Nega Gaukaralaia Namonamo

TAUNIMANIMA momo be inai hereva idia diba: Nega be ta do ia naria lasi. Unai hereva ese ia hahedinaraia nega ita gaukaralaia namonamo be gau badana. Badina, nega ia hanaia neganai, unai nega be ia ore momokani. Nega ita atoa to bema unai nega ita gaukaralaia lasi, unai be anina lasi. Hanuaboi ai hora 8 oi mahuta bona dina ai gau ta oi karaia lasi, oi gaukaralaia lasi nega dekenai dahaka ia vara? Unai nega be ia ore momokani, bona do ita abia lou diba lasi.

Nega be ia aru hanaihanai sinavai badana ta ida ita hahegeregerea diba. Ia aru lao sibona bona oi koua diba lasi. Lagani handred gunana ai, taunimanima momo be sinavai badinai ranu ese ia hagiroa uili idia karaia. Unai uili ese masini haida dekenai paua ia henia, hegeregere timba utua masini, pamu bona hama badadia. Unai hegeregerena, nega be ita haboua diba lasi dainai namona be ita gaukaralaia, gaukara namona ita karaia totona. To unai ita karaia totona, nega halusia kava lasi karana bona anina lasi kohudia negea karana do ita herevalaia. Mani nega halusia kava lasi karana ita laloa guna.

Gaukara be Nega Korikori ai Karaia

Taunimanima haida idia gwau, hari oi karaia diba gaudia oi rakatania lasi gabeai oi karaia totona. To haida be unai hereva idia abia dae lasi. Bema idia be gaukara aukana ta idia ura karaia, unai gaukara idia rakatania ela bona ma nega ta ai idia karaia. Oi ura oi karaia gauna be oi rakatania ela bona ma nega ta do oi karaia ese ia hahedinaraia oi be nega korikori ai gaukara oi karaia lasi. Bema tau ta be hanaihanai hari ia karaia gaudia ia rakatania ela bona ma nega ta ai ia karaia, unai kara do ia manadalaia. Unai bamona tauna be gaukara badana ta ia abia neganai ia lalohekwarahi. To ena lalohekwarahi ia hamaragia totona, unai gaukara do ia rakatania ela bona nega ma ta ai do ia karaia, bona unai nega kwadogina lalonai ia moale, to gabeai unai gaukara hagugurua negana ia ore dainai do ia lalohekwarahi bada herea.

Nega haida hemami bona tauanina dalanai ita hesiku dainai reana gaukara ma haida eiava gaukara ibounai be gabeai do ita karaia. Danu, ita ibounai ita ura dina ta ta ai ita karaia gaukara amo ita laga-ani. Iesu be ia laga-ani danu. Ena haroro gaukara lalonai ia bisi bada, to ia sibona bona ena hahediba taudia totona nega ia atoa idia laga-ani totona. (Mareko 6:​31, 32) Unai bamona laga-ani karana be mai ena namo. To gaukara be nega korikori ai karaia lasi karana be mai ena dika. Mani haheitalai ta ita itaia.

Sikuli stiuden ta be matematik eksam totona wiki toi lalonai do ia stadi. Unai dainai buka bona nouti ma haida ia riviulaia be namo. Ia lalohekwarahi. Bona nega ia atoa lasi ia stadi totona, to TV ia itaia, bona nega bada ia halusia. Dina ta ta ai eksam totona do ia stadilaia gaudia be ia stadilaidia lasi. Bena, eksam ia kahirakahira dinana ai, ia stadi matamaia. Unai hanuaboi ai ena matematik eksam totona buka bona nouti ma haida ia riviulaia.

Nega kwadogina lalonai gau momo ia stadilaia. Ena ruma bese idia mahuta noho lalonai, ia be ena sikuli gaudia ia stadilaia noho. To eksam dinana ai, ia laga-ani namonamo lasi dainai ia hesiku bada, unai dainai sikuli ena eksam lalonai henanadai momo be ia haerelaia lasi. Maka namona ia abia lasi dainai ia hegeregere lasi greid ma ta dekenai ia hanaia totona. Unai kosi ia karaia lou be namo.

Nega korikori ai ia stadi lasi dainai unai stiuden be maka namona ia abia lasi. To Baibel ena hakaua herevana ta ese ita ia durua unai stiuden ena kara ita tohotohoa lasi totona. Aposetolo Paulo ia gwau: “Unai dainai umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona.” (Efeso 5:​15, 16) Paulo be Keristani maduna idia huaia taudia ia hamaorodia edia nega idia gaukaralaia namonamo totona, to unai hakaua herevana be mai anina bada ma gau haida dekenai danu. Bema ita ura karaia gauna be ita abia hidi negana ai ita karaia, nega korikori ai unai gaukara do ita haorea diba. Baibel ese ia hahedinaraia unai be aonega tauna ena kara.

