Iesu be mai Ena Baibel ta, A?

LASI, Iesu dekenai Baibel ta ia noho lasi. Dahaka dainai? Badina hari ita gaukaralaia Baibel be Iesu ena negai ia noho lasi. To, dubu lalonai idia gaukaralaia lokua bukadia idia naria namonamo dainai, unai idia haboua bona hari ita gaukaralaia Baibel ai idia halaoa. Iesu be Nasareta dubu dekenai Isaia ena lokua bukana ia duahia. (Luka 4:​16, 17) Aposetolo Paulo be Antioka, Pisidia tano dekenai, dubu taudia ese “Mose ena taravatu bona peroveta buka idia duahia” neganai ia kamonai. (Kara 13:​14, 15) Bona hahediba tauna Iamesi ia gwau, “Mose ena taravatu be idia duahia dubu ta ta lalonai, Sabati Dinadia ibounai.”​​—⁠Kara 15:⁠21.

Aposetolo taudia edia negai idia noho taudia ta ta be mai edia lokua bukadia, a? Etiopia ena Kwini Kanedake ena kohu naria tauna Eunuko, be mai ena lokua bukana, badina Gasa ena dala dekenai Filipo ida ia hedavari neganai, ia be “iena kariota dekenai ia helai bona Isaia peroveta tauna ena buka ia duahia” noho. (Kara 8:​26-​30) Aposetolo Paulo ese Timoteo ia hamaoroa, “buka haida . . . boromakau kopina dekena amo idia karaia” gaudia do ia mailaia. (2 Timoteo 4:​13) Ena be Paulo ia gwau lasi unai lokua bukana be edena bamona, to reana unai lokua bukana be Heberu Revarevadia ena kahana haida.

Semitic gado ia diba momo tauna, Alan Millard ia gwau, “Iuda taudia huanai, moni momo bona diba bada taudia sibona be mai edia revareva helagadia edia lokua bukadia, hegeregere unai taudia haida be Farisea taudia bona tisa taudia, Nikodemo bamona.” Unai ena badina ta be, lokua bukadia ta ta edia davana be bada. Millard ia gwau, “Isaia bukana ena kopi ta ta edia davana be siliva moni 6 ia lao 10 bamona,” bona ma ia gwau, Heberu Revareva ai idia torea Baibel ibounai ena davana be hua 6 ena gaukara davana bamona.a

Baibel ia gwau lasi Iesu eiava iena hahediba taudia ta ta be mai edia lokua bukadia. To, ita diba Iesu be Baibel ia diba namonamo, badina Baibel lalonai idia noho herevadia ia gwauraia hedinarai namonamo. (Mataio 4:​4, 7, 10; 19:​4, 5) Namona be unai ese ita ia hagoadaia Baibel ita dibaia namonamo totona, badina hari inai negai Baibel be ita abia haraga diba.

[Footnote]