Hahediba Tauna Badana Tohotohoa
“Kamonai . . . namonamo.”—LUKA 8:18.
1, 2. Dahaka dainai Baibel ai Iesu ese haroro gaukara lalonai ia karaia karadia ita duahia bona badinaia be namo?
HADIBAIA Tauna Badana Iesu Keriso be hadibaia gaukara ia karaia namonamo dainai, ia murinai idia raka taudia ia hamaoroa diba: “Kamonai . . . namonamo.” (Luka 8:16-18) Oi be Keristani tauna dainai, emu hesiai gaukara lalonai kamonai karana oi hahedinaraia be namo. Badina bema Dirava bona ena ura herevana oi kamonai namonamo, haroro gaukara do oi karaia namonamo bona hadibaia tauna namona ai do oi lao. Momokani, ena be hari inai negai Iesu ena gadona oi kamonai lasi, to Baibel ai Iesu ena sivarai bona ia karaia karadia be oi duahia diba. Iesu ese haroro gaukara lalonai ia karaia karadia be Baibel ese edena bamona ia herevalaia?
2 Iesu be sivarai namona ia harorolaia namonamo bona Baibel ena hereva momokani ia hadibaia namonamo. (Luka 8:1; Ioane 8:28) Hahediba taudia halaoa gaukarana lalonai, ta ita haroro henia bona hadibaia be namo, to haroro gaukara idia manadalaia Keristani taudia haida idia gwau, taunimanima idia hadibaia namonamo be ia auka. Hadibaia tauna ese haroro gaukara ia karaia neganai, ia be taunimanima dekenai sivarai ta ia gwauraia sibona. To ia ese taunimanima dekenai Iehova bona Ena ura ia hadibaia totona, idia ia tura henia guna be namo. (Mataio 28:19, 20) Unai dainai, Hadibaia Tauna Badana Iesu Keriso ena kara ia tohotohoa be namo.—Ioane 13:13.
3. Hahediba taudia halaoa gaukarana lalonai Iesu ita tohotohoa neganai, dahaka namo do ita abia?
3 Bema Iesu ena hadibaia daladia oi tohotohoa, oi be aposetolo Paulo ena sisiba oi badinaia diba, ia gwau: “Keriso idia do abidadama henia lasi taudia edia vairana dekenai, kara namodia mai aonega danu do umui karaia. Bona umui dekenai nega ia noho gauna do umui gaukaralaia namonamo. Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:5, 6) Iesu ena hadibaia daladia oi tohotohoa be mai ena hekwarahi, to unai ese oi do ia durua taunimanima oi hadibaia namonamo, edia ura hegeregerena do oi “haere henidia” totona.
Iesu be Ma Haida Ia Hagoadaia Idia Hereva Totona
4. Dahaka dainai ita gwau diba Iesu be kamonai tauna?
4 Iesu ena mauri lalonai, ia be taunimanima ia kamonai henia bona idia ia hagoadaia edia lalohadai idia gwauraia totona. Hegeregere, Iesu ena mauri lagani be 12 neganai, ena tama bona sina ese Iesu idia davaria “hadibaia taudia edia huanai ia helai, edia hereva ia kamonai, bona ia henanadaia danu, idia dekenai.” (Luka 2:46) Ena be Iesu be gau momo ia diba, to dubu dekenai ia be hadibaia taudia hahemaraia dalana ta ia tahua lasi. To ia kamonai, bona idia dekenai henanadai haida ia henia danu. Momokani, Iesu be ena kamonai karana dainai, Dirava bona taunimanima ese idia ura henia.—Luka 2:52.
5, 6. Edena bamona ita diba Iesu be ia hadibaia taudia edia hereva ia kamonai?
