, ai taunimanima ese, aniani avadia idauidau ai hadoa diba, aiemai aniani totona: Ai ese vain ai hadoa diba, bona uaina ai karaia, aiemai lalona do idia moale totona. Bona ai ese olive ai havaraia diba, olive ena dehoro ese aiemai kopina do ia hanamoa totona. Bona oi dainai ai ese uiti uhena ai hadoa diba, bona uiti dekena amo beredi ai karaia, aiemai tauanina do idia goada totona.” (Salamo 104:14, 15) Uaina bona kekero muramura idauidau be au huahua, beredi bona oela hegeregerena, idia ibounai be Dirava amo idia mai gau namodia. Edena dala ai unai gaudia ita gaukaralaia be namo?
2. Kekero muramura gaukaralaia karana dekenai dahaka henanadai do ita lalodia?
2 Harihari gauna namona ta ita gaukaralaia namonamo neganai ita moale. Hegeregere, hani “be namo” to “hani momo do oi ania be namo lasi.” (Aonega Herevadia 24:13; 25:27) Ena be “uaina sisina” inua karana be ia namo, to kekero muramura gaukaralaia kerere karana be hekwakwanai badana. (1 Timoteo 5:23) Baibel ia gwau: “Uaina bona kekero muramura ese, kerere bona heai idia havaraia noho. Inua kekero ese ia hakaua kerere taudia be kavakava.” (Aonega Herevadia 20:1) To, kekero muramura ese ta ia hakaua kerere ena anina be dahaka?a Kekero muramura hida oi inua neganai, oi be sikele oi hanaia vadaeni? Unai kara be edena bamona ita laloa maoromaoro diba?
Kekero Muramura ese “Ia Hakaua Kerere”—Edena Dala Ai?
3, 4. (a) Dahaka ese ia hahedinaraia Baibel ese ta ia inuinu ela bona ia kekero karana ia gwauraia dika? (b) Ta ia kekero ena toana haida be dahaka?
3 Idaunegai Israela dekenai bema gwau-edeede natuna ta ia aniani bona inuinu momo, ia be nadi amo idia hodoa mase. (Deuteronomi 21:18-21) Aposetolo Paulo ese Keristani taudia ia sisiba henia: “Iseda Keristani varavara tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.” Ia hedinarai goevagoeva, Baibel ese ta ia inuinu ela bona ia kekero karana ia gwauraia dika.—1 Korinto 5:11; 6:9, 10.
4 Baibel ese kekero ena toana be inai bamona ia herevalaia: “Do oi naria namonamo, uaina ese oi do ia koia garina. Uaina be kapusi lalonai ia kakakaka namo herea, be do oi ura henia momo lasi. Iena mamina namo herea do oi laloa lasi. Badina be dokona neganai, uaina ese gaigai bamona oi do ia koria, bona gaigai korema hegeregerena, oiemu kopina be poisini dekenai do ia kodoa. Oiemu matana ese idau gaudia do idia itaia, bona oiemu laloa, bona oiemu hereva, be do idia gagevagageva.” (Aonega Herevadia 23:31-33) Inuinu kekero karana be poisini gaigai ta bamona ta ia koria diba, bena gorere, daradara eiava maserea ia havaraia. Kekero tauna be “idau gaudia” do ia itaia, ia nihi bamona. Danu, reana ia karaia lasi karadia haida, matabodaga lalohadaidia bona ura dikadia unai, do ia hahedinaraia.
5. Edena dala ai kekero muramura inua momo karana be mai ena dika?
5 Bema ta be kekero muramura ia inua to ia ura lasi taunimanima ese ena kekero toana idia itaia be edena bamona? Haida be kekero ena toana idia hahedinaraia lasi, herevana kekero muramura momo idia inua. To, bema oi laloa unai kara be dika lasi, oi be sibona oi koia unai. (Ieremia 17:9) Metairametaira, ta be kekero muramura ia tabekau henia matamaia diba, bona ‘inuinu kekero ese ia do ia biagua.’ (Tito 2:3) Toretore hahinena ta Caroline Knapp be kekero muramura manadalaia karana ia herevalaia: “Ta be ia lalo-parara lasi to metairametaira unai kara do ia manadalaia tauna ai do ia lao.” Kekero muramura gaukaralaia kerere karana be tarapu dikana!