Oi laloa edena nega be nega namona unai stiuden ese matematik eksam ia stadilaia totona? Reana hanuaboi ibounai miniti 15 lalonai unai ia karaia diba. Unai amo gau ibounai be hanuaboi tamona lalonai do ia stadilaia lasi bona ia mahuta namonamo diba. Unai stiuden be ia stadi bona mahuta namonamo dainai, eksam dinana ai maka namona do ia abia.

Unai dainai bema gaukara ta oi abia neganai, nega oi abia hidi bona unai nega ai oi karaia be namo. Unai amo emu gaukara be nega korikori ai do oi karaia. Oi karaia namonamo gaukarana dekenai moale do oi davaria. Unai be mai anina bada, badina Keristani kongrigeisen lalonai ita abia maduna idauidau be nega korikori ai ita karaia namonamo neganai, unai ese ma haida do ia durua.

Do Oi Gaukaralaia Lasi Kohudia Oi Negea

Iseda nega ita gaukaralaia namonamo totona gau iharuana be, anina lasi kohudia ita negea be namo. Ita diba kohu ita tahua, ita atoa namonamo, ita gaukaralaia bona ita hagoevaia totona, nega bada ita haorea. Bema ruma dekenai kohu momo idia noho, nega bada oi haorea eiava oi hekwarahi bada oi hagoevaia totona. To bema ruma dekenai kohu be momo lasi, nega bada do ita haorea lasi iseda ruma ita hagoevaia totona. Bona, bema kohu momo idia noho nega bada do oi haorea oi ura gauna oi tahua totona bona do oi lalohisihisi.

Ruma hagoevaia gaukarana idia karaia taudia idia gwau, ruma idia hagoevaia neganai, nega momo kohu atoa namonamo bona momoru negea karana ese nega bada ia haorea. Bona mauri lalonai ita karaia gaudia momo dekenai unai ia vara diba. Unai dainai bema oi ura emu nega oi gaukaralaia namonamo, emu ruma dekenai idia noho gaudia oi itaia namonamo. Oi gaukaralaia lasi kohudia ese emu ruma ia hahonua dainai, oiemu raka dalana ia koua bona emu nega ia haorea kava, a? Bema oibe, namona be oi gaukaralaia lasi kohudia oi negea.

Oi gaukaralaia lasi kohudia negea karana be auka. Oi laloa bada kohuna ta negea karana be auka​​—⁠ia be tura namona ta oi rakatania bamona. Unai dainai, edena bamona do oi diba edena kohu be oi negea bona edena be do oi negea lasi? Haida be lagani ta murinai edia kohu idia negea. Bema lagani ta lalonai gau ta oi gaukaralaia lasi, namona be oi negea. To bema lagani ta ia ore bona oi ura lasi unai gauna oi negea, be edena bamona? Ma hua siks oi henia. Bema lagani ta mai kahana lalonai unai gauna oi do gaukaralaia lasi, unai gauna oi negea be do ia auka lasi. Unai dainai, oi gaukaralaia lasi gaudia negea karana ese oi do ia durua emu nega oi gaukaralaia namonamo totona.

Momokani, iseda ruma bona gaukara gabudia ai ita gaukaralaia lasi kohu momo dainai iseda nega ita halusia kava sibona lasi, to gau ma haida dekenai danu. Unai dainai Iesu ia gwau, “tanobada ena laloa metau idauidau bona kohu ura henia dikadika” karana ese “Dirava ena hereva idia koua” bona sivarai namona be “anina lasi” gauna ai ia lao diba. (Mataio 13:22) Ta be ena mauri lalonai anina lasi gaudia momo ia karaia neganai, ia be nega lasi lauma gaudia ia karaia totona. Unai ese ena hetura karana Dirava ida do ia hadikaia bona moale korikorina ia havaraia gauna​​—⁠Dirava ese ia gwauhamatalaia tanobada matamatana⁠​—⁠​do ia abia lasi.​​—⁠Isaia 65:​17-​24; 2 Petero 3:​13.

Oi be hanaihanai gau ibounai be nega tamona oi ura oi karaia, hegeregere emu moni gaukara, ruma, motuka, moale karadia, eiava eksasais bona ma gau haida, a? Bema oibe, reana hari be nega namona anina lasi kohudia oi dadaraia totona, unai amo nega bada do ia noho Iehova ena hesiai gaukara oi karaia totona.

Momokani, nega be ia heau noho sinavai ta bamona bona ita koua diba lasi. Unai dainai bema Baibel ena hakaua herevadia ita badinaia, bona “gau namodia” totona iseda nega ita gaukaralaia namonamo, “Dirava ese hanamoa bona hairai do ia abia.”​​—⁠Filipi 1:​10, 11.

[Picture on page 18, 19]

Nega be ia aru hanaihanai sinavai bamona, ita gaukaralaia be namo gaukara namona ita karaia totona

[Picture on page 19]

Edena nega be nega namona stiuden be ena eksam ia stadilaia totona?

[Picture on page 20]

Bema kohu momo idia noho nega bada do oi haorea oi ura gauna oi tahua totona bona do oi lalohisihisi