5 Ena be Iesu ia bapatiso bona Mesia ai ia lao, to ia be taunimanima ia laloa bada bona ia kamonai henidia. Ia be ia hadibaia herevadia sibona lasi to ena hereva idia kamonai taudia ia laloa bada danu. Nega momo, Iesu be ena hereva ia hadokoa bena henanadai ta ia henia, bona taunimanima edia haere ia kamonai. (Mataio 16:13-15) Hegeregere, Lasaro ia mase neganai Iesu be Mareta dekenai ia gwau: “Idia mauri noho, bona idia abidadama henia lau dekenai taudia ibounai, be do idia mase lasi, lasi bona lasi momokani.” Bena Iesu be Mareta ia nanadaia: “Inai hereva oi abia dae, a?” Iesu be ia kamonai lalonai, Mareta ia gwau: “Lohiabada e, oibe. Lau abia dae momokani vadaeni, oi be Keriso, Dirava ena Natuna.” (Ioane 11:26, 27) Reana Mareta ese unai dala amo ena abidadama ia herevalaia neganai, Iesu ia moale bada herea!
6 Hahediba taudia momo be Iesu idia rakatania neganai, Iesu be ia ura ena aposetolo taudia edia lalohadai ia kamonai. Unai dainai, ia henanadai: “Umui danu do umui raka siri, a?” Simona Petero ia haere: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho. Ai be ai abidadama henia, bona ai diba vadaeni, oi be Dirava ena Helaga Tauna.” (Ioane 6:66-69) Reana Iesu be unai hereva dekenai ia moale! Bema oi stadi henia tauna be ena abidadama ia herevalaia neganai, reana oi moale danu.
Iesu be mai Hemataurai ida Ia Kamonai
7. Dahaka dainai Samaria taudia momo herea be Iesu idia abidadama henia?
7 Iesu be hadibaia tauna namona ena badina ta be inai: Ia be taunimanima ia laloa bada, bona mai hemataurai ida edia hereva ia kamonai. Hegeregere, nega ta ai, Sukara dekenai, Iesu be Iakobo ena ranu gurina badinai Samaria hahine ta ia haroro henia. To, Iesu sibona ia hereva lasi; ia be Samaria hahine ena hereva ia kamonai danu. Unai amo, ia itaia diba hahine be tomadiho ia laloa bada dainai ia hamaoroa Dirava ia ura ia do idia tomadiho henia taudia ese lauma bona momokani dekena amo do idia tomadiho henia be namo. Iesu ese unai hahine ia laloa bada bona matauraia dainai, unai hahine ese Iesu ena sivarai be ma haida dekenai ia kikilaia bona “Samaria taudia momo herea unai hanua lalonai ese Iesu idia abidadama henia, unai hahine ena hereva dainai.”—Ioane 4:5-29, 39-42.
8. Haroro gaukara lalonai taunimanima ese edia lalohadai idia herevalaia neganai, edena dala ai unai ese oi ia durua diba haroro herevana oi hamatamaia totona?
8 Nega momo taunimanima be idia ura edia lalohadai idia herevalaia. Hegeregere, idaunegai Atena dekenai idia noho taudia be sivarai matamata ta idia kamonai neganai, idia ura edia lalohadai idia herevalaia. Unai dainai, Paulo be unai hanua badana ena Areo Ororo dekenai hereva namona ta ia henia. (Kara 17:18-34) Emu haroro gaukara ai ruma tauna ta oi davaria neganai, reana oi gwau, “Lau mai ena badina be lau ura mai anina bada sivaraina ta lau kikilaia [haroro herevana ta gwauraia] to lau ura emu lalohadai lau kamonai danu.” Ruma tauna ia hereva neganai oi kamonai, bona ena hereva oi habadaia o henanadai ta oi henia. Bena mai manau ida Baibel amo emu hereva oi hamomokania.