6. Dahaka dainai ta ese inuinu bona aniani momo karana ia dadaraia be namo?
6 Danu, Iesu ena hadibaia herevana ita laloa: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina. Badina be unai Dina be tanobada latanai idia noho taunimanima ibounai dekenai do ia ginidae.” (Luka 21:34, 35) Herevana ta ia kekero momokani eiava lasi, to unai kara ese mahuta bona lahedo mamina—tauanina bona lauma dalanai—ia havaraia diba. To bema ia kekero noho lalonai Iehova ena dina ia ginidae be edena bamona?
Kekero Muramura Gaukaralaia Kerere Karana ese Ia Havaraia Gaudia
7. Dahaka dainai kekero muramura gaukaralaia kerere karana be 2 Korinto 7:1 ena hahegani ia utua?
7 Ta ese kekero muramura ia gaukaralaia kerere neganai, dika idauidau—tauanina bona lauma dalanai—ia davaria diba. Unai kara ese ia havaraia gorere haida be, ta ena asena ia dika, bona hemami varovaro haida idia dika dainai ta ia gari, heudeheude bona ia kavakava bamona. Nega daudau lalonai kekero muramura gaukaralaia kerere karana ese danu kensa gorere, suga gorere, bona kudouna bona bogana lalonai gorere haida ia havaraia diba. Kekero muramura gaukaralaia kerere karana be inai Baibel ena hahegani ia utua: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava ena vairanai do ita noho namonamo, mai goeva bona mai gari danu.”—2 Korinto 7:1.
8. Aonega Herevadia 23:20, 21 edia hereva hegeregerena, kekero muramura gaukaralaia kerere karana amo dahaka ia vara diba?
8 Kekero muramura gaukaralaia kerere karana ena anina ma ta be, ta ese ena moni do ia haorea kava eiava moni gaukara do ia haboioa. Idaunegai Israela ena King Solomona ia gwau: “Kekero muramura momo idia inua taudia, danu do oi inua hebou lasi, bona aniani idia ania momo taudia, danu do oi noho lasi.” Dahaka dainai? Ia gwau: “Kekero taudia bona idia aniani momo taudia, be do idia ogogami, bona mahuta momo taudia, be momoru dabua do idia karaia.”—Aonega Herevadia 23:20, 21.
9. Bema motuka ta oi taria gwauraia, dahaka dainai kekero muramura oi inua lasi be aonega karana?
9 Buka ta (The Encyclopedia of Alcoholism) ese hekwakwanai ma ta ia herevalaia: “Hetahu karadia ese idia hahedinaraia kekero muramura gaukaralaia karana ese motuka taria karana bona naria, itaia bona laloa namonamo karadia ia hadikaia diba.” Ta ia kekero lalonai motuka ia taria neganai, dika bada herea do ia davaria. United States sibona dekenai, kekero muramura dainai lagani ibounai lalonai taunimanima tausen momo be trafik aksiden lalonai idia mase bona handred tausen momo be bero idia davaria. Unai dika idia davaria taudia momo be memero kekeni, edia diba draiva bona kekero muramura inua karana dekenai be bada lasi. Ta ese kekero muramura haida ia inua murinai motuka ia taria neganai, ia gwau diba ia be Iehova Dirava ena harihari gauna mauri ia matauraia, a? (Salamo 36:9) Mauri be ia helaga dainai, ta be motuka ia taria gwauraia neganai, kekero muramura ta ia inua lasi be namo.
10. Edena dala ai kekero muramura ese iseda lalona ia hadikaia diba, bona dahaka dainai unai be dika herea?
10 Kekero muramura gaukaralaia kerere karana ese tauanina sibona lasi, to danu lauma dalanai taunimanima ia hadikaia. Baibel ia gwau: “Inua kekero idauidau, uaina matamata, bona uaina gunana danu ese egu bese taudia edia laloa idia hadikaia noho!” (Hosea 4:11) Kekero muramura ese ta ena lalona ia hadikaia. Orea ta (U.S. National Institute on Drug Abuse) ena buka ta ia gwau: “Kekero muramura be bogana lalonai ia diho bena rara ena varovaro amo idia hanaia lao haraga kwara harana dekenai. Unai ese harana ena kahana haida hegeregere, lalohadai bona hemami idia biagua kahadia unai, edia gaukara ia hamaragia matamaia. Bena ta ia mamia ena kara ia biagua diba lasi.” Unai bamona negadiai, reana kekero ese ita do ia “hakaua kerere,” kavakava karadia ita karaia diba, bona hedibagani momo lalonai do ita moru.—Aonega Herevadia 20:1.
11, 12. Kekero muramura gaukaralaia kerere karana ese lauma dalana ai dahaka dika ia havaraia diba?
11 Ma danu, Baibel ia gwau: “Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.” (1 Korinto 10:31) Inuinu kekero karana ese Dirava ia hanamoa, a? Keristani tauna ia ura lasi taunimanima ese ia idia gwauraia inuinu momo tauna. Unai bamona kara ese Iehova ena ladana do ia hahairaia lasi, to ia hadikaia.
12 To bema Keristani tauna ta ia inuinu kekero dainai iena tadikaka ta, reana hahediba tauna matamatana, ia hahekwakwanaia be edena bamona? (Roma 14:21, Buka Helağa) Iesu ia gwau: “Inai bamona mero ta, lau dekenai ia abidadama, do ia hakererea [eiava “hahekwakwanaia,” Buka Helağa] tauna be, nadi badana ta iena aiona dekenai bema idia kwatua bona davara dekenai bema idia negea diho, vadaeni ia mase be namo.” (Mataio 18:6) Danu, inuinu kekero karana dainai tadikaka eiava taihu ta be kongrigeisen dekenai hahenamo haida ia haboioa diba. (1 Timoteo 3:1-3, 8) Kekero muramura gaukaralaia kerere karana ese danu ruma bese lalonai dika ia havaraia diba.
Dika Idauidau Dadaraia—Edena Dala Ai?
13. Kekero muramura gaukaralaia kerere karana ita dadaraia totona, dahaka be gau badana?
13 Kekero muramura gaukaralaia kerere karana ena dika ita hanaia totona, gau badana be inuinu karana ena hetoana—kekero lasi to inuinu ena sikele maorona bona kererena—oi diba be namo. Daika ese oi totona inuinu karana ena hetoana ia atoa diba? Gau idauidau dainai, kekero muramura hida ita inua karana dekenai taravatu aukana ita gwauraia diba lasi. Namona be ta ta be sibona ena inuinu ena sikele ia diba, bona unai sikele ia hanaia lasi. Dahaka gaudia ese oi do idia durua inuinu ena sikele maorona oi abia hidi totona? Hakaua herevana ta ese oi ia durua diba, a?
14. Dahaka hakaua herevana ese oi do ia durua inuinu ena sikele oi diba totona?
14 Baibel ia gwau: “Aonega namona, bona laloa kehoa do oi dogoatao noho. . . . Idia ese oiemu lauma do idia hamauria, bona noho namo, mai moale danu oi dekenai do idia henia.” (Aonega Herevadia 3:21, 22) Vadaeni oi badinaia hakaua herevana be inai: Bema kekero muramura haida oi inua bona unai ese oiemu laloa namonamo bona laloa kehoa karana ia hadikaia, anina be inuinu ena sikele oi hanaia vadaeni. To, mai momokani ida oi sibona emu inuinu ena sikele oi diba be namo!
15. Edena negai reana kavabu tamona inua karana ita dadaraia be aonega karana?
15 Nega haida, reana kavabu tamona ita inua lasi danu be namo. Inuinu karana ese beibi ia hadikaia diba dainai, rogorogo hahinena ia inuinu lasi be namo. Bona bema guna ia kekero tauna ta eiava inuinu karana ese ena lalomamina do ia hadikaia diba tauna ta ia noho neganai, idia vairanai oi inuinu lasi be namo, ani? Iehova ese dubu dekenai hahelaga gaukara idia karaia taudia ia haganidia: “Lauegu Palai Dubu umui raka vareai neganai, uaina o bia do umui inua lasi. Bema inai bamona umui karaia neganai do umui mase.” (Levitiko 10:8, 9) Unai dainai, Keristani heboudia dekenai ita lao, haroro gaukara bona kongrigeisen ena maduna ma haida ita karaia gwauraia neganai, kekero muramura ita inua lasi be namo. Ma danu, bema tano haida dekenai kekero muramura idia taravatua eiava edia mauri lagani idia bada taudia sibona idia inuinu be namo, vadaeni Keristani taudia ese unai tano ena taravatu idia badinaia be namo.—Roma 13:1.