Iesu be Haroro Herevana Hamatamaia Dalana Ia Diba
9. Iesu be Kleopa bona ena turana dekenai “Buka Helaga ena anina” ia hadibaia totona, dahaka ia karaia guna?
9 Iesu be hereva daladia ia diba momo. Ia be haida edia hereva ia kamonai sibona lasi, to edia lalohadai ia diba dainai, ia diba dahaka do ia gwauraia. (Mataio 9:4; 12:22-30; Luka 9:46, 47) Hegeregere, Iesu ia toreisi lou bona daudau lasi murinai, ena hahediba taudia rua be Ierusalema idia rakatania bona Emausa dekenai idia raka lao noho. Luka bukana ia gwau: “Vadaeni idia herevahereva neganai, Iesu be idia dekenai ia raka kahirakahira lao, idia danu ia raka hebou. Tauna idia itaia, to idia diba lasi ia be Iesu. Iesu ia gwau, ‘Umui be dala dekenai dahaka umui herevalaia?’ Vadaeni idia ruaosi idia gini, edia vairana be mai metau danu. Vadaeni idia ta, ena ladana be Kleopa, ese ia haere henia, ia gwau, ‘Oi be Ierusalema dekenai sibona oi noho, unai dainai inai gaudia idia vara be oi diba lasi, a?’ Ia gwau, ‘Dahaka gau?’ ” Hadibaia Tauna Badana be unai hahediba taudia rua edia hereva ia kamonai lalonai, idia gwau Nasareta tauna Iesu be taunimanima ia hadibaia, hoa karadia ia karaia, bona idia hamasea. To haida idia gwau Iesu be mase amo ia toreisi lou. Kleopa bona ena turana ese edia lalohadai idia herevalaia neganai, Iesu be ia kamonai sibona. Gabeai, Iesu be ‘Buka Helaga ena anina’ idia dekenai ia hadibaia.—Luka 24:13-27, 32.
10. Edena dala ai ruma tauna ena lalohadai tomadiho dekenai do oi diba?
10 Reana oi be ruma tauna ena lalohadai tomadiho dekenai oi diba lasi. Unai dainai, reana ruma tauna dekenai oi gwau, “Lau be taunimanima lau nanadaia idia ese guriguri karana be edena bamona idia laloa bona lau ura edia haere lau kamonai.” Vadaeni oi henanadai, “Daika be taunimanima edia guriguri ia kamonai henia?” Ruma tauna ena haere amo ena lalohadai bona ena tomadiho ena hadibaia herevadia do oi lalopararalaia. Bema ruma tauna be tomadiho ia laloa bada, vadaeni oi nanadaia lou: “Oi laloa Dirava be guriguri ibounai ia kamonai o haida sibona?” Unai bamona henanadai amo herevahereva dalana oi kehoa diba. Bema oi ura Baibel ena siri ta amo emu hereva oi hamomokania, dala maorona ai unai oi karaia bona ruma tauna ia abia dae gauna oi hepapahuahulaia lasi. Bema ruma tauna be emu hereva ia moalelaia, reana mai moale ida oi do ia hamaoroa oi lou henia totona. To bema ia henia henanadai ta ena haere oi diba lasi be edena bamona? Namona be eda buka dekenai iena henanadai ena haere oi tahua, bona oi lou henia neganai, “mai mataurai bona manau danu” emu helaro ena badina oi herevalaia diba.—1 Petero 3:15.
Iesu be Kudou-Maoro Taudia Ia Hadibaia
11. Edena dala ai kudou-maoro taudia oi davaria diba?
11 Goevadae tauna Iesu ia diba edena kudou-maoro tauna ia hadibaia be namo. Ita be Iesu bamona lasi dainai, “mauri hanaihanai idia ura kudou-maoro taudia” ita tahua be auka. (Kara 13:48, NW ) To, Iesu be ena aposetolo taudia ia hamaoroa: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua.” (Mataio 10:11) Iesu ena aposetolo taudia bamona, namona be Baibel ena hereva idia ura kamonai bona dibaia taudia oi tahua. Bona unai bamona kudou-maoro taudia oi davaria totona, namona be ruma taudia ta ta edia hereva oi kamonai namonamo bona edia lalohadai oi diba.