16. Kekero muramura be emu vairana ai idia atoa neganai, edena bamona oi kara be namo?
16 Kekero muramura be oi dekenai idia henia eiava oi vairanai idia atoa neganai, oi sibona dekenai oi henia henanadai ginigunana be inai: ‘Lau inua be namo eiava lasi?’ Bema oiemu lalona oi hadaia do oi inuinu, namona be emu inuinu ena sikele oi laloa, bona unai sikele oi hanaia lasi. Oi ia boiria tauna ena hariharibada karana ese emu lalona ia doria dainai oi inuinu be maoro lasi. Bona moale hebou gabudia haida dekenai kekero muramura momo idia noho neganai, namona be ita naria namonamo. Gabu momo dekenai, natudia ese kekero muramura idia inua be taravatu lasi. To kekero muramura gaukaralaia karana dekenai, tama sina edia maduna be edia natudia idia hadibaia bona naridia namonamo be namo.—Aonega Herevadia 22:6.
Unai Hekwakwanai Oi Hanamoa Diba
17. Dahaka ese oi ia durua diba bena oi itaia kekero muramura gaukaralaia kerere karana be hekwakwanai ta oi dekenai eiava lasi?
17 Uaina bona kekero muramura ma haida gaukaralaia kerere karana be hekwakwanai ta oi dekenai, a? Oi sibona oi koia lasi: Bema hehuni dalanai kekero muramura oi gaukaralaia kerere noho, gabeai oi do ia hadikaia. Unai dainai, oi sibona emu kara oi tahua namonamo be namo. Hegeregere oi sibona oi nanadaia: ‘Hari kekero muramura momo lau inua karana be guna bamona lasi, a? Kekero muramura aukadia lau inua noho, a? Kekero muramura lau inua badina lau ura lalo-hekwarahi eiava hekwakwanai idauidau lau hanaia totona, a? Egu inuinu karana dainai, egu ruma bese tauna eiava turana ta ese lau ia hereva henia vadaeni, a? Lauegu inuinu karana ese hekwakwanai haida egu ruma bese lalonai ia havaraia, a? Bema lau ese nega ta, reana hua ta, lalonai inuinu karana lau hadokoa toho, egu tahua gauna lau hagugurua eiava lasi? Uaina eiava kekero muramura hida lau inua be ma haida amo lau hunia, a?’ Bema unai henanadai haida dekenai emu haere be oibe, be edena bamona? Namo lasi ita be inai tau bamona, ia “be sibona ena vairana ena toana hevarivari lalonai ia itaia bamona . . . bona maoromaoro iena vairana ena toana ia laloaboio momokani.” (Iamesi 1:22-24) Dala oi tahua unai hekwakwanai oi hamaoromaoroa totona. Dahaka oi karaia diba?
18, 19. Edena bamona kekero muramura gaukaralaia kerere karana ita hadokoa diba?
18 Aposetolo Paulo ese Keristani taudia ia sisiba henia: “Inuinu dekena amo do umui kekero lasi, inai be emui mauri do ia hadikaia. To Lauma Helaga dekena amo do umui honu.” (Efeso 5:18) Oiemu lalona oi hadaia kekero muramura hida oi inua be maoro, bona inuinu ena sikele ena hetoana korikorina oi atoa. Namona be unai sikele oi hanaia lasi; tauanina ena ura oi koua. (Galatia 5:22, 23) Emu bamodia ese oi idia doria oi inuinu kekero totona, a? Oi naria namonamo. Baibel ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.”—Aonega Herevadia 13:20.
19 Bema oi be kekero muramura oi gaukaralaia hekwakwanai haida oi hanaia totona, oi inuinu lasi neganai oi hanaia be namo. Dirava ena Hereva ena sisiba oi badinaia neganai unai hekwakwanai oi hanamoa diba. (Salamo 119:105) Namona be Keristani elda tauna ena heduru oi tahua haraga. Iehova ia henia gaudia oi gaukaralaia namonamo, lauma dalanai oi idia hagoadaia totona. Oiemu hetura karana Dirava ida oi hagoadaia. Hanaihanai Ia dekenai oi guriguri—gau badana be emu manoka gauna oi gwauraia hedi-narai. Dirava oi noia ‘emu ura bona emu laloa danu do ia tahua.’ (Salamo 26:2) Stadi gunana ai ita herevalaia bamona, namona be ita gaukara goada kara maoromaoro ita badinaia totona.