12. Edena dala ai kamonai tauna oi hadibaia noho diba?
12 Basileia ena sivarai namona ia kamonai tauna oi rakatania neganai, namona be ia ese do ia dibaia hereva momokanidia ma haida oi laloa. Bema kamonai tauna ida oi kikilaia gaudia oi kamonai bona oi torea, unai ese oi do ia durua ia oi hadibaia noho totona. Lou henia oi karaia neganai, kamonai tauna ena hereva oi kamonai namonamo be namo, unai amo kamonai tauna ia abia dae gaudia, ena lalohadai bona noho dalana do oi dibaia.
13. Edena dala ai oi diba taunimanima be Baibel idia laloa bada o lasi?
13 Edena dala ai taunimanima oi hagoadaia Baibel idia laloa dalana idia herevalaia totona? Teritori haida ai, inai bamona oi henanadai diba, “Baibel ena hereva haida edia anina be oi lalopararalaia lasi, a?” Ruma tauna ena haere amo do oi diba ia be Baibel ia matauraia o lasi. Dala ma ta be inai: Baibel ena siri ta oi duahia bona oi henanadai, “Dahaka oi laloa inai siri dekenai?” Iesu bamona, henanadai oi gaukaralaia namonamo neganai, haroro gaukara lalonai anina namona do oi havaraia. To, henanadai oi gaukaralaia neganai, namona be oi naria namonamo danu.
Iesu ese Henanadai Ia Gaukaralaia Namonamo
14. Kamonai taudia dekenai henanadai aukadia oi henia lasi, to edena dala ai oi hahedinaraia oi be edia lalohadai oi laloa bada?
14 Ma haida edia lalohadai oi laloa maragi lasi, bona idia oi hahemaraia lasi. Iesu oi tohotohoa. Ia be henanadai aukadia ia henia lasi, to lalona veria henanadai ia henia. Danu, Iesu ena kamonai karana dainai, kudou-maoro taudia edia mamina ia namo. (Mataio 11:28) Taunimanima idauidau be mai gari lasi ida Iesu dekenai edia hekwakwanai o lalohekwarahi idia herevalaia. (Mareko 1:40; 5:35, 36; 10:13, 17, 46, 47) Kamonai tauna be Baibel bona Baibel ena hadibaia herevadia ia laloa dalana ia herevalaia neganai, namona be henanadai aukadia oi henia lasi.
15, 16. Edena dala ai taunimanima oi durua edia lalohadai tomadiho dekenai idia kikilaia totona?
15 Henanadai sibona lasi to lalona veria sivaraina ta oi kikilaia, bena kamonai tauna ena hereva oi kamonai. Hegeregere, Iesu be Nikodemo ia hamaoroa: “Bema taunimanima ta be ia vara lou lasi, ia be Dirava ena Basileia do ia itaia diba lasi.” (Ioane 3:3) Unai hereva be Nikodemo ena lalona ia veria dainai, Nikodemo be henanadai ia henia bona Iesu ena hereva ia kamonai. (Ioane 3:4-20) Reana oi danu be unai bamona oi karaia diba, unai amo taunimanima ida oi herevahereva namonamo.
16 Hari inai negai, Africa, Eastern Europe, Latin America, bona gabu momo dekenai tomadiho matamatadia momo idia hedinarai dainai, taunimanima momo be idia daradara. Unai bamona taudia dekenai reana oi gwau diba: “Hari, tomadiho be momo herea dainai lau daradara. To lau laloa kahirakahira bese idauidau be mai lalotamona ida tomadiho momokanina do idia haginia. Unai bamona ia vara be namo, ani?” Bema oi laloa gauna be unai bamona oi kikilaia, unai ese ruma tauna ia durua ena lalohadai ia herevalaia totona. Bema henanadai ta lalonai hereva rua oi gwauraia bona ia ese abia hidi ia karaia be namo, reana unai ia haerelaia be auka lasi. (Mataio 17:25) Ruma tauna ena lalohadai ia gwauraia murinai, emu hereva be siri ta o rua amo oi durua. (Isaia 11:9; Sepanaia 3:9) Bema ruma tauna ena haere o hereva oi kamonai namonamo bona oi torea, vadaeni lou henia oi karaia neganai oi diba dahaka do oi kikilaia.