20. Bema inuinu kekero karana ena hekwakwanai ia do noho, dahaka oi karaia diba?
20 To bema inuinu kekero karana ena hekwakwanai ia do noho, herevana oi hekwarahi oi dadaraia totona, be edena bamona? Iesu ena sisiba oi badinaia be namo: “Bema oiemu imana ese kara dika ia karaia [eiava “oi ia hahekwakwanaia,” Buka Helağa], oi utua negea, namo oi be imana tamona tauna bona mauri oi davaria. Badina ia namo lasi oiemu imana rua idia noho, to oi vareai lao [“Gehena,” Buka Helağa] dekenai, lahi habodoa diba lasi gabuna.” (Mareko 9:43) Haere be inai: Oi inuinu lasi. Hahine ta ena ladana do ita gwauraia Irene be unai bamona ia karaia. Ia gwau: “Kahirakahira lagani rua mai kahana lalonai kekero muramura lau inua lasi murinai, lau laloa reana kekero muramura tamona sibona do lau inua be kerere lasi, lau ura itaia bema egu kara lau biagua diba eiava. To unai bamona lau mamia matamaia neganai, karaharaga Iehova dekenai unai lau gurigurilaia. Egu lalona lau hadaia vadaeni kekero muramura do lau inua lasi ela bona nega matamata ia ginidae, bona reana unai negana ai danu do lau inuinu lasi.” Kekero muramura oi dadaraia vaitani be auka lasi bema oi ura Dirava ena tanobada matamatana lalonai oi noho.—2 Petero 3:13.
“Do Umui Heau Goadagoada, Kwalimu Ahuna Do Umui Abia Totona”
21, 22. Dahaka ese ita ia koua diba mauri ena heau helulu ita hagugurua lasi totona, bona edena bamona unai ita dadaraia diba?
21 Aposetolo Paulo ese Keristani maurina be heau helulu karana ida ia hahegeregerea neganai, ia gwau: “Umui diba, ani, heau helulu dekenai idia heau taudia ibounai idia heau noho, to tau tamona sibona ese kwalimu ahuna ia abia. Unai bamona do umui heau goadagoada, kwalimu ahuna do umui abia totona. Gadara helulu do idia uini totona, heau helulu taudia ese edia tauanina ena ura idia atoa diho, idia tereini goadagoada. Inai bamona idia karaia be, do ia dika haraga kwalimu ahuna abia totona. To ita ese unai bamona do ita karaia be, noho hanaihanai kwalimu ahuna do ita abia totona. Lau heau maoromaoro, mai laloa tamona danu, lauegu heau dokona dekenai do lau ginidae totona. Lau be boksini tauna bamona lau paisi goadagoada, do lau uini totona. Hodahoda lau paisia lasi. To lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida do lau haroro henidia, to gabeai lau sibona egu mauri do lau halusia garina.”—1 Korinto 9:24-27.
22 Heau helulu idia hagugurua taudia sibona ese kwalimu ahuna namona do idia abia. Mauri ena heau helulu lalonai, kekero muramura gaukaralaia kerere karana ese ita ia koua diba unai heau helulu ita hagugurua totona. Tauanina ena ura ita biagua be namo. Ita heau namonamo totona, namona be ‘uaina ita inua momo’ lasi. (1 Petero 4:3) To, gau ibounai dekenai iseda tauanina ena ura ita koua be namo. Kekero muramura ita inua neganai, namona be mai aonega danu “Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.”—Tito 2:12.
[Footnote]
a Inai stadi lalonai, kekero muramura ena anina be bia, uaina bona muramura aukadia ma haida.
Oi Laloatao, A?
• Kekero muramura gaukaralaia kerere karana ena anina be dahaka?
• Kekero muramura gaukaralaia kerere karana amo dahaka dika idauidau idia vara?
• Kekero muramura gaukaralaia kerere karana ena dika be edena bamona oi dadaraia diba?
• Edena dala ai kekero muramura gaukaralaia kerere ena hekwakwanai oi hanamoa diba?
[Picture on page 27]
Uaina ese taunimanima edia lalona ia hamoalea
[Picture on page 28]
Namona be iseda inuinu ena sikele ita diba, bona unai sikele ita hanaia lasi
[Picture on page 29]
Inuinu karana ena hetoana oi diba be namo
[Picture on page 30]
Hanaihanai Iehova dekenai emu manoka gauna oi gurigurilaia
[Picture on page 31]
Kekero muramura gaukaralaia karana dekenai, tama sina edia maduna be edia natudia idia hadibaia bona naridia namonamo be namo