Iesu be Natudia Edia Hereva Ia Kamonai
17. Edena dala ai ita diba Iesu be maragidia edia namo ia laloa danu?
17 Iesu be natudia edia namo ia laloa bada danu. Ia be natudia edia gadara bona hereva ia diba. Nega haida ia ese natudia ia boiria ia dekenai. (Luka 7:31, 32; 18:15-17) Natudia momo be Iesu ena haroro herevana idia kamonai henia danu. Maragidia be Mesia idia hanamoa neganai, Iesu be unai ia itaia bona ia gwau Baibel be unai kara ia perovetalaia. (Mataio 14:21; 15:38; 21:15, 16) Hari inai negai, natudia momo be Iesu ena hahediba taudia ai idia lao. Unai dainai, edena dala ai natudia oi durua diba?
18, 19. Edena dala ai natudia oi durua Iesu ena hahediba tauna ai ia lao totona?
18 Emu natuna be Iesu ena hahediba tauna ai ia lao totona, namona be ena hereva oi kamonai. Gau badana be oi laloparara, ia be Iehova ena lalohadai ia abia eiava lasi. Herevana emu natuna be dahaka ia kikilaia, to ia oi hanamoa guna be namo. Bena siri maorona amo emu natuna oi durua Iehova ena lalohadai ia lalopararalaia totona.
19 Henanadai henia karana ese oi do ia durua natuna ena lalohadai oi diba totona. To badadia bamona, natudia idia ura lasi henanadai aukadia ita henia idia dekenai. Unai dainai, oi sibona emu sivarai sisina oi herevalaia be namo, ani? Reana oi gwau diba, “Guna egu lalohadai be idau” bona ena badina oi herevalaia. Bena oi henanadai, “Oi danu be unai bamona oi laloa, a?” Emu natuna ena haere ese dala do ia kehoa Baibel ena hagoadaia hereva ma haida umui herevalaia hebou totona.
Hadibaia Tauna Badana Tohotohoa Noho
20, 21. Hahediba taudia halaoa gaukarana oi karaia neganai, dahaka dainai kamonai karana be gau badana?
20 Herevana natuna eiava ma ta dekenai dahaka oi herevalaia, to oi kamonai be namo. Badina unai be lalokau, manau, hemataurai, bona ma haida edia namo oi laloa bada karadia. Momokani, kamonai namonamo karana be mai anina bada.
21 Haroro gaukara oi karaia neganai, ruma taudia edia hereva oi kamonai namonamo be namo. Bema unai bamona oi karaia, vadaeni do oi laloparara dahaka hereva momokani amo ruma taudia oi hadibaia be namo. Bona idia oi hadibaia neganai, namona be Iesu ena hahediba daladia idauidau oi gaukaralaia. Unai bamona oi karaia neganai, moale do oi davaria badina oi be Hahediba Tauna Badana oi tohotohoa.
Edena Bamona Do Oi Haere?
• Edena dala ai Iesu ese ma haida ia hagoadaia edia lalohadai idia gwauraia totona?
• Dahaka dainai Iesu be ia hadibaia taudia edia hereva ia kamonai danu?
• Haroro gaukara lalonai, henanadai be edena bamona oi gaukaralaia diba?
• Edena dala ai natudia oi durua Iesu ena hahediba taudia ai idia lao totona?
[Picture on page 29]
Oi haroro neganai, oi kamonai be namo
[Picture on page 31]
Iesu ita tohotohoa bona natudia ita durua Iesu ena hahediba taudia ai idia lao totona